കരിനാക്ക്

വാട്ട് ആന്‍ ഐഡിയ ഉസ്താദ്ജീ...!!!

2012-02-01T13:20:00.000+03:00

ഒടുവില്‍ മുടിപ്പള്ളിക്ക് തറക്കല്ലിട്ടു. ഒരു പ്രദേശത്തെയാകെ ശ്വാസം മുട്ടിച്ച മുടിപ്രേമികള്‍ വിശ്വപ്രവാചകന്റെ 'തിരുകേശ'മെന്ന് തെറ്റിദ്ധരിച്ച് സനദില്ലാ മുടിവെള്ളം ശേഖരിക്കാന്‍ ഞാനാദ്യം ഞാനാദ്യമെന്ന് തിരക്കു കൂട്ടി. ആയിരങ്ങളും ലക്ഷങ്ങളും കടന്ന് കോടികള്‍ തന്നെ സംഭാവനകളായി ഒഴുകിയെത്തിയപ്പോള്‍ ഇല്ലാക്കഥ കളുടെ രാജശില്പി ശ്രീ. ശ്രീ. ക്ഷമിക്കണം ജ. ജ. ഹോജാ കാന്തപുരത്തിന്റെ മനസ്സില്‍ ഒരായിരം ലഡ്ഡു ഒന്നിച്ചു പൊട്ടി. സഹഹോജമാരുടെ ആവേശം അതിനേക്കാള്‍ അണപൊട്ടി. ഇതൊക്കെ കണ്ട് വേദിയിലിരുന്ന അബുദാബി അറബി ഊറിച്ചിരിച്ചു. ഏതാണ്ട് മുക്കുപണ്ടം പണയം വെച്ച് കാശും കീശയിലിട്ട് ബാങ്കിറങ്ങി വരുന്നവന്റെ അതേ ചിരി! അപ്പോഴും ഒരു കാര്യം മാത്രം ദുരൂഹമായി കിടന്നു. എവിടെയാവും ഈ 'അതിശയപ്പള്ളി' പിറവി കൊള്ളാന്‍ പോകുന്നതെന്ന 'ബ്രഹ്മാണ്ഡ രഹസ്യം'! വന്‍ വിപണന സാധ്യതകളുള്ള മുടിവ്യാപാര സമുച്ചയത്തിന്‍റെ സമീപ പ്രദേശങ്ങള്‍ അന്യഭൂമാഫിയകള്‍ സ്വന്തമാക്കിക്കളയുമോയെന്ന ഭയം തന്നെയാവണം സംഗതി അതീവരഹസ്യമാക്കി സൂക്ഷിക്കാന്‍ ഇവര്‍ക്ക് പ്രേരണയായതെന്ന കാര്യത്തില്‍ സംശയമില്ല. മറ്റാരെങ്കിലും സ്വന്തമാക്കും മുമ്പ് പ്രസ്തുത പ്രദേശം തങ്ങളുടെ വരുതിയിലാക്കാന്‍ ഉസ്താദും കൂട്ടരും ശ്രമം തുടങ്ങിക്കാണുമെന്നതും ഉറപ്പ്.

ഏതായാലും ഒരുകൂട്ടം വിശ്വാസികളുടെടെ മനസ്സില്‍ ആശ്വാസമാണ്. പതിനായിരങ്ങള്‍ മുടക്കി മദീനയില്‍ പോയി പ്രവാചകപ്രഭുവിന്റെ റൗളാ ശെരീഫ്‌ ദര്‍ശിക്കുന്നതിനു പകരമിനി, കാന്തപുരം ഉസ്താദ്‌ പടുത്തുയര്‍ത്താന്‍ പോകുന്ന കേശകൂടാരത്തില്‍ ചെന്ന് 'തിരുകേശം' ദര്‍ശിച്ചാല്‍ മതിയല്ലോ. മാറാരോഗത്തിന്റെ വേദന തിന്ന് ആശുപത്രിക്കിടക്കയില്‍ കിടന്ന് നരകിക്കുന്നതിനു പകരം തിരുകേശം മുക്കിയ ഒരു കുപ്പി വെള്ളം ബിസ്മിയും ചൊല്ലി വലിച്ചു കുടിച്ചാല്‍ മതിയല്ലോ! മര്‍ക്കസ്‌ കോംപ്ലക്സ് അപ്പാടെ തന്നെ പണയം വെച്ചിട്ടും നിര്‍മിക്കാനാവാതെ പോയ മെഡിക്കല്‍ കോളജിനെ കുറിച്ചോര്‍ത്ത്‌ ഇനിയെന്തിന് സങ്കടപ്പെടണം? സര്‍വരോഗസംഹാരിയായി, സര്‍വപാപ പരിഹാരിയായി രണ്ടു മൂന്നു മുടിയിഴകള്‍ ചില്ലുകൂട്ടില്‍ കിടന്ന് തിളങ്ങുന്നുണ്ടല്ലോ..!! കേരളത്തില്‍ ഒരു മദീന തന്നെ സൃഷ്ടിച്ചെടുത്ത ഉസ്താദിന്റെ ബുദ്ധി അപാരം, അത്യപാരം. വാട്ട് ആന്‍ ഐഡിയ ഉസ്താദ്ജീ...!!!

കോടികള്‍ പിരിച്ചെടുക്കാന്‍ എന്തൊക്കെ നാടകങ്ങളാണ് അരങ്ങിലെത്തിയത്! അബുദാബിയിലെ ശൈഖിനോട് അങ്ങേരുടെ കൈയിലെ 'അപൂര്‍വ മുടി' അശ്ശൈഖ് അബൂബക്കറിന് കൈമാറണമെന്ന് പ്രവാചകന്‍ സ്വപ്നത്തില്‍ നിര്‍ദേശം നല്‍കിയ കഥ മുതല്‍, പ്രവാചകനെ കാണാന്‍ അണികള്‍ക്ക് ടിക്കറ്റ് മുറിച്ചു കൊടുക്കുന്ന കാന്തപുരത്തെ സ്വപ്നത്തില്‍ ദര്‍ശിച്ച അരുമശിഷ്യരുടെ അനുഭവ കഥകള്‍ വരെ കേശഗോപുരത്തിന് അടിത്തറ പാകാന്‍ പറഞ്ഞിറക്കി ഇക്കൂട്ടര്‍! അപൂര്‍വത്തില്‍ അപൂര്‍വമെന്നു വീമ്പിളക്കിയ 'തിരു'മുടി കെട്ടുകണക്കിന് അബുദാബി അറബിയുടെ വീട്ടിലുണ്ടെന്ന് തെളിവു സഹിതം ഈ ബ്ലോഗിലൂടെ മാലോകരറിഞ്ഞപ്പോള്‍ നുണക്കഥകളുടെ ചീട്ടു കൊട്ടാരം നിലംപൊത്തിയെന്നത് ശേഷകഥ.

പറ്റിയ അമളി അഡ്ജസ്റ്റ്‌ ചെയ്യാന്‍ കൈയിലുള്ള മുടികള്‍ സ്വയം വളരുമെന്നും കത്തിച്ചപ്പോള്‍ കത്തിയില്ലെന്നും സ്വയം പ്രകാശിച്ചെന്നുമൊക്കെ ഖസ്രജി തന്നെ അവകാശപ്പെട്ടുവെന്നായി പിന്നീടുള്ള നുണപുരാണം. നാടായ നാട്ടിലൊക്കെ മൈക്ക് കെട്ടി സഖാഫി - അഹ്സനിമാര്‍ വീരകഥകള്‍ വിളംബരം ചെയ്തു. അണികള്‍ തക്ബീര്‍ മുഴക്കി പ്രോല്‍സാഹിപ്പിച്ചു. അധികം വൈകാതെ മുടിയുടെ നിഴലുള്ള ഫോട്ടോകള്‍ പുറത്തെത്തിയപ്പോള്‍ ഈ ബ്ലോഗറടക്കം ഫോട്ടോയില്‍ കൃത്രിമം കാട്ടിയെന്നായി ആരോപണം. അതും ഫലിക്കാതെ വന്നപ്പോള്‍ ആസ്ഥാന കോളമെഴുത്തുകാരനെ രംഗത്തിറക്കി. തരുവണ സുവിശേഷം തീര്‍ത്തു പറഞ്ഞു, തിരുമുടിക്ക് തിരുനിഴലുണ്ടാവില്ലെന്നു പറയുന്നവര്‍ യുക്തിവാദികള്‍ തന്നെ! കൂടെ ചേര്‍ക്കാന്‍ സംസ്ഥാന കേരള ജംഇയ്യത്തുല്‍ ഉലമയുടെ സംസ്ഥാന നേതാവിനെ തന്നെ രംഗത്തിറക്കി. കത്തിച്ചാല്‍ കത്തുമെന്നു അദ്ദേഹവും കട്ടായം പറഞ്ഞതായി പ്രചരിപ്പിച്ചു. പാവം അണികള്‍ അപ്പോഴും തക്ബീര്‍ വിളിച്ചു! പുണ്യപ്രവാചകനെ മുടി വെട്ടാത്ത പ്രാകൃതനാക്കിയെന്നാരോപിച്ചും, വ്യാജ മുടിയുടെ ഹോള്‍സെയില്‍ ഡീലറായ 'ബോംബെ വാലയെ' കൈയോടെ പിടിച്ച് കാന്തപുരത്തിന് കിട്ടിയ മുടി പോലുള്ള ഏഴെണ്ണം സംഘടിപ്പിച്ച് പരസ്യമായി നിഴല്‍ പരിശോധന നടത്തിയും ഔദ്യോഗിക സമസ്ത തന്നെ നേരിട്ടു രംഗത്തിറങ്ങിയപ്പോള്‍ സഖാഫിമാര്‍ വീണ്ടും വിയര്‍ത്തു. ഏറ്റവുമൊടുവില്‍ മുടി കത്തിച്ചാല്‍ കത്തില്ലെന്നും എന്നാല്‍ തങ്ങളുടെ പക്കലുള്ള മുടി കത്തിച്ചു നോക്കില്ലെന്നും സാക്ഷാല്‍ കാന്തപുരം തന്നെ പ്രഖ്യാപിച്ചപ്പോള്‍ പാവം അനുയായികള്‍ അണ്ടി പോയ അണ്ണാനെ അനുകരിച്ചു!

തറക്കല്ലിടാന്‍ കോഴിക്കോട്ടെത്തിയ ഖസ്രജിയുടെ ലഗേജ്‌ എയര്‍പോര്‍ട്ട് അധികൃതരേക്കാള്‍ വിശദമായി പരിശോധിച്ചത്‌ ചോട്ടാപ്പിമാരായിര്‍ക്കണം. അബുദാബിയിലുള്ള അടിരേഖ വേരോടെ പിഴുതെടുത്ത് സ്വപ്നനഗരിയിലെ ജനസാഗരത്തിന് മുന്നില്‍ ഉയര്‍ത്തിക്കാട്ടുമെന്ന് അവര്‍ ന്യായമായും വിശ്വസിച്ചു കാണും. അങ്ങനെയാണല്ലോ ബഡാ ഉസ്താദ്‌ പറഞ്ഞു വിശ്വസിപ്പിച്ചത്. മര്‍ക്കസില്‍ വായിച്ചത് സനദാണെന്ന ആദ്യ വാദത്തില്‍ നിന്നും മലക്കം മറിച്ചു അത് നസബയാണെന്നും അടിരേഖ അബുദാബിയിലെ ശൈഖിന്റെ കൊട്ടാരത്തില്‍ ഭദ്രമായി ഇരിപ്പുണ്ടെന്നും ഉസ്താദ്‌ പറഞ്ഞാല്‍ പിന്നെയെന്തിന് അവിശ്വസിക്കണം! പക്ഷെ, വിശ്വാസമാണ് എല്ലാമെന്ന് ഉസ്താദ്‌ വീണ്ടും തെളിയിച്ചു. അടിരേഖ സൂക്ഷിച്ച ലോക്കര്‍ തുറക്കാന്‍ താക്കോല്‍ കാണാഞ്ഞിട്ടോ എന്തോ സംഗതി ഇപ്പോഴും അബുദാബിയിലാണെന്ന് ഖസ്രജി വ്യക്തമാക്കിയപ്പോള്‍ അണികള്‍ മൌനം പൂണ്ടു. താമസിയാതെ താനൊരു വലിയ 'പുത്തകം' എഴുതുന്നുണ്ടെന്നും അതില്‍ എല്ലാം വിശദീകരിക്കുമെന്നും കൂടി അദ്ദേഹം കൂട്ടിചേര്‍ത്തപ്പോള്‍ തക്ബീര്‍ വിളികള്‍ വീണ്ടുമുയര്‍ന്നു. അദ്ദേഹത്തിന്‍റെ കാര്‍മികത്വത്തില്‍ പുറത്തിറങ്ങിയ പഴയ പുസ്തകത്തില്‍ സ്വന്തം വീട്ടിലെ മുടിപുരാണം ചേര്‍ക്കാതെ പോയതിന്‍റെ കാരണത്തെ കുറിച്ചോ, ഒരു എ ഫോര്‍ പേപ്പറില്‍ ഒതുങ്ങുന്ന സനദ്‌ വെളിപ്പെടുത്താന്‍ ഒരു വലിയ കിതാബ് തന്നെ രചിക്കുന്നതിന്റെ അസാംഗത്യത്തെ കുറിച്ചോ ആരും ചോദിച്ചില്ല. അല്ലെങ്കിലും തിരുവായ്ക്ക് എതിര്‍വാ പറയാന്‍ തന്റേടമുള്ള ആണ്‍കുട്ടികള്‍ ഇല്ലാത്തതിന്റെ കുറവാണല്ലോ വിമത സമസ്തയെ ഇക്കോലത്തിലാക്കിയത്‌. പഴയ മുടിക്ക് കൃത്രിമ സനദ്‌ നിര്‍മിക്കാന്‍ ചുമതലപ്പെടുത്തപ്പെട്ട മര്‍കസ് മുന്‍ മുദരിസ് മലയമ്മ മുഹമ്മദ് സഖാഫി പത്രസമ്മേളനത്തില്‍ പരസ്യമായി പറഞ്ഞ 'കാര്യങ്ങള്‍ തുറന്നു പറയാന്‍ തന്നെ വിലക്കുന്നത് ദൈവഭയമല്ല മറ്റു ചില ഭയമാണ്' എന്ന ഒരൊറ്റ വാക്യം മതി, സ്വന്തം കൂട്ടരിലുള്ള വിമര്‍ശകരോടുള്ള ഇക്കൂട്ടരുടെ നിലപാട് ബോധ്യപ്പെടാന്‍ .

സംഗതി ഇത്രയുമായ സ്ഥിതിക്ക് കാന്തപുരം ചില കാര്യങ്ങളില്‍ വ്യക്തത വരുത്തേണ്ടതുണ്ട്. ഒരു മുടിയുടെ പേരില്‍ പിരിച്ചെടുത്ത കോടികളുടെ കണക്ക് തന്നെ അതില്‍ പ്രധാനം. ആദ്യം പ്രഖ്യാപിക്കപ്പെട്ടത്‌ നാല് ലക്ഷം പേരില്‍ നിന്നും ആയിരം രൂപയുടെ ടോക്കന്‍ മുഖേന നാല്‍പത്‌ കോടി പിരിച്ചെടുക്കുമെന്നായിരുന്നു. ഇത് പ്രകാരം എത്ര പണം പിരിച്ചെടുത്തു? വിതരണം ചെയ്ത ടോക്കണില്‍ ക്രമനമ്പര്‍ രേഖപ്പെടുത്തിയിരുന്നില്ലെന്ന മറുപക്ഷതിന്റെ ആരോപണം സത്യമാണോ? ആയിരം രൂപയ്ക്ക് പുറമേ ഒരു മുസല്ലക്ക് ഇരുപത്തി അയ്യായിരം എന്ന രീതിയില്‍ എത്ര രൂപ പിരിഞ്ഞു കിട്ടി? കഴിഞ്ഞ ദിവസം സ്വപ്നനഗരിയില്‍ വെച്ച് മുന്‍ കേന്ദ്രമന്ത്രി സീ എം ഇബ്രാഹിം നല്‍കിയ അഞ്ചു കോടിയും നാദാപുരം സ്വദേശി നല്‍കിയ പത്തു ലക്ഷവുമടക്കം പിരിഞ്ഞു കിട്ടിയ കോടികളുടെ കണക്കെത്ര? ഉത്തരം സ്വാഭാവികമായും 'നിന്റെ പണം ഉസ്താദ്‌ വാങ്ങിയിട്ടില്ലല്ലോ'യെന്ന മറുചോദ്യമായിരിക്കുമെന്നറിയാം. എന്നാലും വെറുതെ ചോദിക്കുകയാണ്, ഊരും പേരുമറിയാത ഒരു മുടിക്കഷണം കൊണ്ട് കോടികള്‍ കൊയ്യുന്ന ആത്മീയ വാണിഭത്തിന്‍റെ നേര്‍ചിത്രം മാലോകര്‍ക്ക് മുമ്പില്‍ തുറന്നു കാട്ടാന്‍ വേണ്ടി. ഈന്തപ്പനയോല ചിത്രം വരച്ച പ്രവാചക ശരീരത്തെ പാടേ മറന്ന്, പൊയ്മുടിയുടെ പോരിശക്കഥകള്‍ പറഞ്ഞിറക്കി, എതിര്‍ക്കുന്നവരെ നരകത്തിലെ പാമ്പിനേയും തേളിനെയും കാട്ടി ഭീഷണിപ്പെടുത്തി ഒരു പുരോഹിത വൃന്ദം കാട്ടിക്കൂട്ടുന്ന ആര്‍ഭാട ഭീകരത കാണുമ്പോള്‍ നാവും വായിലിട്ട് കൈയും കെട്ടി മിണ്ടാതിരിക്കാന്‍ കഴിയാത്തത്‌ കൊണ്ട് മാത്രം!

പ്രിയ കാന്തപുരം, സ്വലാത്തും ദിക്റും പള്ളിയും ദര്‍സും വാണിഭവല്‍ക്കരിച്ചാല്‍ ഇനിയുമേറെക്കാലം നിങ്ങള്‍ക്ക് വിദേശവാഹനങ്ങളില്‍ ഉലകം ചുറ്റാനായേക്കും. പണച്ചാക്കുകള്‍ കൂടെയുള്ള കാലത്തോളം ഖസ്രജിയെ പോലുള്ള 'അന്താരാഷ്‌ട്ര വ്യക്തിത്വങ്ങളെ' വേദിയില്‍ നിറക്കാനുമായേക്കും. പക്ഷേ, നിര്‍മിക്കാന്‍ പോകുന്ന ഭീമന്‍ പള്ളിയില്‍ നമസ്കരിക്കാനെത്തുന്ന പതിനായിരങ്ങളില്‍ എത്രപേരുടെ ഞെഞ്ചിടിപ്പിന് 'എന്‍റെ മോളെ'യെന്ന താളമുണ്ടാവുമെന്ന് താങ്കളോര്‍ക്കാറുണ്ടോ? 'പെര' നിറഞ്ഞ പെണ്ണിനെ കുറിച്ചുള്ള ചിന്തയില്‍ ദിക്റ് പോലും മുറിഞ്ഞു പോകുന്ന ആ പാവങ്ങളുടെ ഗദ്ഗദമകറ്റാന്‍ താങ്കളൊഴുക്കുന്ന കോടികള്‍ തന്നെ ധാരാളമായിരുന്നു. ഒന്ന് വിരല്‍ ഞൊടിക്കുമ്പോഴേക്കും നാല്പതിനു പകരം നാനൂറു കോടി പിരിച്ചെടുക്കാനുള്ള താങ്കളുടെ ശേഷി ഇനിയെങ്കിലും ഇത്തരം മേഖലകളിലേക്ക്‌ തിരിച്ചു വിടണം. ഇത് പറയുമ്പോഴും ഏതെങ്കിലും മുക്കിലും മൂലയിലും നടത്തിയ സമൂഹ വിവാഹത്തിന്റെ ഫോട്ടോയും പൊക്കി തെളിവ് നിരത്താന്‍ വരുമെന്നറിയാം. അതൊക്കെയും നല്ലതെന്ന് സമ്മതിക്കുമ്പോഴും പണക്കാരനെ വീണ്ടും പണക്കാരനാക്കുന്ന പ്രോജക്ടകളുമായി വീണ്ടും രംഗത്തിറങ്ങിയതിനു ന്യായീകരണമാവില്ല. നിര്‍മാണ - പുനരധിവാസ മേഖലകളില്‍ ക്രിയാത്മകമായി വിനിയോഗിക്കപ്പെടെണ്ട കോടികള്‍, ഇസ്‌ലാമില്‍ കേട്ടുകേള്‍വിയില്ലാത്ത മുടിപ്പള്ളി പണിത് ധൂര്‍ത്തടിക്കുന്നതിനെ എതിര്‍ക്കുന്നവര്‍ക്കുള്ള മറുപടിയുമാവില്ല. വിമര്‍ശനങ്ങള്‍ ന്യായമെന്ന് കണ്ടാല്‍ തെറ്റ് തിരുത്തുന്നത് ഭീരുത്വമല്ല; ആര്‍ജവമാണ്. ശഅറേ മുബാറക്കെന്ന പേരു മാറ്റി മസ്ജിദുല്‍ ആസാര്‍ എന്നാക്കിയാല്‍ തീരുന്നതല്ല പ്രശ്നം. ഈയൊരു മാറ്റം കൊണ്ട് നിങ്ങള്‍ക്കിടയിലെ അഭിപ്രായ ഭിന്നത മാറിയേക്കാം. അപ്പോഴും വ്യാജമുടിക്ക് ആര്‍ഭാട പള്ളി നിര്‍മിച്ചവനെന്ന അപഖ്യാതി താങ്കളുടെ ചരിത്ര പുസ്തകത്തില്‍ ബാക്കി കിടക്കും.

ഒപ്പം വായിക്കാവുന്നവ:
പള്ളിയല്ല ഉസ്താദേ, പള്ളയാണ് പ്രശ്നം
തിരുമുടിയാട്ടം: രണ്ടാം ഖണ്ഡം
തിരുമുടിക്കെട്ടിന്റെ തിരുനിഴല്‍ ദര്‍ശനം
ഹുദവി തേടിയ സനദും കാന്തപുരത്തിന്റെ അടവും
നുണപ്പള്ളിയുടെ അവസാനത്തെ ആണി
മുടിവാദത്തിന്റെ പരിണാമ വഴികള്‍

മുണ്ടുരിയപ്പെട്ട സമുദായവും മിണ്ടാട്ടം മുട്ടിയ സമുദായപാര്‍ട്ടിയും

2012-01-17T19:16:00.000+03:00

'ഞങ്ങടെ പോലീസ്‌ ഞങ്ങളെ തല്ലിയാല്‍ നിങ്ങള്‍ക്കെന്താ കോങ്കറസേ'യെന്ന പഴയ മുദ്രാവാക്യത്തിന് 'ഞമ്മളെ മെയില് ഞമ്മള് ചോര്‍ത്ത്യാ ഇങ്ങക്കെന്താ മാര്‍ക്കിസ്റ്റേ'യെന്ന പരിണാമം രൂപപ്പെട്ടു വരുന്നുവെന്നാണ് മാധ്യമം വാരിക പുറത്തു വിട്ട മെയില്‍ ചോര്‍ത്തല്‍ സംഭവത്തിന്‍റെ ഭാഗമായി വരുന്ന ചില പ്രതികരണങ്ങള്‍ സൂചിപ്പിക്കുന്നത്. മുസ്ലിം പ്രമുഖരടക്കമുള്ള 258 പേരുടെ ഈ മെയില്‍ വിലാസങ്ങള്‍ പോലീസ്‌ നിരീക്ഷിക്കുന്നുവെന്നും ലോഗിന്‍ വിവരങ്ങള്‍ പോലും ശേഖരിച്ചുവെന്നുമുള്ള വെളിപ്പെടുത്തല്‍ കേരളീയ പൊതുസമൂഹത്തില്‍ വലിയ ഞെട്ടലുകള്‍ ഉളവാക്കിയെങ്കിലും, മുഖ്യധാരാ മാധ്യമങ്ങളോ ഈ സംഭവത്തിന്റെ ഇരകളായ മുസ്ലിംകളുടെ അഭിമാനത്തിന്റെ അടിയാധാരം കൈവശപ്പെടുത്തിയ മതസംഘടനകളോ ഞെട്ടുക പോയിട്ട് ഒന്ന് ഇമ വെട്ടുക പോലും ചെയ്യാതെ മസില് പിടിച്ചിരിക്കുന്ന കാഴ്ചയാണ് കേരള പോലീസിന്റെ ഈ ഉടുമുണ്ട് പൊക്കലിനേക്കാള്‍ അശ്ലീലമായി അനുഭവപ്പെടുന്നത്.

വാര്‍ത്ത പുറത്തു വന്ന നിമിഷം തന്നെ പ്രതികരണത്തിന്റെ ഹോര്‍മോണ്‍ നശിച്ചുപോകാത്ത കുറച്ചു സംഘടനകളും, സോഷ്യല്‍ നെറ്റ് വര്‍ക്ക്‌ സൈറ്റുകളിലൂടെ കുറെ വ്യക്തികളും പ്രതിഷേധവുമായി രംഗത്തെത്തിയെന്നത്‌ സത്യം. മുമ്പ്‌ ലൌ ജിഹാദില്‍ കുരുങ്ങി വിവാദ പ്രസ്താവന നടത്തിയ വീ എസെടക്കം പ്രതിഷേധം രേഖപ്പെടുത്തി കഴിഞ്ഞു. പ്രശ്നത്തില്‍ പൊതുസമൂഹത്തിന്റെ പള്‍സ് തൊട്ടറിയാന്‍ വാര്‍ത്തയുമായി ബന്ധപ്പെട്ട്‌ ഫേസ്ബുക്കില്‍ നടക്കുന്ന ചര്‍ച്ചകള്‍ മാത്രം ശ്രദ്ധിച്ചാല്‍ മതി. വിഷയത്തിന്‍റെ ഗൗരവം ഉള്‍ക്കൊണ്ട ഒരേയൊരു ദൃശ്യമാധ്യമം ഇന്ത്യാവിഷനാണ്. അവരുടെ ഫേസ്‌ബുക്ക്‌ പേജിലടക്കം അര്‍ഹമായ പ്രാധ്യാന്യത്തോടെ വിഷയാധിഷ്ടിത പ്രതികരണങ്ങള്‍ വന്നു കൊണ്ടിരിക്കുന്നുമുണ്ട്. സമസ്തയ്ക്കും മുജാഹിദുകള്‍ക്കും നമസ്കാരത്തിനും നോമ്പിനുമപ്പുറമുള്ളതെല്ലാം 'ഇഹലോക'കാര്യങ്ങളായാതിനാല്‍ അവരീ വിവാദത്തില്‍ കക്ഷി ചേര്‍ന്നു കൊള്ളണമെന്നില്ല. എന്നാലിവിടെ മറ്റൊരു കൂട്ടരുണ്ടല്ലോ, സമുദായ പാര്‍ട്ടിക്കാര്‍. അവരുടെ ഒരു ലോകസഭാംഗമടക്കം നിരവധി ലീഗ് നേതാക്കളുടെയും പ്രവര്‍ത്തകരുടേയും ഈ-മെയിലുകള്‍ നിരീക്ഷണ വിധേയമാക്കി കൊണ്ടിരിക്കുന്നുവെന്ന് കേട്ടപ്പോഴെങ്കിലും ഒന്ന് ഞെട്ടേണ്ടേ? അല്ലെങ്കില്‍ ഞെട്ടിയെന്ന് വരുത്തേണ്ടേ? എവിടെ! കോഴിക്കോട്ടെ ലീഗ് ഹൗസ്‌ തന്നെ ജപ്തി ചെയ്തു കൊണ്ടു പോയാലും ആ കാന്റീന്‍ അവിടെ വെക്കണേയെന്ന മനോഭാവക്കാര്‍ക്ക് ഈമെയില്‍ ചോര്‍ത്തിയാലെന്ത്‌, ആ മെയില്‍ ചോര്‍ത്തിയാലെന്ത്‌!

അല്ലെങ്കിലും ഇവരെപ്പോഴാണ് സമുദായത്തോടൊപ്പം നിന്നിട്ടുള്ളത്? പണ്ട് പണ്ട് ഒരു ബാഫഖി തങ്ങളും സീഎച്ചും ജീവിച്ചിരുന്നുവെന്ന് കരുതി കുഞ്ഞാലിക്കുട്ടിയുടെ ആസനത്തില്‍ തഴമ്പ് കാണണമെന്നില്ലല്ലോ. കൃത്യമായി പറഞ്ഞാല്‍ ബാബരി മസ്ജിദ്‌ തകര്‍ച്ചക്ക്‌ ശേഷം ഹൈക്കമാണ്ടിന്റെ അടുക്കളയിലെ പൂച്ചക്കുട്ടിയായി കുണുങ്ങിക്കഴിയാനല്ലാതെ ഇവര്‍ക്ക് സാധിചിട്ടുണ്ടോ? ഉറങ്ങിക്കിടക്കുന്ന സിംഹമാവാന്‍ പോയിട്ട് ആണത്തമുള്ളൊരു കണ്ടന്‍ പൂച്ചയാവാന്‍ പോലും കഴിയാത്തവരില്‍ നിന്ന് കൂടുതല്‍ പ്രതീക്ഷിക്കുന്നതാണ് തെറ്റ്! കോണ്‍ഗ്രസ്സിനോടുള്ള വിധേയത്വമോ അധികാരത്തോടുള്ള അടങ്ങാത്ത ആര്‍ത്തിയോ കാരണം സ്വന്തം വോട്ടു ബാങ്കിനോടുള്ള കടപ്പാട് പോലും ഇക്കൂട്ടര്‍ പലപ്പോഴും മറന്നു കളഞ്ഞുവന്നതാണ് സത്യം.

ബാബരി മസ്ജിദിന്‍റെ പേര് പറയുമ്പോഴേക്കും 'കേരളത്തെ വര്‍ഗീയ കലാപങ്ങളില്‍ നിന്നും രക്ഷിച്ചെടുത്ത' കള്ളക്കഥ പറഞ്ഞു തടി തപ്പാനാവും ലീഗുകാരുടെ എപ്പോഴുമുള്ള ശ്രമം. അമിതമായ വ്യക്തി സമ്മര്‍ദങ്ങള്‍ക്ക് പലപ്പോഴും അടിയറവ് പറയേണ്ടി വന്നെങ്കിലും കേരള പൊതുസമൂഹത്തിന്റെ മൊത്തത്തിലുള്ള ആദരവ് പിടിച്ചു പറ്റിയ നേതാവ് തന്നെയായിരുന്നു ശിഹാബ്‌ തങ്ങള്‍. പക്ഷെ, ബാബരി തകര്‍ച്ചയുടെ കാലത്ത് കേരളത്തിലൊരു ബോംബെ ആവര്‍ത്തിക്കാതെ പോയത്‌ ശിഹാബ് തങ്ങളുടെ ആഹ്വാനം കൊണ്ടാണെന്ന് പ്രചരിപ്പിക്കുന്നവര്‍ കേരള മുസ്ലികളില്‍ ബോധപൂര്‍വം അടിച്ചേല്‍പ്പിക്കുന്ന ആരോപണം ഇവരൊക്കെയും തൊണ്ണൂറ്റി രണ്ടു ഡിസംബര്‍ ആറു മുതല്‍ കണ്ണില്‍ കണ്ട ഹിന്ദു സഹോദരന്മാരെ മുഴുവന്‍ ചുട്ടു ചാമ്പലക്കാന്‍ നില്‍ക്കുന്നവരാണെന്നത് തന്നെയാണ്. അക്രമണോത്സുകരായി നില്‍ക്കുന്നവരോടല്ലാതെ സമാധാനത്തിന് ആഹ്വാനം ചെയ്യേണ്ടതില്ലല്ലോ! എന്നാല്‍ സത്യമെന്തായിരുന്നു? കാസര്‍ഗോട് മുതല്‍ തിരുവനന്തപുരം വരെ എവിടെയെങ്കിലും വല്ല അക്രമ പ്രവര്‍ത്തങ്ങളും അരങ്ങേറിയിരുന്നുവെങ്കില്‍ തന്നെ അതിലെ ഒരു കക്ഷി ലീഗുകാര്‍ മാത്രമായിരുന്നു. അവരൊക്കെയും ശിഹാബ്‌ തങ്ങളുടെ പ്രസ്താവന കേട്ട് ആയുധം താഴെ വെച്ചിട്ടുമുണ്ടാവാം. അല്ലാതെ കേരളത്തിലെ ബഹുഭൂരിപക്ഷം മുസ്‌ലിംകളും ആത്മസംയമനം പാലിച്ചത് കേരളീയ സംസ്കാരത്തില്‍ നിന്നും അവര്‍ ആര്‍ജിച്ചെടുത്ത സഹിഷ്ണുതയുടെ പാഠങ്ങള്‍ ഒന്നുകൊണ്ടു മാത്രമായിരുന്നു.

ഈ പ്രചാരണം, കേരള മുസ്‌ലിം പുരോഗതിയുടെ കാരണം മുസ്‌ലിം ലീഗാണെന്ന മറ്റൊരു കള്ളപ്രചരണത്തിന്‍റെ രണ്ടാം ഭാഗമാണെന്നതാണ് യാഥാര്‍ത്ഥ്യം. കേരളത്തിന്‌ പുറത്തു ജന്മം കൊണ്ട്, ഞാന്‍ നേരത്തെ പറഞ്ഞ ഉത്കൃഷ്ടമായ കേരളീയ സാംസ്കാരിക ഭൂമികയുടെ പ്രകൃതം കൊണ്ട് പച്ച പിടിക്കാന്‍ കഴിഞ്ഞ, ആശയപരമായ അപചയത്താല്‍ മലബാറില്‍ മാത്രം ഒതുക്കപ്പെട്ട സ്വന്തം ചരിത്രത്തെ കളവു കൊണ്ട് വ്യഭിചരിക്കുകയാണ് ഇവര്‍ ചെയ്യുന്നത്. മത്തു പിടിച്ച അധികാരക്കണ്ണുകള്‍ സ്വന്തം പാളയത്തിലുള്ളവരുടെ തെറ്റുകള്‍ ശരിയായി മാത്രമേ കാണൂവെന്നത് ഇന്നുവരെയുള്ള മനുഷ്യചരിത്രം തന്നെയാണ്. മുസ്‌ലിംകളെ പ്രതിക്കൂട്ടില്‍ നിര്‍ത്തി വ്യാജ ഏറ്റുമുട്ടലുകളും സ്ഫോടനങ്ങളും അനേകം നടക്കുമ്പോഴും കോണ്‍ഗ്രസ്സിനെ പിണക്കാന്‍ ഇവര്‍ ഒരുക്കമായിരുന്നില്ല. അപവാദമായി കണ്ടത്‌ ബട്ട്‌ല വ്യാജ ഏറ്റുമുട്ടലില്‍ മുനീര്‍ നടത്തിയ പ്രതികരണം മാത്രമാണ്. അതില്‍ പോലും ഒരു പ്രതിഷേധ പരിപാടിയില്‍ പങ്കെടുത്തുവെന്നതിനപ്പുറം ഒരു സമ്മര്‍ദ ശക്തിയായി ന്യായം നേടിയെടുക്കാന്‍ ഇവര്‍ക്ക്‌ കഴിഞ്ഞിട്ടുമില്ല. മറ്റു സംഭവങ്ങളിലൊക്കെയും വേട്ടക്കാരനോപ്പം കുതിക്കുകയും ഇരയോടൊപ്പം കിതക്കുകയും ചെയ്യുന്ന അപഹാസ്യമായ സമീപനമാണ് ഇവരില്‍ നമുക്ക്‌ ദര്‍ശിക്കാനാവുന്നത്. പരിവാര ഫാഷിസ്റ്റുകള്‍ ഭീ എന്ന് പറയുമ്പോഴേക്കും ഭീകരനെന്ന് ഏറ്റുവിളിക്കാന്‍ ഷാജി - മുനീര്‍ കൂട്ടുകെട്ട് നടത്തിയ മത്സരത്തിന്റെ ഫലം തന്നെയാണ് ലൌ ജിഹാദും ഈ-മെയില്‍ നിരീക്ഷണവുമൊക്കെയെന്നു പറയാതെ വയ്യ.

ഇടതുപക്ഷം അധികാരത്തിലിരിക്കുമ്പോള്‍ സമുദായത്തിന്‍റെ അക്കൗണ്ടില്‍ അധ്യാപക കൊലപാതകം വരെ ചെയ്തവര്‍, സ്വന്തം നേതാക്കളെ വരെ ഭീകര ലിസ്റ്റില്‍ ഉള്‍പ്പെടുത്തി പീഡിപ്പിക്കുന്നത് കണ്ടിട്ടും മിണ്ടാതിരിക്കുന്നത് അധികാര ലഹരിയില്‍ ആറാടുന്നത് കൊണ്ടല്ലാതെ മറ്റെന്താണ്! പ്രതിപക്ഷത്തു നില്‍ക്കുമ്പോള്‍ കിട്ടുന്ന കച്ചിത്തുരുമ്പ് പോലും സമുദായവല്ക്കരിച്ച് കമ്പക്കയരാക്കി മാറ്റിയവരുടെ നാവിറങ്ങിപ്പോവുന്നത് എന്തുകൊണ്ടാണ്? അമേരിക്കക്ക് കേരളീയ മുസ്‌ലിം 'തീവ്രവാദികളുടെ' ഇല്ലാക്കഥകള്‍ പാടിക്കൊടുത്ത മുനീര്‍ സാഹിബിന് ഈ-മെയില്‍ ചോര്‍ത്തലിന്റെ ഉത്തരവാദിത്തത്തില്‍ നിന്നും ഒഴിഞ്ഞു മാറാന്‍ കഴിയുമോ? ഫാഷിസ്റ്റ്‌ - മീഡിയകള്‍ക്ക് മുഴുപ്പേജ് വാര്‍ത്തകള്‍ വിളമ്പുമ്പോള്‍ ഷാജി ഓര്‍ത്തിരുന്നോ സ്വന്തം പാര്‍ട്ടിക്കാരെ തേടിയും ചെന്നായിക്കൂട്ടം വരുമെന്ന്? ഇല്ലായെങ്കില്‍ ഇനിയെങ്കിലും ചിന്തിക്കണം. വ്യാജ പ്രചരണങ്ങളില്‍ കുടുങ്ങി മരവിച്ചു പോയ ഒരു സമുദായത്തിന്റെ ഗദ്ഗദം കേള്‍ക്കണം. ലോക ഭീകരന്‍ ഇസ്രായേലിന് കിടക്ക വിരിക്കുന്ന മന്മോഹന്റെ കൈക്ക് പിടിക്കണം. പ്രവര്‍ത്തക സമ്മര്‍ദം സഹിക്കവയ്യാതെ നാളെയോ മറ്റന്നാളോ ലീഗ് ഹൗസില്‍ യോഗം ചേര്‍ന്നാല്‍ ഏശാതെ പോയ ലൌ ജിഹാദും ഇസ്രായേലിന്റെ എംബസി തുറക്കലും ഈ മെയില്‍ മോഷണവുമൊക്കെയൊന്നു ചര്‍ച്ചിക്കണം. ഒടുവില്‍ തീരുമാനം 'തങ്ങള്‍ക്ക് വിടാതെ' ഈ ഭീകരാക്രമണത്തിന് ഉത്തരവാദികളായവരെ ചെവിക്കു പിടിച്ച് പുറത്തു കൊണ്ടു വരണം. അല്ലെങ്കില്‍ നാളെ പാര്‍ട്ടി ആപ്പീസിന്റെ കാന്റീനടക്കം ഇവന്മാര്‍ ജപ്തി ചെയ്തു പോവും!

ദര്‍ശന: മാറ്റത്തിന്റെ കാഴ്ചയും കാഴ്ചപ്പാടും

2012-01-03T15:11:00.002+03:00

പണ്ട് സ്കൂള്‍ പഠന കാലത്ത് ഒരു വിദ്യാര്‍ഥി സംഘടനയുടെ സംസ്ഥാന സമ്മേളന പ്രചരണാര്‍ത്ഥം എന്റെ പ്രദേശത്ത് വന്ന തെരുവ് നാടക സംഘത്തിന് സ്വീകരണമൊരുക്കിയത്തിന് മദ്രസയിലെ മുസല്യാര്‍ ശകാരിച്ചത് അങ്ങാടിയില്‍ വെച്ച് തന്നെയായിരുന്നു. ഇസ്ലാമിന് നിരക്കാത്ത കാര്യത്തിന് കൂട്ടുനിന്നവനെന്നായിരുന്നു എനിക്കു നല്‍കിയ വിശേഷണം! കാലങ്ങള്‍ക്കിപ്പുറം നാടകവും മുസല്യാരും ശകാരവുമൊക്കെ ഓര്‍മിച്ചെടുത്തത്‌ സുന്നീ യാഥാസ്തിക വിഭാഗം നിയന്ത്രിക്കുന്ന ദര്‍ശന ചാനലിലെ പ്രോഗ്രാമുകളുടെ പ്രോമോ കണ്ടപ്പോഴാണ്. സീരിയലും മെഗാസീരിയലും ആധുനിക സംഗീതോപകരണങ്ങളുടെ അകമ്പടിയോടെയുള്ള സംഗീത പരിപാടികളുമൊക്കെ മുസ്ലിം യാഥാസ്തികരെന്നു വിശേഷിപ്പിക്കപ്പെടാറുള്ള ഒരു കൂട്ടരുടെ ഭാഗത്ത്‌ നിന്നും അവതരിപ്പിക്കപ്പെടുന്നുവെന്നത് അത്ഭുതകരവും അതിലേറെ പ്രോത്സാഹനജനകവുമായ അനുഭവമാണ്.

മുസ്ലിം ജനവിഭാഗത്തില്‍ പാരമ്പര്യവാദത്തിന്റെ കടുംപിടുത്തത്താല്‍ കലയേയും സംഗീതത്തെയും ആധുനിക മാധ്യമങ്ങളെയും നിഷിദ്ധമാക്കി നിലനിന്നു പോന്ന സമൂഹമാണ് സുന്നികളും മുജാഹിദുകളും. നവോഥാന ഇസ്ലാമിക പ്രസ്ഥാനങ്ങളില്‍ ജമാഅത്തെ ഇസ്ലാമി മാത്രമാണ് ഈ മാധ്യമങ്ങളെ ഇത്രയും കാലം ചെറുതായെങ്കിലും ക്രിയാത്മകമായി ഉപയോഗിച്ചു പോന്നിട്ടുള്ളത്. എന്നാല്‍, അവര്‍ പോലും ചാനല്‍ രംഗത്ത്‌ സജീവമാകും മുമ്പ്‌ പിന്തിരിപ്പന്മാരെന്നു അപഹസിക്കപ്പെട്ട ഒരു വിഭാഗം ഉജ്വലമായ ഇച്ഛാശക്തിയോടെ ഇങ്ങനെയൊരു സംരംഭവുമായി ഇറങ്ങിത്തിരിച്ചുവെന്നത് കേരള മുസ്ലിം നവോഥാന ചരിത്രത്തില്‍ തങ്കലിപികളാല്‍ രേഖപ്പെടുത്തപ്പെടുമെന്നതില്‍ സംശയമില്ല. സുന്നികളിലെ മറ്റൊരു പ്രബലവിഭാഗത്തിന്റെ നിശിതമായ വിമര്‍ശനങ്ങളെ തൃണവല്‍ക്കരിച്ച്, സ്വന്തം പാളയത്തിലെ വിമര്‍ശകരെ പോലും തന്ത്രപൂര്‍വം അനുനയിപ്പിച്ച് ഏറ്റെടുത്ത ദൌത്യം ഇക്കഴിഞ്ഞ പുതുവര്‍ഷസായാഹ്നത്തില്‍ യാഥാര്‍ത്യമാക്കുവാന്‍ ഈ യുവസമൂഹം കാണിച്ച നിശ്ചയദാര്ഢ്യത്തെ പ്രകീര്‍ത്തിക്കാതെ വയ്യ. പ്രൊഫഷണലിസത്തിന്റെ സര്‍വസന്നാഹങ്ങളും കൈയ്യിലുണ്ടായിരുന്നിട്ടും കാലത്തോടൊപ്പം മാറാതെ പോയ കടുംപിടുത്തങ്ങളില്‍ പെട്ട് മുടിയും മുടിവെള്ളവും മുടിപ്പള്ളിയുമായി പൗരോഹിത്യ സിംഹാസനത്തില്‍ മയങ്ങിക്കിടന്നവരെ മലര്‍ത്തിയടിച്ച് പിമ്പേ ഇഴഞ്ഞവര്‍ ജയിച്ചു കയറുന്ന കാഴ്ചയുടെ പേരാണ് ദര്‍ശനാ ചാനല്‍.

സ്ത്രീകളുടെ കൈയ്യെഴുത്ത്, ഇംഗ്ലീഷ്‌ ഭാഷാ പഠനം തുടങ്ങിയ 'നിഷിദ്ധങ്ങളെ' ഹലാലാക്കാന്‍ സുന്നീ സമൂഹം വര്‍ഷങ്ങളെടുത്തുവെങ്കിലും പ്രസ്തുത മേഖലകളില്‍ വ്യക്തമായ കുതിച്ചു ചാട്ടം നടത്താന്‍ അവര്‍ക്ക് ചെറിയ കാലഘട്ടമേ വേണ്ടി വന്നുള്ളൂ. അപ്പോഴും ചിത്രരചന, അഭിനയം, സ്ത്രീകളുടെ പൊതുരംഗ പ്രവേശം, സംഗീതം തുടങ്ങിയ മേഖലകളില്‍ മതപരമായ കടുംപിടുത്തം തുടര്‍ന്നിരുന്നു. നവോഥാന വിഭാഗങ്ങളുമായി വേദി പങ്കിട്ടുവെന്ന് ആരോപണമുയര്‍ത്തി സുന്നീ ആധികാരിക സംഘടന വിട്ടു പോയ കാന്തപുരം മുസല്യാര്‍ നേതൃത്വം നല്‍കുന്ന വിഭാഗമാണ് ഈ രംഗങ്ങളില്‍ കൂടുതല്‍ കാര്‍ക്കശ്യം പുലര്‍ത്തി വന്നത്. മുസ്ലിം ലീഗിലൂടെ സ്ത്രീജന പൊതുരംഗ മേഖലയിലും സത്യധാര ക്രിയേഷനിലൂടെ അഭിനയ - സംഗീത മേഖലയിലും വളരെ മുമ്പേ തന്നെ സമസ്ത ഈ കെ വിഭാഗം നിലപാട് മാറ്റത്തിന്റെ കൃത്യമായ സൂചനകള്‍ നല്‍കിയിരുന്നു. എങ്കില്‍ പോലും പ്രശസ്ത സിനിമാ - സീരിയല്‍ നടീനടന്മാരെ തന്നെ ഉള്‍പ്പെടുത്തിയുള്ള മെഗാ സീരിയലുകളും സിനിമാ - മാപ്പിള ഗാനങ്ങള്‍ ഉള്‍പ്പെടുത്തിയുള്ള സംഗീത പരിപാടികളുമൊക്കെയായി ദര്‍ശന സംപ്രേക്ഷണം ആരംഭിക്കുമ്പോള്‍ ഇത്രയ്ക്ക് ആധുനികരാവാണോയെന്നു ചിന്തിക്കുന്ന വലിയൊരു വിഭാഗവും അവരില്‍ തന്നെയുണ്ടെന്നതാണ് വാസ്തവം. ആ വിഭാഗത്തെ കൂടി ചിന്താപരമായ പുരോഗതിയുടെ പാതയില്‍ കൂടെ നടത്തുകയെന്ന ശ്രമകരമായ ദൗത്യമാണ് ദര്‍ശനയുടെ പിന്നണി പ്രവര്‍ത്തകര്‍ക്ക് വിജയിപ്പിച്ചെടുക്കാനുള്ളത്.

വിമര്‍ശങ്ങള്‍ ഇഴകീറി പരിശോധിക്കെപ്പെടേണ്ട വിധം ഗൌരവകരമാണെന്ന് വരുത്തി തീര്‍ക്കാന്‍ ചിലര്‍ ശ്രമിക്കുന്നുണ്ടെങ്കിലും പ്രാഥമിക പരിശോധനയില്‍ തന്നെ അവയുടെ യുക്തിരാഹിത്യം ആര്‍ക്കും ബോധ്യപ്പെടുന്നതാണ്. മ്യൂസിക്കും സ്ത്രീ ശബ്ദവും നിഷിദ്ധമാക്കിയവര്‍ തന്നെയായിരുന്നു കേരളത്തില്‍ ഇന്നോളമിറങ്ങിയ മാപ്പിളപ്പാട്ടുകളുടെ ആസ്വാദകരും പ്രോല്സാഹകരും എന്ന വസ്തുത ഇത്തരുണത്തില്‍ വിസ്മരിച്ചു കൂടാ. ഫാത്തിമയും ഹാജറയും ചരിത്രത്തെ വികലമാക്കി ഒപ്പന ചുവടുമായി ടെലിവിഷന്‍ സ്ക്രീനില്‍ വന്നപ്പോള്‍ ഇരുകൈയ്യും നീട്ടി സ്വീകരിച്ചതും ഇതേ ആളുകള്‍ തന്നെയായിരുന്നു. അഥവാ, അനിസ്ലാമികമെന്നു ഫത് വ നല്‍കാന്‍ മാത്രം അബദ്ധജടിലമായ ആശയങ്ങളും ആവിഷ്കാരങ്ങളും ആസ്വാദനത്തിന്റെ പേര് പറഞ്ഞ് നെഞ്ചേറ്റിയവര്‍ പക്ഷെ, പുരോഗമന ഇസ്മിലാക പ്രവര്‍ത്തകര്‍ അണിയിച്ചൊരുക്കിയ അതിര് ലംഘിക്കാത്ത സംഗീതോപകരണ അകമ്പടിയോടെ സംവിധാനിക്കപ്പെട്ട ഗാനങ്ങളും, അതിരടയാളങ്ങള്‍ പരമാവധി പാലിക്കപ്പെട്ട നാടകങ്ങളും ടെലി സിനിമകളും നിഷിദ്ധമെന്ന് മുദ്രകുത്തി പടിയടച്ച് പിണ്ഡം വെക്കാന്‍ മത്സരിക്കുകയായിരുന്നു. അതിരില്ലാത്ത ആസ്വാദനത്തിന് ധാര്‍മികതയുടെ അതിരുകള്‍ നിശ്ചയിച്ച് ബദലുകള്‍ സൃഷ്ടിക്കുകയാണ് യഥാര്‍ത്ഥത്തില്‍ കലയിലും ദൃശ്യ മാധ്യമങ്ങളിലും ഇടപെടുന്നതോടെ മത സംഘടനകള്‍ ചെയ്യുന്നതെന്ന യാഥാര്‍ത്ഥ്യമാണ് ഇവിടെ വിമര്‍ശകര്‍ മനസ്സിലാക്കേണ്ടത്‌.

ദഫും കോല്‍ക്കളിയും കുത്ത് റാത്തീബും മാത്രം മാപ്പിളമാരുടെ ഹലാലാക്കപ്പെട്ട കലാരൂപങ്ങളായി കൊട്ടിഘോഷിക്കപ്പെടണമെന്ന നിര്‍ബന്ധബുദ്ധിക്കാര്‍ തെരുവ് - എല്‍സിഡി പാതിരാ പ്രഭാഷങ്ങളില്‍ നവോഥാന പ്രസ്ഥാനങ്ങളെ അപഹസിച്ചും പരിഹസിച്ചും മുന്നേറിയത് ചരിത്രമാണ്. ഒരുകാലത്ത് ജീവികളുടെ ചിത്രം വരയെ പോലും എതിര്‍ത്തവര്‍ പിന്നീട് സ്വന്തമായിറക്കിയ കുട്ടികളുടെ മാസികകളില്‍ രാജുവിനും രാധയ്ക്കും തട്ടവും തൊപ്പിയും അണിയിച്ച് പേര് മാറ്റി മതത്തില്‍ ചേര്‍ക്കുന്ന വിരോധാഭാസവും ഇതിനിടയില്‍ അരങ്ങേറി. ഫോട്ടോ പോലും ഹറാമാക്കിയവര്‍ക്ക് നാല് ക്യാമറകളും രണ്ട് എല്‍സിഡി സ്ക്രീനുകളുമില്ലാതെ പ്രഭാഷണം നടത്താന്‍ വയ്യെന്നായി. ഒടുവില്‍ കാലത്തിന്റെ വിളിക്ക് ഉത്തരമേകി അവരില്‍ നിന്ന് തന്നെ 'കുഞ്ഞായിന്‍ മുസല്യാരും മങ്ങാട്ടച്ചനും' മിനി സ്ക്രീനേറി. കഥാപ്രസംഗ വേദിയില്‍ 'കര്‍ബലയിലെ രക്തക്കളം' അവതരിപ്പിച്ചാല്‍ 'റംലാ ബീഗത്തിന്റെ രക്തക്കളം' ഉണ്ടാവുമെന്ന പഴയ ഭീഷണി അവര്‍ ഓര്‍ത്തെടുക്കുന്നത് ഇതേ ചാനലിലൂടെ കേരളം കാണുക കൂടി ചെയ്തപ്പോള്‍ പരിണാമം പൂര്‍ണമായി!

ദര്‍ശന ചാനലിലെ പരിപാടികളില്‍ വ്യത്യസ്തതയുണ്ട്. എങ്കിലും 'കാഴ്ചയുടെ സുകൃത'മെന്ന ടൈറ്റിലിനോട് നീതി പുലര്‍ത്തണമെങ്കില്‍ ഇതിന്റെ പിന്നണിയിലുള്ളവര്‍ ഇനിയും ഏറെ ശ്രദ്ധിക്കേണ്ടിയിരിക്കുന്നു. നിങ്ങളീ നടത്തിയ വിപ്ലവം തുല്യതയില്ലാത്തതാണ്. നേരത്തെ പറഞ്ഞ പോലെ കഥാപാത്രങ്ങളെ മതം മാറ്റിയത് കൊണ്ടോ ഇടയ്ക്ക് ഈണത്തില്‍ ഖുര്‍ആന്‍ പാരായണം ചെയ്തത് കൊണ്ടോ മാത്രം കാഴ്ച സുകൃതമാവില്ല. കേവലം എന്റര്‍ടൈംമെന്‍റ് എന്നതിനപ്പുറം സമൂഹത്തിലെ അന്ധവിശ്വാസ - അനാചാരങ്ങള്‍ക്ക് നേരെ പോരാട്ടം നടത്താന്‍ ഈ ചാനല്‍ ഉപയോഗപ്പെടുത്തണം. ഇതിന്റെ കാഴ്ചക്കാര്‍ ഭൂരിപക്ഷവും യാഥാസ്തിക വിഭാഗക്കാര്‍ ആയിരിക്കെ വിശേഷിച്ചും. അല്ലാതെ അന്ധവിശ്വാസങ്ങളെ പൊലിപ്പിച്ചെടുത്ത് കാശുണ്ടാക്കുന്ന 'വിശ്വസിച്ചാലും ഇല്ലെങ്കിലും' പരമ്പരക്ക് അനുകരണമുണ്ടാക്കുകയാണ് ഇതിന്റെ ദൌത്യമെങ്കില്‍ ബാക്കിആളുകള്‍ കൂടി മുടി വെള്ളവും പേറി കേരളയാത്ര നടത്തുകയാവും ഫലം.

ധാര്‍മിക ബോധമുള്ള വ്യക്തികളും പ്രസ്ഥാനങ്ങളും ആധുനിക മാധ്യമങ്ങളെ ധാര്‍മികമായി ഉപയോഗപ്പെടുത്താന്‍ തയ്യാറായാല്‍ അനുദിനം ദുഷിച്ചു കൊണ്ടിരിക്കുന്ന സമൂഹത്തിന് ചെയ്യുന്ന വലിയൊരു സേവനമാകുമത്. കമ്പോളവല്ക്കരിക്കപ്പെടുന്ന കാഴ്ചയ്ക്ക്, അശ്ലീലവല്‍ക്കരിക്കപ്പെടുന്ന കലാരൂപങ്ങള്‍ക്ക് നന്മയുടെ, നേരിന്റെ ഭാഷ്യം ചമയ്ക്കാന്‍ ഇത്തരം ദൗത്യങ്ങള്‍ക്ക് സാധിക്കും. പുതുവര്‍ഷത്തില്‍ തുടക്കം കുറിച്ച ദര്‍ശനക്കും വരാന്‍ പോകുന്ന മാധ്യമം പത്രത്തിന്റെ മീഡിയാവണിനും ഇത്തരമൊരു മാറ്റം സാധ്യമാവട്ടെയെന്ന് ആത്മാര്‍ഥമായി ആശംസിക്കുന്നു.

ഒപ്പം വായിക്കാവുന്നവ:

ഓജോ വിപ്ലവം വിജയിക്കട്ടെ

അമ്പ് തറച്ച ഹൃദയങ്ങള്‍ തൂങ്ങിയാടുമ്പോള്‍

മറ്റൊരു മുല്ലപ്പെരിയാര്‍ പൊട്ടാനൊരുങ്ങുന്നുണ്ട്

2011-12-31T12:27:00.000+03:00

തടഞ്ഞു നിര്‍ത്തിയ വലിയൊരു വെള്ളക്കെട്ട് ഏതു നിമിഷവും സംഭവിച്ചേക്കാവുന്ന ഭൂകമ്പത്തിന്റെ പ്രകമ്പനത്താല്‍ പൊട്ടിയൊലിച്ച് ഒരു ഒരു സംസ്ഥാനത്തിന്റെ വലിയൊരു പ്രദേശത്തെ തന്നെ ഇല്ലാതാക്കിയേക്കുമോ എന്ന ഭീതിയാണ് കേരളം മാസങ്ങളോളമായി പങ്കുവെച്ചുകൊണ്ടിരിക്കുന്നത്. വ്യക്തികളും സംഘടനകളും രാഷ്ട്രീയപാര്‍ട്ടികളും മാധ്യമങ്ങളുമെല്ലാം സജീവമായി തന്നെ ഭീകരമായ ഈ ഭീതി പരസ്പരം പറഞ്ഞും പങ്കുവെച്ചും അധികാരികളുടെ ശ്രദ്ധയില്‍ കൊണ്ടുവരാന്‍ ശ്രമിച്ചിട്ടുണ്ട്. പുതിയൊരു തടയിണ നിര്‍മിച്ച് കേരളത്തിന്‌ സുരക്ഷയും തമിഴ്നാടിന് വെള്ളവും നല്‍കാമെന്ന പരിഹാര നിര്‍ദേശം ആദ്യം മുന്നോട്ടു വെച്ചവര്‍ തന്നെ പുതിയ ഡാമിന്റെ നിര്‍മാണ ചെലവും കാലവിളംബവും ചൂണ്ടിക്കാട്ടി പുതിയ ബദല്‍ നിര്‍ദേശങ്ങളുമായി മുന്നോട്ടു വന്നിരിക്കുന്നുവെന്നതാണ് മുല്ലപ്പെരിയാര്‍ സംഭവങ്ങളുടെ പുതിയ വഴിത്തിരിവ്. എന്‍ഡോസര്ഫാന്‍ അടക്കമുള്ള വിഷയങ്ങളില്‍ കേരളം കണ്ടത് പോലെയുള്ള രാഷ്ട്രീയ കിടമത്സരമായി മുല്ലപ്പെരിയാര്‍ സമരവും രൂപ്പാന്തരപ്പെടുമ്പോള്‍, മന്ത്രിസഭയുടെ തന്നെ ഭാവി നിര്‍ണയിച്ചേക്കാവുന്ന പിറവം ഉപതെരഞ്ഞെടുപ്പ്‌ ലക്‌ഷ്യം വെച്ചാണ് കേരളത്തിലെ രാഷ്ട്രീയ പാര്‍ട്ടികള്‍ സമരത്തില്‍ സജീവമായതെന്ന പി ചിദംബരത്തിന്റെ വാക്കുകള്‍ സത്യമായിരുന്നുവെന്ന് വിശ്വസിക്കേണ്ടിയിരിക്കുന്നു. കാര്യമെന്തായാലും മുല്ലപ്പെരിയാറിന്റെ താഴ്വാരങ്ങളില്‍ ഭൂമാഫിയകള്‍ ചുളുവിലക്ക് ഭൂമികള്‍ വാങ്ങിക്കൂട്ടി ആളുകളിലെ ഭീതി മുതലെടുക്കാന്‍ ശ്രമം തുടങ്ങിയിരിക്കുന്നുവെന്നതാണ് അണപൊട്ടിയൊഴുകിയ സമരപ്രക്ഷോഭങ്ങളുടെ അനന്തരഫലം.

കാലം രണ്ടായിരത്തി പതിനൊന്നില്‍ നിന്ന് പന്ത്രണ്ടിലേക്ക് ചുവടു വെക്കുമ്പോള്‍ മുല്ലപ്പെരിയാര്‍ അണക്കെട്ടിനേക്കാള്‍ ദുര്‍ബലമായ, ചെറിയൊരു അപകടം പോലും താങ്ങാന്‍ ശേഷിയില്ലാത്ത മറ്റൊരു അണക്കെട്ട് പൊട്ടാനൊരുങ്ങിനില്‍ക്കുന്നത്‌ കാണാതെ പോവുന്നത് കാലങ്ങളോളം നമ്മെ ദു:ഖിപ്പിച്ചേക്കുമെന്ന് ഞാന്‍ ഭയക്കുന്നു. ഇവിടെ അണക്കെട്ടിന്റെ സ്ഥാനത്ത്‌ ഒരു മനുഷ്യനാണ്. ചോരയും നീരും വറ്റിപ്പോയ കരയാന്‍ കണ്ണുനീര്‍ പോലും ബാക്കിയില്ലാത്ത ഒരു പച്ചമനുഷ്യന്‍. വര്‍ഗീയ കോമരങ്ങള്‍ മുറിച്ചെടുത്ത ഒറ്റക്കാലുമായി അസാമാന്യ ദൈവവിശ്വാസത്തിന്റെ ബലത്തില്‍ മാത്രം ദിവസങ്ങള്‍ തള്ളി നീക്കുന്ന ആ മനുഷ്യന്റെ പേര് അബ്ദുള്‍നാസര്‍ മഅദനി എന്നാണ്. ഇന്ത്യന്‍ നീതിന്യായ വ്യവസ്ഥിതിയുടെ നാള്വഴികളില്‍ സംഭവിച്ച വലിയൊരു പുഴുക്കുത്തിന്റെ നേരടയാളമാണ് ആ മനുഷ്യന്‍. നിരപരാധിത്വത്തിന്റെ പത്തു വര്‍ഷങ്ങള്‍ ജയിലകങ്ങളില്‍ ജീവിച്ചു തീര്‍ക്കേണ്ടി വന്ന ഈ ഹതഭാഗ്യന്റെ അനുഭവങ്ങള്‍ കേരളമെന്നല്ല, ഇന്ത്യയുടെ തന്നെ സ്വൈര്യജീവിതത്തെ സാരമായി ബാധിക്കും വിധം ഒരു വിഭാഗം ജനമനസ്സുകളില്‍ അസ്വസ്ഥത പടര്‍ത്തികൊണ്ടിരിക്കുകയാണ്. വര്‍ഗീയവാദികള്‍ തകര്‍ത്തെറിഞ്ഞ ബാബരി മസ്ജിദ്‌ ഇന്ത്യന്‍ മതേതരത്വത്തിന്റെ ശുഭ്രവസ്ത്രത്തില്‍ എത്രമാത്രം അഴുക്ക് പുരട്ടിയോ അതിലുമേറെ ഭീകരമായിരിക്കും ഈയൊരു മനുഷ്യന് സംഭവിച്ചേക്കാവുന്ന ചെറിയൊരു പോറല്‍ പോലും.

സിമിയുടെയും ഇന്ത്യന്‍ മുജാഹിദിന്റെയും മൂടുപടമണിഞ്ഞു ഇന്ത്യയുടെ സമാധാന ജീവിതത്തില്‍ ഒരു പാട് സ്ഫോടനങ്ങള്‍ നടത്തി ഒടുവില്‍ മുഖം മൂടി വേര്‍പെട്ടു പോയ സംഘപരിവാര്‍ കൂട്ടങ്ങള്‍ നടത്തിയ ഗൂഡാലോചനയുടെ ഇരയാണ് മഅദനിയും. സത്യം തേടിപ്പോയ പത്രപ്രവര്‍ത്തകയെ പോലും ഭീകര മുദ്ര ചാര്‍ത്തി പീഡിപ്പിക്കാന്‍ തയ്യാറായവരുടെ തിരക്കഥയിലെ പാത്രനിര്‍മിതികള്‍ക്ക് ചൂട്ടു പിടിക്കാനല്ലാതെ മുഖ്യധാര മാധ്യമങ്ങളും രാഷ്ട്രീയ പാര്‍ട്ടികളും തയ്യാറാവുന്നില്ലെന്നത് ഇന്ത്യയുടെ നല്ല ഭാവി സ്വപ്നം കാണുന്നവരെ സങ്കടപ്പെടുത്താതിരിക്കുന്നതെങ്ങിനെ!

കേന്ദ്രമന്ത്രിസഭയില്‍ കുറെ മലയാളികളുണ്ടത്രേ! അവരില്‍ സമുദായത്തിന്റെ സ്വന്തം പ്രതിനിധി തന്നെയുണ്ടത്രേ! പക്ഷേ, അവര്‍ക്കൊന്നും മഅദനിയെ അറിയില്ല. ആലുവ കടപ്പുറത്ത്‌ കണ്ട പരിചയം പോലുമില്ല. കേരള രാഷ്ട്രീയ ചരിത്രത്തില്‍ ഈ ഒറ്റക്കാലന്റെ ഒളിഞ്ഞും തെളിഞ്ഞുമുള്ള സഹായം ഉളുപ്പില്ലാതെ തേടിയവര്‍ തന്നെയാണ് ഇക്കൂട്ടര്‍. അവരെ വിടാം. മറ്റൊരു കൂട്ടരുണ്ടല്ലോ, ആലുവയിലല്ല ശംഖുമുഖം കടപ്പുറത്ത്‌ വെച്ച് കെട്ടിപ്പിടിച്ചു ഉമ്മ ചൊരിഞ്ഞവര്‍. അവര്‍ക്കും മിണ്ടാട്ടമില്ല. ഒരു വീഎസുണ്ട്. മഅദനിയെ അറസ്റ്റു ചെയ്തു കൊണ്ട് പോകുമ്പോള്‍ നിസ്സഹായനായി നോക്കി നിന്നതിന്റെ പാപബോധത്താലോ മറ്റോ കര്‍ണാടക മുഖ്യമന്ത്രിക്ക് അദ്ദേഹമൊരു കത്തയച്ചിട്ടുമുണ്ട്. ഇതിനപ്പുറം കേരളത്തിലെ മുഖ്യധാര രാഷ്ട്രീയ പ്രസ്ഥാനങ്ങള്‍ ആ മനുഷ്യന് വേണ്ടി എന്താണ് ചെയ്തത്? നല്ല കാലത്ത് റേറ്റ്‌ വര്‍ധിപ്പിക്കാന്‍ അഭിമുഖങ്ങളും സ്പെഷ്യല്‍ സ്റ്റോറികളും വാരിവിതറിയ നമ്മുടെ മാധ്യമങ്ങളോ? അഡ്വ. സെബാസ്റ്റ്യന്‍പോളും കൂട്ടരും നടത്തുന്ന നിയമപരമായ പോരാട്ടം പോലും അവര്‍ വാര്‍ത്തയാക്കാറില്ല. ഈയാവശ്യത്തിനു ഏതെങ്കിലും പള്ളി മൂലയില്‍ വെച്ച് ആരെങ്കിലും നൂറു രൂപ നല്‍കിപ്പോയെങ്കില്‍ അനധികൃത പണപ്പിരിവിനെ കുറിച്ച് നാല് കോളം വാര്‍ത്തയെഴുതാനിവര്‍ മടിക്കാറുമില്ല.

കരിനാക്കിലൂടെ ഞാന്‍ ബ്ലോഗെഴുത്തിന്റെ നാലാം വര്‍ഷത്തിലേക്ക് കടക്കുമ്പോള്‍ എന്റെ പ്രിയ കൂട്ടുകാരോട് ഉണര്‍ത്താനുള്ളത് ഇത് മാത്രമാണ്; പല വിഷയങ്ങളും ഏറ്റെടുത്തു വ്യാപക പ്രചരണം നടത്തി ഉറക്കം നടിച്ച മുഖ്യധാരാ മാധ്യമങ്ങളെ 'അടിച്ചുണര്‍ത്തിയ' ബൂലോകത്തിന് ഈ വിഷയത്തിലും പലതും ചെയ്യാന്‍ കഴിയും. ആ മനുഷ്യന്‍ തെറ്റ് ചെയ്തെങ്കില്‍ ശിക്ഷിക്കപ്പെടട്ടെ. ഇല്ലെങ്കില്‍ നമ്മെ പോലെ കുടുംബവുമൊത്ത് ജീവിതത്തിന്റെ ശിഷ്ടകാലമെങ്കിലും ജീവിച്ചോട്ടെ. ഏറ്റവും ചുരുങ്ങിയത്‌ ജാമ്യമെങ്കിലും ലഭിക്കാനുള്ള സാമാന്യ അവകാശമെങ്കിലും അദ്ദേഹത്തിന് വകവെച്ചു കൊടുക്കാന്‍ വേണ്ടി മനുഷ്യാവകാശപ്രവര്‍ത്തകര്‍ നടത്തുന്ന പോരാട്ടങ്ങളില്‍ നമുക്കും കണ്ണി ചേരാം. വ്യാപകമായ ഓണ്‍ലൈന്‍ പ്രചരണങ്ങളിലൂടെ വരാന്‍ പോകുന്ന വന്‍ദുരന്തത്തെ നമുക്ക് തടഞ്ഞു നിര്‍ത്താം.

ഒപ്പം വായിക്കാവുന്നവ:
ഒറ്റക്കാലന്‍ മഅദനിയും ഒറ്റക്കണ്ണന്‍ നിയമവും
ദാ 'ഭീകരി' വരുന്നു!!
ജയില്‍ ചുമരിലെ അമ്പിളിക്കീറ്

സഖാവേ... കരയേണ്ടത് ഞങ്ങളല്ലേ!

2011-10-17T15:08:00.000+03:00

കരച്ചില്‍ മുമ്പും കേരള രാഷ്ട്രീയത്തില്‍ പ്രകമ്പനങ്ങള്‍ സൃഷ്ടിച്ചിട്ടുണ്ട്. ശോഭനാ ജോര്‍ജും രാമചന്ദ്രന്‍ മാഷും ചെന്നിത്തലയുമൊക്കെ വാവിട്ടു കരഞ്ഞത്‌ ചാനലുകളായ ചാനലുകള്‍ മുഴുവന്‍ ഹാസ്യവല്‍ക്കരിച്ചപ്പോള്‍ കേരളത്തിലെ പ്രബുദ്ധ ജനതയോടൊപ്പം തലതല്ലി ചിരിച്ച കമ്മ്യൂണിസ്റ്റ്‌ സഖാക്കള്‍ അവയൊക്കെയും ആസ്വദിക്കുകയായിരുന്നു. കാലം രണ്ടായിരത്തി പതിനൊന്നാമാണ്ടിന്റെ അവസാനമെത്തിയപ്പോള്‍ കഥയാകെ മാറി. ഇക്കാലമത്രയും രോഷയും പ്രതിഷേധവും മാത്രം പൊട്ടിവിരിഞ്ഞ ടി.വി. രാജേഷ്‌ എന്ന യുവസഖാവിന്റെ മുഖത്ത് കാര്‍മേഘങ്ങള്‍ ഉരുണ്ടുകൂടുന്നതും പിന്നെയത് പേമാരിയായി വര്‍ഷിക്കുന്നതും കണ്ട് സീരിയല്‍ കാഴ്ചകള്‍ മരുഭൂമികളാക്കിയ കണ്ണുകള്‍ പോലും തുളുമ്പിപ്പോയി എന്നത് സത്യം. ഒരു ചെറുപ്പക്കാരന്‍ പത്തിരുപത്‌ ചാനല്‍ ക്യാമറകളുടെ മുമ്പില്‍ വാവിട്ടു കരയുന്നത് കണ്ടാല്‍ ഏതു കഠോരഹൃദയമാണ് പെയ്യാതിരിക്കുക! അതും ന്യൂസ്‌ ഹവറിലും കൗണ്ടര്‍ പോയിന്റിലും ഉണ്ട ഇട്ടും ഇല്ലാതെയും വെടിയുതിര്‍ക്കുന്ന ഒരു യുവതുര്‍ക്കിയുടെ നിലവിളി കണ്ടാല്‍!

ടി.വി. രാജേഷിന്റെ കരച്ചില്‍ നേച്വറലോ അഭിനയമോ എന്നതാവരുത്‌ നമ്മുടെ ചര്‍ച്ച. അതിന്‍റെ ഗ്രേഡിംഗ് നിര്‍ണയിക്കുന്ന ജോലി അഡ്വ. ജയശങ്കര്‍ തന്നെ നിര്‍വഹിക്കട്ടെ. പഴയൊരു നാടകനടനായ അദ്ധേഹത്തിന് ആ ജോലി വലിയ പ്രയാസമുള്ളതാകില്ല. വാച്ച് ആന്‍ഡ്‌ വാര്‍ഡിനെ തല്ലിയോ തള്ളിയോ എന്നതുമല്ല പരമപ്രധാന ചര്‍ച്ച. തല്ലിയാലും തല്ലാന്‍ ഓങ്ങിയാലും അതിലൂടെ വ്യക്തമാകുന്ന നമ്മുടെ ജനപ്രതിധികളുടെ നിലവാരത്തകര്‍ച്ചയാണ് ഇവിടെ ചര്‍ച്ച ചെയ്യപ്പെടേണ്ടത്. തടിമിടുക്കുള്ള ഫയല്‍മാന്‍മാരായത് കൊണ്ടാണോ നാമിവരെ നിയമസഭയിലേക്ക് പറഞ്ഞയക്കുന്നത്? അതല്ല, നാടിന്റെ വികസനത്തിന്‍റെ പാതയില്‍ വഴിമുടക്കികളാവുന്ന ഫയലുകളിലെ നൂലാമാലകള്‍ അഴിച്ചെടുക്കാന്‍ കഴിവുള്ളവരായത്‌ കൊണ്ടോ? എസ് എഫ് ഐ നടത്തിയ സമരത്തിന്റെ ന്യായത്തെ ചോദ്യം ചെയ്യാന്‍ ഞാനാളല്ല. പക്ഷെ, അവിടെ നടന്ന അക്രമങ്ങളെ കണ്ടില്ലെന്നു നടിക്കാനുമാവില്ല. വിദ്യാര്‍ഥി സമരമെന്നാല്‍ അടിച്ചു പൊളിക്കലും കല്ലെറിയലും മാത്രമാണെന്ന് ഇതുപോലൊരു കാലത്തും എസ് എഫ് ഐയെ പോലുള്ള പുരോഗമന വിദ്യാര്‍ഥി പ്രസ്ഥാനം വിശ്വസിക്കുന്നുവെന്നതാണ് കഷ്ടം. ഈ പൊളിഞ്ഞു വീഴുന്നതൊക്കൊയും നമ്മുടെ തന്നെ നികുതി പണമാണെന്ന് ഇവരെ പറഞ്ഞു പഠിപ്പിക്കാന്‍ ഇനിയേതെങ്കിലും കാറല്‍ മാര്‍ക്സ്‌ ആവതാരമേടുക്കേണ്ടതുണ്ടോ? 'ഒരു ആത്മപരിശോധന നടത്തേണ്ട കാലം അതിക്രമിച്ചിരിക്കുന്നു സഖാക്കളെ' എന്നെ അതെക്കുറിച്ച് പറയാനുള്ളൂ. ഒരു സര്‍ഗാത്മക വിദ്യാര്‍ഥി മുന്നേറ്റത്തിന് ചെങ്കൊടിയേന്താന്‍ നിങ്ങള്‍ക്ക് കഴിയാത്തിടത്തോളം കാലം നിങ്ങള്‍ നയിക്കുന്ന ഒരു സമരത്തിനും ജനപിന്തുണ ലഭിച്ചുകൊള്ളണമെന്നില്ല എന്ന് മാത്രം ഓര്‍മിപ്പിക്കട്ടെ.

ഇനിയുള്ളത് പിള്ളയാണ്; ചന്തപ്പറമ്പിലെ കളിത്തോക്ക്‌ പോലെ സര്‍വീസ്‌ റിവോള്‍വറിനെ മനസ്സിലാക്കിയ അസിസ്റ്റന്റ് കമ്മീഷണര്‍ രാധാകൃഷ്ണപിള്ള. ഇതിലും എത്രയോ അക്രമാസക്ത സമരങ്ങള്‍ കേരളം കണ്ടതാണ്. അന്നൊന്നും ഇത്ര ലാഘവത്തോടെ സമരക്കാരുടെ തലയ്ക്കു നേരെ ഒരു പോലീസുകാരനും വെടി പൊട്ടിച്ചത്‌ നാം കണ്ടിട്ടില്ല; കൂത്തുപറമ്പും കാസര്‍ഗോഡും ബീമാപള്ളിയുമൊന്നും മറന്നു കൊണ്ടല്ല ഇത് പറയുന്നത്. അവയൊക്കെയും വാദത്തിനു വേണ്ടി ന്യായീകരിച്ചാല്‍ പോലും അതിന്‍റെ അടുത്തുപോലും എത്തില്ല കോഴിക്കോട്‌ സംഭവം. പിള്ളയ്ക്ക് ഉന്നം പിഴച്ചത് ഭാഗ്യമെന്നേ പറയേണ്ടൂ. മുമ്പേതോ പുലിയെ ഉന്നം തെറ്റാതെ വെടിവെച്ചു കൊന്ന ചരിത്രമുള്ള പിള്ളയുടെ 'കഴിവ്' കോഴിക്കോട് നാലുവട്ടം കാഞ്ചി വലിച്ചിട്ടും തെളിയിക്കാനാവാതെ പോയതിന് ദൈവത്തെ സ്തുതിക്കാം. ഇവിടെയും എനിക്ക് രണ്ടഭിപ്രായമില്ല. പിള്ള തന്നെയാണ് പുള്ളി. യു ഡി എഫിനെ ഇനിയുമൊരു പിള്ളയെ താങ്ങാനാവാത്ത വിധം പ്രതിരോധത്തിലേക്ക് നീക്കിയ ഈ സംഭവത്തില്‍ കൃത്യതയോടെയും അവധാനതയോടെയുമുള്ള നീക്കങ്ങളായിരുന്നു പ്രതിപക്ഷം നടത്തിയിരുന്നതെങ്കില്‍ വാദി ഭാഗത്ത്‌ നിന്നും പ്രതിപ്പട്ടികയിലേക്ക് പേര് മാറ്റിയെഴുതെണ്ടി വരുമായിരുന്നില്ല. രണ്ടു ദിവസത്തേക്കായാല്‍ പോലും രണ്ടു എംഎല്‍എമാരെ സസ്പെന്‍ഡ്‌ ചെയ്യേണ്ടി വരുമായിരുന്നില്ല.

പ്രതിഷേധങ്ങള്‍ക്ക് ഏറ്റവും ചുരുങ്ങിയത്‌ നിയമസഭയിലെങ്കിലും ചില നിയന്ത്രണങ്ങള്‍ കൊണ്ടുവരാന്‍ നമ്മുടെ രാഷ്ട്രീയ പാര്‍ട്ടികള്‍ തയ്യാറാവണം. ജസ്റ്റിസ്‌ രാജേന്ദ്ര ബാബു നല്‍കിയ ശമ്പള വര്‍ധന റിപ്പോര്‍ട്ടിന്റെ കാര്യത്തില്‍ കേരളം കാണാന്‍ പോകുന്ന ഒരുമയൊന്നും എല്ലാ കാര്യത്തിലും ഞങ്ങള്‍ പ്രതീക്ഷിക്കുന്നില്ല. നിയമസഭയെന്നാല്‍ തല്ലാനും ചവിട്ടാനും ചവിട്ടു നാടകമാടാനും ഒടുവില്‍ പൊട്ടിക്കരയാനും ഒരു റിയാലിറ്റി ഷോ വേദിയല്ല എന്നെങ്കിലും ബഹുമാനപ്പെട്ട സ്പീക്കര്‍ ഒരു റൂളിംഗ് നല്‍കണം. എലിപ്പനിയും ഡങ്കിപ്പനിയും വന്നു തളര്‍ന്നു പോയവരെ കൈപിടിച്ചുയര്‍ത്താതെ, നമ്മുടെ ചികില്‍സാ കേന്ദ്രങ്ങളിലെ അസൗകര്യങ്ങളും അഴിമതികളും തുടച്ചു മാറ്റാതെ, കേരളത്തെ പുനര്‍ സൃഷ്ടിക്കാനുള്ള വഴി തേടാതെ ഇനിയും നിയമസഭയുടെ അകത്തളത്ത് മാമാങ്കം നടത്താനാണ് പുറപ്പാടെങ്കില്‍ പ്രിയ ഭരണക്കാരെ, സഖാക്കളേ... പൊട്ടിക്കരയുന്നത് ഞങ്ങള്‍ കേരളീയരാവും. നിഷേധ വോട്ട് ചെയ്യാനും പ്രതിനിധികളെ തിരിച്ചുവിളിക്കാനും വഴിയില്ലാത്ത കാലത്തോളം ഈ ജനാധിപത്യ രാഷ്ട്രത്തില്‍ ഞങ്ങള്‍ക്കതിനല്ലേ കഴിയൂ!

മലയാളിയില്‍ നിന്നും കൊലയാളിയിലേക്കുള്ള ദൂരം

2011-10-12T11:34:00.000+03:00

ബീഹാറില്‍ കേട്ട വാര്‍ത്തകള്‍ കേരളത്തിലും കേള്‍ക്കേണ്ടി വരുന്ന ദുര്യോഗത്തിലാണ് നാം. തറയും പറയും കൂട്ടിയെഴുതി നൂറു ശതമാനം സാക്ഷരതയുടെ തൊപ്പിയണിഞ്ഞ് തലയുയര്‍ത്തി നടക്കവേ, ജന്മസിദ്ധമായി നമുക്ക് ലഭിച്ച പ്രതികരണ ശേഷി അതിന്റെ പൈശാചിക മുഖം പുറത്തെടുക്കുന്ന ഭീകര കാഴ്ചയാണ് പെരുമ്പാവൂര്‍ ബസ്സ്റ്റാന്‍ഡില്‍ നാം കണ്ടത്‌. മലയാളി ഇപ്പോള്‍ അങ്ങനെയാണ്. ജനാധിപത്യ വ്യവസ്ഥയിലെ ഉടയതമ്പുരാനായി പൗരന്മാര്‍ വ്യാഖ്യാനിക്കപ്പെടുമ്പോള്‍ നിയമവും നീതിയും തീരുമാനിക്കപ്പെടുന്നതും നടപ്പാക്കപ്പെടുന്നതും തെരുവിലും ബസ്റ്റാന്റിലുമാവുന്നതില്‍ അത്ഭുതപ്പെടാനില്ല. അത്തരം നാട്ടുകൂട്ടങ്ങളില്‍ കുറ്റാരോപിതനെ തല്ലിക്കൊല്ലാന്‍ നേതൃത്വം കൊടുക്കുന്നത്, ഗുണ്ടാ രാഷ്ട്രീയത്തിന്‍റെ തലതൊട്ടപ്പനെന്നു സ്വന്തം പാര്‍ട്ടി നേതാവ് തന്നെ വിശേഷിപ്പിച്ച മാന്യന്റെ ഗണ്‍മാന്‍ തന്നെയാവുമ്പോള്‍ പ്രത്യേകിച്ചും! ഏതെങ്കിലും തെരുവില്‍ ഒരു യാത്രക്കാരിയുടെ മാല നഷ്ടപ്പെട്ടാല്‍ നാം ആദ്യം തെരയുന്നത് ബസ്റ്റോപ്പിന്‍റെ തിണ്ണയില്‍ പനിച്ചു വിറച്ചു ചുരുണ്ടു കൂടി കിടക്കുന്ന 'അണ്ണാച്ചി'യെയാവും. കുറ്റാരോപണവും ചോദ്യം ചെയ്യലും ശിക്ഷ വിധിക്കലും നടപ്പാക്കലുമൊക്കെ പിന്നെ ഞൊടിയിടയില്‍ നടന്നിരിക്കും. അത്രയും നാള്‍ ജലപാനം കഴിക്കാതെ എലിപ്പനി പിടിച്ച് ചാക്ക് മൂടി കിടന്നുറങ്ങിയ പാവത്തെ തിരിഞ്ഞു നോക്കാത്തവര്‍ പോലും ഒന്ന് കൈവലിക്കാന്‍ കിട്ടിയ സന്ദര്‍ഭം പരമാവധി ഉപയോഗപ്പെടുത്തും. പലപ്പോഴും ഇതിനു മുന്നിലുണ്ടാവുന്ന ജനകീയ പോലീസിന്റെ അടിവസ്ത്രത്തിനടിയില്‍ കിടക്കുന്ന മാലയ്ക്ക് ശ്വാസം മുട്ടുന്നുണ്ടാവും!

രഘു നിരപരാധിയാണെന്ന് മുഖ്യമന്ത്രി തന്നെ പറയുന്നു. രഘുവിനെ അറിയുന്നവര്‍ അവന്റെ സത്യസന്ധമായ ജീവിതത്തെ സാക്ഷ്യപ്പെടുത്തുന്നുന്നു. പതിനാറാം വയസ്സ് മുതല്‍ സ്വന്തം കരം കൊണ്ട് അധ്വാനിച്ചു ജീവിക്കുന്ന ആ ചെറുപ്പക്കാരനെ തല്ലിക്കൊല്ലാനായി പടനയിച്ചവരില്‍ എത്രപേര്‍ക്ക് സ്വന്തം ജീവിതത്തെ കുറിച്ച് ഇത്തരമൊരു സര്‍ട്ടിഫിക്കറ്റ് ലഭിക്കും? നേരം വെളുത്താല്‍ ബസ്സ്റ്റാന്‍ഡിലെത്തി ലോട്ടറി സ്റ്റാളിന്റെ മുന്നില്‍ ചുറ്റിത്തിരിഞ്ഞ് ചുണ്ടിനടിയില്‍ ശംഭുവും തിരുകി പെണ്ണുങ്ങളെ നോക്കി വെള്ളമിറക്കി നടക്കുന്ന എത്ര മാന്യന്മാര്‍ ഈ പാവത്തിന്റെ ജീവനെടുക്കാന്‍ കൂട്ടുനിന്നിരിക്കും! അന്യായം കണ്ടാല്‍ ചോദ്യം ചെയ്യേണ്ടെന്നോ പ്രതികരിക്കേണ്ടതില്ലെന്നോ അല്ല പറഞ്ഞു വരുന്നത്. അന്യായം കാണുമ്പോള്‍ തടയാനും ചോദ്യം ചെയ്യാനും കാണിക്കുന്ന ധീരത സത്യസന്ധമായിരിക്കണം. അല്ലാതെ ഇത്തരം സന്ദര്‍ഭങ്ങള്‍ കൈത്തരിപ്പ് തീര്‍ക്കാന്‍ കിട്ടുന്ന സുവര്‍ണാവസരമായി മനസ്സിലാക്കി കുറ്റാരോപിതരെ തല്ലികൊല്ലാന്‍ തുടങ്ങിയാല്‍ കേരളത്തെ പണ്ട് വിവേകാനന്ദന്‍ വിളിച്ച പേര് തന്നെ വിളിക്കേണ്ടി വരും.

ഇത്തരം കൈയേറ്റങ്ങളും അക്രമങ്ങളും കേവലം മോഷണ - പോക്കറ്റടി സമയങ്ങളില്‍ മാത്രമല്ല മലയാളികള്‍ പുറത്തെടുക്കാറുള്ളത്‌. ഏതെങ്കിലും വാഹനം അപകടത്തില്‍ പെട്ടാലും നമ്മുടെ ധാര്‍മിക രോഷം അണപൊട്ടിയൊഴുകാറുണ്ട്. നമ്മുടെ നാട്ടില്‍ ഡ്രൈവിംഗ് നിമയത്തിലെ ഒരു അലിഖിത നിയമം ഇതാണ്; വണ്ടിയെങ്ങാന്‍ അപകടത്തില്‍ പെട്ടാല്‍ വാഹനം ഇടിച്ച വ്യക്തിയെ ആശുപത്രിയില്‍ എത്തിക്കാന്‍ പോലും നില്‍ക്കാതെ ധരിച്ചിരിക്കുന്ന യൂണിഫോം വലിച്ചൂരി അടുത്തുള്ള പോലീസ്‌ സ്റ്റേഷന്‍ ലക്ഷ്യമാക്കി ഇറങ്ങി ഓടണം! ഇതിനു വേണ്ടി യൂണിഫോമിന്റെ അടിയില്‍ മറ്റൊരു ഷര്‍ട്ട് ധരിക്കുന്ന പതിവ് പോലും നമ്മുടെ നാട്ടിലുണ്ട്! മനുഷ്യാവകാശങ്ങളുടെ കാര്യത്തില്‍ അനാവശ്യ പഴി കേള്‍ക്കേണ്ടി വരുന്ന ഗള്‍ഫു നാടുകള്‍ ഇക്കാര്യത്തില്‍ എന്തുകൊണ്ടും നമ്മളേക്കാള്‍ മുന്നിലാണ്. അപകടം നടന്നാല്‍ വണ്ടി നിര്‍ത്തി പുറത്തു വന്നു ഹസ്തദാനം നടത്തി അഭിവാദ്യം ചെയ്തു കുറ്റം ഏറ്റുപറയുന്ന അവസ്ഥ നമുക്കൊന്നും സ്വപ്നം കാണാന്‍ പോലും കഴിയില്ല. രസകരമായത്‌, എയര്‍പോര്‍ട്ടിലേക്ക് പോകും വഴി സ്വന്തം വണ്ടിയെ മറ്റൊരു വണ്ടി ഉമ്മ വെച്ചതിന് തമ്മില്‍ തെറി വിളിച്ചവന്‍ ഗള്‍ഫിലെത്തി എയര്‍പോര്‍ട്ടില്‍ നിന്നും പുറത്തു പോകുമ്പോള്‍ നേരത്തെ നടന്ന സംഭാവമെങ്ങാന്‍ ആവര്‍ത്തിക്കപ്പെട്ടാല്‍ കാണിക്കുന്ന ക്ഷമയും മര്യാദയുമാണ്! വണ്ടികള്‍ ചെറുതായി ഒന്ന് ഉരസിപ്പോയാല്‍ ഭരണിപ്പാട്ട് പാടുന്ന മലയാളികള്‍ അവരുടെ മുമ്പില്‍ തീരെ ചെറുതായി പോകുന്നത് എന്ത് കൊണ്ടാണ്? അവിടങ്ങളില്‍ ഒരു പോലീസ്‌ സംവിധാനമുണ്ടെന്നും അവര്‍ ആവശ്യമായ നടപടികള്‍ എടുക്കുമെന്നും വാഹങ്ങള്‍ക്ക് കേടുപാടുകള്‍ സംഭവിച്ചാല്‍ അതാത് ഇന്‍ഷൂറന്‍സ് കമ്പനികള്‍ ആവശ്യമായ നഷ്ടപരിഹാരം തരുമെന്നും ഉറപ്പുള്ളതു കൊണ്ട് അവിടെ എത്തപ്പെടുന്ന ആളുകള്‍ കാര്യങ്ങള്‍ നിയമ വ്യവസ്ഥക്ക് വിട്ടു കൊടുക്കുന്നു. നമ്മുടെ നാട്ടിലോ? ഒരു അപകടം നടന്നാല്‍ പോലീസ്‌ കേസും ഇന്‍ഷൂറന്‍സും എങ്ങനെ ഒഴിവാക്കാം എന്നതാവും നമ്മുടെ ചിന്ത. അതുകൊണ്ട് തന്നെ ഓരോ അപകടങ്ങള്‍ നടക്കുമ്പോഴും അതിനു പുറകെ അനവധി മധ്യസ്ഥ ചര്‍ച്ചകളും നടത്തേണ്ടി വരുന്നു. നിയമ വ്യവസ്ഥയിലെ അനാവശ്യ കാലവിളംബവും നൂലാമാലകളും തീരാത്ത കാലത്തോളം നമ്മള്‍ മലയാളികള്‍ ഇങ്ങനെ തന്നെയൊക്കെയായിരിക്കുമെന്ന് ചുരുക്കം!

പറഞ്ഞുവന്നത് രഘുവിനെ കുറിച്ചാണ്. ഇനി നമ്മുടെ പത്രത്താളുകളില്‍ ഇങ്ങനെയൊരു വാര്‍ത്ത ആവര്‍ത്തിക്കപ്പെട്ടു കൂടാ. കുറ്റവാളികള്‍ എത്ര ഉന്നതരായാലും മാതൃകാപരമായി ശിക്ഷിക്കപ്പെടണം. പ്രസവിച്ചത്‌ കാളയോ പശുവോ എന്ന് ഉറപ്പു വരുത്തുന്ന ശീലം സമൂഹത്തില്‍ വളര്‍ത്തിയെടുക്കുന്ന വിധം മാതൃകാപരമായ ശിക്ഷ!

ജയില്‍ ചുമരിലെ അമ്പിളിക്കീറ്

2011-08-29T10:42:00.000+03:00

പെരുന്നാളിനുള്ള ഒരുക്കമാണ്. പ്രവാസിയുടെ പെരുന്നാള്‍ ഉറക്കമാണെന്ന് അറിയാമെങ്കിലും, കൂട്ടുകാരോടൊത്ത് പുതുവസ്ത്രം വാങ്ങാന്‍ പോയി. രണ്ടെടുത്താല്‍ ഒന്ന് ഫ്രീയായി തരാനുള്ള ഹൈപ്പര്‍ മാര്‍ക്കറ്റ് മുതലാളിയുടെ വിശാലമനസ്കതയ്ക്ക് നന്ദി പറഞ്ഞു രണ്ടു പാന്റ്സും ഒരു ഷര്‍ട്ടും വാങ്ങി. ബില്ല് കൊടുത്തപ്പോഴാണ് ഒരു ജോഡി വാങ്ങാന്‍ വന്ന എന്നെ കൊണ്ട് മൂന്നു കൂട്ടം വാങ്ങിച്ച മുതലാളിയുടെ ബുദ്ധി സാമര്‍ത്ഥ്യം തിരിച്ചറിഞ്ഞത്‌.

നാട്ടില്‍ വിളിക്കണം. ഭാര്യയും മകനും വീട്ടിലില്ല; അവരുടെ പെരുന്നാളിന് ഇത്തവണ പൊലിമ തീരെയില്ല. ഭാര്യാ പിതാവ് റമദാന്‍ പത്തൊമ്പതിന് കാലത്ത്‌ അല്ലാഹുവിങ്കലേക്ക് തിരിച്ചു പോയി. പെട്ടന്നായിരുന്നു. സുബഹിക്ക് ശേഷം ഒരു വീഴ്ച... ഇന്നാലില്ലാഹ്! നാഥന്‍ അദ്ധേഹത്തിനു സ്വര്‍ഗം കൊടുക്കട്ടെ.

ഉമ്മയെ വിളിച്ചു. വയ്യാതെ കിടക്കുന്ന ഉപ്പയും ഉമ്മയും ഒറ്റയ്ക്കാണ്. മോന്റെ കുസൃതി അവരുടെ ഒറ്റപ്പെടലിന് വലിയ ആശ്വാസമായിരുന്നു. ആറു പേരുള്ള മുറിയിലും കൂട്ടിലടച്ചത് പോലെ വീര്‍പ്പു മുട്ടുന്ന എനിക്കനുഭിവിക്കാം, അവരുടെ പ്രയാസം. വിളിച്ചപ്പോള്‍ ഉമ്മയ്ക്ക് പരിഭവം... പെങ്ങളുടെ വീട്ടിലേക്കു പോവട്ടെ എന്ന് ചോദിച്ചു. ഒറ്റയ്ക്ക് എന്ത് ചെയ്യാനാണ്. 'നീയുള്ളപ്പോഴായിരുന്നില്ലേ പെരുന്നാളെന്ന' ഉമ്മയുടെ ദീര്‍ഘനിശ്വാസം ചെവിയിലിപ്പോഴും ചൂട്പടര്‍ത്തുന്നുണ്ട്. 'പെങ്ങള്‍ വന്നു കൂട്ടിക്കോളും. പെരുന്നാള്‍ കഴിഞ്ഞ് രണ്ടു നാള്‍ കൂടിയിട്ടേ മടങ്ങേണ്ടൂ...' ഉമ്മയ്ക്ക് ആശ്വാസം.

ഭക്ഷണം കഴിച്ചു പെട്ടെന്ന് കിടക്കണം. പെരുന്നാളും അതുകഴിഞ്ഞുള്ള രണ്ടു മാസവും വേഗം തീര്‍ന്നു കിട്ടിയാല്‍ വെക്കേഷനാണ്. ബാലിപെരുന്നാളിന്റെ സുഖം ഉമ്മയോടും ഉപ്പയോടും ഭാര്യയോടും മകനോടുമൊപ്പം അറിഞ്ഞനുഭവിക്കണം. ഭക്ഷണം കഴിക്കാനായി ധൃതിയില്‍ വിരിച്ച പത്രത്താളിലാണ് മഅദനിയെ കണ്ടത്‌; എന്റെ ചിന്തയ്ക്ക് ഭ്രാന്ത് പിടിച്ചത്‌.

എന്‍റെ ഉമ്മയുടെതും ഉപ്പയുടെതും ഒറ്റപ്പെടലാണോ? ബാച്ചിലര്‍ റൂമിലെ എന്റെ വിരഹം വേദനാജകമാണോ? അല്ല; അല്ലേയല്ല!! ചെയ്യാത്ത തെറ്റിന് പത്തു വര്‍ഷം, ഇരുപതു പെരുന്നാളുകള്‍ ജയിലില്‍ കഴിഞ്ഞ മഅദനിക്ക് ഈ പെരുന്നാള്‍ ഒരു പുതുമയാവില്ല. അത്യത്ഭുതകരമായ സഹനവും ക്ഷമയും ആ മനുഷ്യനെ വല്ലാതെ വ്യത്യസ്തനാക്കുന്നുണ്ട്. എന്നാലും, ഭര്‍ത്താവ് ജീവിച്ചിരിക്കെ വിധവയെ പോലെ ജീവിക്കേണ്ടി വരുന്ന ഒരു ഭാര്യയില്ലേ അദ്ദേഹത്തിന്! പിതാവ് ജീവിച്ചിരിക്കെ അനാഥരാവേണ്ടിവന്ന മക്കളില്ലേ ആ മനുഷ്യന്! സ്വന്തം മകന്‍റെ നരകയാതന കണ്ടു നെഞ്ച് തകര്‍ന്ന് ശരീരം തന്നെ തളര്‍ന്നു പോയ ഒരു വൃദ്ധ പിതാവില്ലേ ആ വികലാംഗന്!

ശത്രുക്കളുടെ ബോംബു ചീളുകള്‍ സമ്മാനിച്ച വൈകല്യം പേറുമ്പോഴും അവരോടു ശത്രുതയില്ലെന്ന് പ്രഖ്യാപിച്ച് മാപ്പ് നല്‍കിയ ആ ഹൃദയത്തെ ഒന്ന് അഭിനന്ദിക്കാന്‍ പോലും നാം കൂട്ടാക്കിയില്ലല്ലോ. എത്രയും വേഗം ആ ദുര്‍ബല ശരീരത്തെ കാരാഗൃഹത്തിലേക്ക് തിരിച്ചയക്കാനായിരുന്നല്ലോ നമ്മുടെ തിടുക്കം! ഒരു ജാമ്യം പോലും നല്‍കാതെയുള്ള പീഡനം. കാര്യമന്വേഷിച്ച മാധ്യമ പ്രവര്‍ത്തകയെ പോലും വെറുതെ വിടാത്ത നീതിന്യായത്തെ എങ്ങിനെ 'ബഹുമാനപ്പെട്ട' എന്ന് വിശേഷിപ്പിക്കും. വെറുത്തു പോകുന്നു; ഇങ്ങനെയൊരു സംവിധാനത്തെ.

നമ്മുടെ നിയമവ്യവസ്ഥയ്ക്ക് എവിടെയാണ് പിഴച്ചത്? താടിയിലും തലപ്പാവിലും അരുതാത്തതെന്തോ കണ്ടു പേടിക്കുന്നതിനു ഇനിയും ചികില്‍സ ലഭിക്കാതെ പോയാല്‍ ഒരുപാടു മഅദനിമാര്‍ ജയില്‍ ചുമരുകളിലെ അമ്പിളിക്കീറില്‍ പെരുന്നാളുണ്ണേണ്ടി വരും. ഒരു പാട് ഷാഹിനമാര്‍ പത്രകോളത്തിന്‍റെ പുറമ്പോക്കിലേക്ക് മാറ്റിനിര്‍ത്തപ്പെടും.

ഇത് ഞാന്‍ പിറന്ന മണ്ണാണ്. എനിക്കെന്‍റെ നാടിനെ സ്നേഹിക്കണം; കടമകള്‍ നിര്‍വഹിക്കണം. അതിനിവിടെ നേരും നെറിയും വാഴണം. അവകാശങ്ങള്‍ ലഭ്യമാവണം. എന്നാല്‍, അന്യായങ്ങള്‍ കണ്ടിട്ടും തല താഴ്ത്തി, കണ്ണ് പൂട്ടി ദേശഭക്തിഗാനം പാടാന്‍ മാത്രം ആരുമെന്നെ നിര്‍ബന്ധിക്കരുത്.

ഇത്തവണത്തെ പെരുന്നാളിന് ഒരു മണി വറ്റ് വായിലിടും മുമ്പ്‌ നാമോര്‍ക്കണം ആ മനുഷ്യനെ. കണ്ണ് നിറയുന്ന പ്രാര്‍ഥനകളുണ്ടാവണം, അധികാരികളുടെ കണ്ണ് തുറപ്പിക്കാനല്ല; തുറന്ന കണ്ണിന്റെ അന്ധത മാറിക്കിട്ടാനായി... മൗനം കൊണ്ട് അപഹാസ്യരാവുന്ന രാഷ്ട്രീയ തമ്പുരാക്കളുടെ മൂകത സുഖപ്പെടാനായി.സത്യം ജയിക്കാന്‍ തന്നെയുള്ളതാണ്; ദുര്‍ബലന്റെ പ്രാര്‍ത്ഥന സ്വീകരിക്കപ്പെടാനുള്ളതും!

ചില സദാചാര വിചാരങ്ങള്‍

2011-07-10T15:35:00.009+03:00

പീഡനം എന്ന വാക്ക്, ലൈംഗിക പീഡനം എന്നതിന്റെ ചുരുക്കെഴുത്തായി മാറിയിട്ട് കാലം കുറേയായി. കവിയൂരും കിളിരൂരും വിതുരയും ഐസ്ക്രീമും കോതമംഗലവുമൊക്കെ പീഡനം എന്ന വാക്കിന്റെ അകമ്പടിയില്ലാതെ അധികമൊന്നും നാം കേള്‍ക്കാറില്ല. പല പീഡന കേസുകളിലും പ്രതികളുടെ എണ്ണം പത്തും നൂറും ഇരുന്നൂറുമൊക്കെയാണെന്നതും നമുക്കിന്നൊരു അത്ഭുതമല്ല. ഇനിയേതെങ്കിലും പീഡന കേസില്‍ പ്രതികള്‍ ഒന്നോ രണ്ടോ പേര്‍ മാത്രമായിപ്പോയാലാണ് നമ്മുടെ ചൂണ്ടു വിരല്‍ മൂക്കിന്‍ തുമ്പത്ത് സ്ഥാനം പിടിക്കുന്നതും മുഖത്ത് ആശ്ച്യര്യ ഭാവം വിരിയുന്നതും. (ത്രീജീ അഴിമതിക്കോടികള്‍ മാറ്റിവരഞ്ഞ നമ്മുടെ അഴിമതി സങ്കല്‍പ്പങ്ങളില്‍ 'ബാലകൃഷ്ണപ്പിള്ളയൊക്കെ ഒരു അഴിമതിക്കാരനാണോ' എന്ന ചോദ്യമുയരുമ്പോലെ 'ഇതൊക്കെയൊരു പീഡനമാണോ' എന്ന ലൈന്‍!) ഇക്കാലമത്രയും മാധ്യമങ്ങളും രാഷ്ട്രീയപാര്‍ട്ടികളും ആഘോഷമാക്കിയും നമ്മില്‍ പലരും ആസ്വാദ്യകരമാക്കിയും കൊണ്ടാടി പോന്ന പീഡന പരമ്പരകളില്‍ ഒടുവിലത്തെ വാര്‍ത്തകള്‍, വല്ലാതെ ചങ്ക് കീറി കടന്നു പോകുന്നവയാണ്. നമ്മള്‍ വായിച്ചറിഞ്ഞ പീഡനങ്ങളിലെ ഇരകളുടെ പ്രായം രണ്ടു മുതല്‍ എണ്‍പത്തിയഞ്ചു വരെയായിരുന്നുവെങ്കിലും പ്രതികള്‍ പലപ്പോഴും പതിനെട്ടു മുതല്‍ മേലോട്ട് പ്രായമുള്ളവരായിരുന്നു. എന്നാല്‍, ഇക്കഴിഞ്ഞ ദിവസങ്ങളില്‍ പുറത്തു വന്ന പീഡന കഥകളിലെ നായകന്മാര്‍ പീഡനം എന്ന മലയാള വാക്ക് തെറ്റാതെ എഴുതിപ്പഠിക്കാത്ത, ഉച്ഛാരണ ശുദ്ധിയോടെ പറയാന്‍ പ്രായമായിട്ടില്ലാത്ത കൊച്ചു കുട്ടികളാണെന്നത് ധാര്‍മികതയിലും സദാചാര മൂല്യങ്ങളിലും വിശ്വസിക്കുന്നവരെ തളര്‍ത്താതിരിക്കുന്നതെങ്ങനെ! കമ്പ്യൂട്ടറും മൊബൈലും ആധുനികതയുടെ സകലമാന സിംബലുകളും മക്കള്‍ക്ക്‌ ആവോളം അനുവദിച്ചു കൊടുക്കുന്ന മോഡേണ്‍ സൊസൈറ്റിയില്‍ സദാചാരത്തെ കുറിച്ച് മിണ്ടാമോ എന്നറിയില്ല. എന്നാലും ഇതൊക്കെ കാണുമ്പോള്‍ ചിലത് പറയാതിരിക്കാനുമാവുന്നില്ല.

ഉണ്ണിമാങ്ങയും കുന്നിക്കുരുവും മഷിത്തണ്ടും അടയാളപ്പെടുത്തിയ കുട്ടിക്കാലത്തെ താലോലിക്കുന്ന നമുക്ക്‌, മക്കളുടെ മനസ്സും അത്രയൊക്കെയേ കാണാന്‍ സാധിക്കൂ എന്നിടത്താണ് നമ്മുടെ നിസ്സഹായതയുടെ തുടക്കം. സെക്സിന്റെ ബാലപാഠങ്ങള്‍ നാം പഠിച്ചു തുടങ്ങിയ പ്രായമാവുമ്പോഴേക്കും നമ്മുടെ മക്കള്‍ അച്ഛനും അമ്മയുമായി മാറുന്ന ദുഃഖസത്യം അത്രപെട്ടെന്നൊന്നും ഉള്‍ക്കൊള്ളാന്‍ നമുക്ക്‌ സാധിച്ചു കൊള്ളണമെന്നില്ല. എന്നാല്‍ സാങ്കേതിക വിദ്യയുടെ കുതിച്ചു ചാട്ടത്തിനൊപ്പമോ അതിനുമപ്പുറമോ ചാടിപ്പോയ ഒരു തലമുറയെ ജുവനൈല്‍ ഹോമിന്‍റെ ചുറ്റുമതിലിനുള്ളില്‍ തേടിപ്പോകേണ്ടിവരുന്ന ദുരവസ്ഥ സൃഷ്ടിച്ചതില്‍ നാഴികക്ക് നാല്‍പത്‌ വട്ടം മതങ്ങളെയും സദാചാര മൂല്യങ്ങളെയും തെറി വിളിക്കുന്നവര്‍ വഹിച്ച പങ്ക് ചെറുതല്ല. മുഹമ്മദായാല്‍ മുസ്ലിമായെന്നും രാമനായാല്‍ ഹിന്ദുവായെന്നും ജോസഫായാല്‍ കൃസ്ത്യാനിയായെന്നും ധരിച്ചു പോയ പാരമ്പര്യ മതവിശ്വാസികള്‍ക്കും ഈ പ്രതിപ്പട്ടികയില്‍ ഒഴിവുകഴിവില്ല. 'തന്റെ കരളിന്റെ കഷണമായ ഏക മകള്‍ ഫാത്വിമ മോഷ്ടിച്ചാല്‍ അവളുടെ കരവും ഛേദിക്കുമെന്നു' പഠിപ്പിച്ചയാളാണ് യഥാര്‍ത്ഥ മുഹമ്മദ്‌. പിന്നെയങ്ങനെ സ്വന്തം മകളെ ഭോഗിക്കുന്ന, കൂട്ടിക്കൊടുക്കുന്ന നവമുഹമ്മദലിമാരെ ആ അതുല്യപ്രവാചകന്‍റെ അനുയായി ഗണത്തില്‍ എണ്ണാന്‍ സാധിക്കും? കാമ ഭ്രാന്തില്‍ മകളെ ലൈംഗികോപകരണമാക്കുന്ന രാമനും ജോസാഫുമെങ്ങനെ പുരാണവും ഖുര്‍ബാനയും പറഞ്ഞു മേനി നടിക്കും? അര്‍ദ്ധരാത്രി അന്യപുരുഷനൊപ്പം ഊരുച്ചുറ്റിയാല്‍ പുരോഗമന വാദിയും അവരെ ചോദ്യം ചെയ്താല്‍ പുരാതനവാദിയുമായി മാറുന്ന സമകാലിക ലോകത്ത്‌, ഈ അരാജകത്വത്തിന് പതിനെട്ടു വയസ്സ് തികയണമെന്ന നിയമം പാലിക്കപ്പെട്ടാല്‍ മതിയെന്നാണ് പുതുതലമുറക്ക്‌ നല്‍കപ്പെടുന്ന വിദ്യാ-ആഭാസം. അങ്ങിനെയെങ്കില്‍ ആ മതില്‍ക്കെട്ടു കൂടി തച്ചു തകര്‍ക്കാന്‍ എട്ടു വയസ്സുകാരനും പത്തു വയസ്സുകാരനും ഇറങ്ങിപ്പുറപ്പെട്ടാല്‍ ഏതു സദാചാരമൂല്യമാപിനി വെച്ചവരെ തടയാന്‍ സാധിക്കും? ലൈംഗിക പങ്കുവെപ്പിന്റെ വയസ്സ് നിര്‍ണയത്തിനു ഒരു കോടതിക്കും അധികാരമില്ലെന്ന് അവര്‍ വാദിച്ചാല്‍ എന്ത് മറുവാദമുയര്‍ത്തി പ്രതിരോധിക്കും?

പിതാവ് വലിച്ചെറിഞ്ഞ ബീഡിക്കുറ്റി വലിച്ചു ശീലിച്ച 'പുകവലിയന്മാരുടെ' പിന്‍ഗാമികളിലൊരാളെ ഇന്നത്തെ പത്രത്താളില്‍ കണ്ടു; ചില്ലറ വ്യത്യാസങ്ങളോടെ. കുട്ടികള്‍ക്ക് മുമ്പിലിരുന്നു പുകവലിക്കുന്ന, മദ്യപിക്കുന്ന പുരോഗമനവാദികളെക്കാള്‍ ഒരുപടി മുന്നിലായിരുന്നു ഈ കഥയിലെ പിതാവ്. ഇവിടെ ബീഡിക്കുറ്റിയല്ല താരം, മദ്യക്കുപ്പിയും നീലച്ചിത്ര സീഡിയുമാണ്. നോക്കണം സംസ്കാരികാധപതനത്തിന്റെ പോക്ക്! ചിത്രത്തിലെ നായിക്കക്ക് പകരം ആ പത്തു വയസ്സ് കാരന്റെ മനസ്സ് കണ്ടെത്തിയത്‌ നാലര വയസ്സുകാരിയായ കളിക്കൂട്ടുകാരി. ഒടുവില്‍, ആമ്പല്‍ പൂവിറുത്തും തുമ്പിക്ക് പിന്നാലെ വട്ടം ചുറ്റിയും തളര്‍ന്നിരിക്കുമ്പോള്‍ ചരല്‍ കല്ലെറിഞ്ഞു ഓളങ്ങള്‍ സൃഷ്ടിക്കേണ്ട കുളക്കടവില്‍, അപക്വമനസ്സിന്‍റെ കാമപൂര്‍ത്തീകരണശ്രമം ഒരു കൊലപാതകമായി പരിണമിച്ചപ്പോള്‍ എല്ലാ വിരലുകളും ചൂണ്ടിയത് ആ പിതാവിലേക്കായതില്‍ അത്ഭുതമില്ല. ലഹരി ഹരമാണെന്നു പാടിയില്ലെങ്കില്‍ പഴഞ്ചനാവുമെന്ന്, സ്ത്രീ സ്വാതന്ത്ര്യമെന്നാല്‍ താന്തോന്നിത്തമാണെന്ന് സമ്മതിച്ച് അവരോടൊപ്പം സിന്ദാബാദ്‌ വിളിച്ചില്ലെങ്കില്‍ പിന്തിരിപ്പനായി ചാപ്പയടിക്കപ്പെടുമെന്ന് മനസ്സിലാക്കുന്നൊരു തലമുറ ധാര്‍മികക്കും നൈതികതക്കും സ്വന്തം വ്യാഖ്യാനങ്ങള്‍ ചമയ്ച്ചില്ലെങ്കിലേ അത്ഭുതമുള്ളൂ!

തുറന്നു വെച്ചും അതിര്‍വരമ്പ് അതിലംഘിച്ചും മക്കളെ വളര്‍ത്തിയാല്‍ പീഡനങ്ങള്‍ ഇല്ലാതാക്കാമെന്ന സ്ഥിരം പല്ലവി തകര്‍ന്നു വീണത് പാശ്ചാത്യ നാടുകളില്‍ നാം കണ്ടതാണ്. ഒളിക്കേണ്ടത് ഒളിച്ചും തടയേണ്ടത് തടഞ്ഞും തന്നെ മക്കളെ വളര്‍ത്തണം. പേര് വെക്കുമ്പോള്‍ അറബി ഭാഷയിലായാലോ, പേരെടുത്ത ക്ഷേത്രത്തില്‍ വെച്ച് ചോറൂണ് നടത്തിയാലോ, മുഖ്യശ്രേഷ്ഠന്‍റെ കാര്‍മികത്വത്തില്‍ മാമോദീസ മുക്കിയാലോ എല്ലാം തികഞ്ഞെന്ന തോന്നല്‍ മതവിശ്വാസികള്‍ തിരുത്തണം. ധാര്‍മികതയും സദാചാര ബോധവും സ്വന്തം ജീവിതത്തിലൂടെ കാണിച്ചു കൊടുക്കുന്നതാവണം നമ്മുടെ ഗാര്‍ഹികാന്തരീക്ഷം. വേലിക്കെട്ടുകളില്ലാത്ത സ്വാതന്ത്ര്യവാദികളായി സ്വയം മാറുമ്പോള്‍ സ്വന്തം മകനും മകളും മനസ്സിലുണ്ടാവാതെ പോകുന്നിടത്താണ് ഭൗതികവാദിയുടെ പരാജയം. സമൂഹം നിര്‍ണയിക്കുന്ന സദാചാരമൂല്യങ്ങള്‍ അടിച്ചു തകര്‍ത്തു കൊടിനാട്ടിയാല്‍ വിപ്ലവം വരുമെന്ന അഹങ്കാരം ഉപേക്ഷിക്കാന്‍ അവരും തയ്യാറാവണം. മദ്യപിച്ചാലേ കഥയും കവിതയും വിരിയുകയുള്ളൂവെങ്കില്‍ ആ സൃഷ്ടികള്‍ മുട്ടയില്‍ തന്നെ ചത്ത്‌ പോകുന്നതാണ് നല്ലത്. ആണും പെണ്ണും കെട്ടി മറിഞ്ഞാലേ പുരോഗമനം വരികയുള്ളൂവെങ്കില്‍ നാട് ആ അവസ്ഥയില്‍ തുടരുന്നതാണ് ഉത്തമം. അല്ലാതെ, മദ്യത്തിന്റെ അവശിഷ്ടത്തില്‍ നിന്നും പൊട്ടിവിരിയുന്ന ഭാവനാ കുസുമങ്ങളോ വ്യഭിചാരശാലകളില്‍ നിന്നുയരുന്ന സീല്‍ക്കാരങ്ങളോ ഒരായിരം നരകങ്ങളെ പ്രസവിക്കുകയല്ലാതെ ഒരു നാട്ടിനെയും സ്വര്‍ഗരാജ്യമാക്കി മാറ്റിയതായി നാം പഠിച്ചിട്ടില്ല.

മുടിവാദത്തിന്റെ പരിണാമ വഴികള്‍

2011-06-18T20:36:00.003+03:00

'കാന്തപുരത്തിന്റെ മക്കള്‍' ഇത്ര വലിയ ചതി പ്രതീക്ഷിച്ചു കാണില്ല. അതും തരുവണയെ പോലൊരാളുടെ ഭാഗത്ത്‌ നിന്നും! മര്‍ക്കസിന്റെ പുതിയ വ്യവസായ പദ്ധതിയായ മുടിപ്പള്ളിക്കെതിരെ നാവുയര്‍ത്തുന്നവരെയല്ലാം യുക്തിവാദികളാക്കി മുദ്രകുത്തി, സമുദായത്തിന്‍റെ റേഷന്‍ കാര്‍ഡില്‍ നിന്നും പേര് വെട്ടാന്‍ കരാറേറ്റെടുത്തവരെതന്നെ യുക്തിവാദികളാക്കി ലേഖനമെഴുതിയാല്‍ അത് പിന്നെ ചതിയല്ലാതെ മറ്റെന്താണ്! വിവാദകേശത്തിന്റെ ചിത്രങ്ങള്‍ പുറത്തുവന്ന അന്ന് തുടങ്ങിയ മലക്കം മറിച്ചിലാണ്. തിരിഞ്ഞും മറിഞ്ഞും തലകുത്തി നിന്നും സകല കോപ്രായങ്ങള്‍ കാണിച്ചിട്ടും സമുദായമോ സമൂഹമോ തങ്ങളുടെ വാക്കിന് പുല്ലുവില കല്പ്പിക്കുന്നില്ലെന്ന തിരിച്ചറിവാണോ മുടിവാദികളുടെ സ്വന്തം ലേഖകനെ പുതിയ തള്ളിപ്പറച്ചിലിനു പ്രേരിപ്പിച്ചതെന്നറിയില്ല. കാര്യമെന്തായാലും സിറാജ് പത്രത്തിലെ പഞ്ചദിന ഉപന്യാസ പരമ്പരക്ക് ശേഷം പലരും പഴയതൊന്നും ഓര്‍ക്കാന്‍ ഇഷ്ടപ്പെടുന്നില്ലെന്നതാണ് സത്യം. എന്നാലും എനിക്ക് അതൊക്കെയും പെട്ടന്നങ്ങു മറന്നു കളയാന്‍ ഒക്കില്ലല്ലോ. എന്തൊക്കെയായിരുന്നു! ശ്രദ്ധേയന്‍ കുടുങ്ങി, നിഴല് വരച്ചത് ശരിയായില്ല, ഫോട്ടോഷോപ്പ്‌ അറിയില്ല... അവസാനമെന്തായി? വാദി പ്രതിയായി!!

വായനക്കാര്‍ക്ക് ഓര്‍മയില്ലേ, എനിക്കെതിരെ വാളെടുത്ത് തുള്ളിയ 'കമന്റര്‍മാരെ'? നബിക്ക് നിഴലില്ലെന്നും അതുകൊണ്ട് ഖസ്രജിയുടെ കൈയ്യിലെ വ്യാജമുടിക്കും നിഴല്‍ കാണില്ലെന്നും വാദിച്ചവരുടെ മര്‍മസ്ഥാനത്ത്‌ കിട്ടിയ അടിയായിരുന്നു 'തിരുമുടിക്കെട്ടിന്റെ തിരുനിഴല്‍ ദര്‍ശനം'. അണികളുടെ ചോദ്യങ്ങള്‍ക്ക് ഉത്തരം മുട്ടിയപ്പോള്‍ എന്നെ കള്ളനാക്കാനായി ശ്രമം. പക്ഷെ, ഖസ്രജിയും മുടിക്കെട്ടും അബുദാബിയില്‍ ഉള്ള കാലത്തോളം (അധിക കാലം മുടിക്കെട്ട് അവിടെ ഉണ്ടാവില്ലെന്നാണ് പുതിയ വാര്‍ത്ത) നിഴലുള്ള ചിത്രങ്ങള്‍ ഇനിയും പുറത്തു വരുമെന്ന് ആരോ ഓര്‍മപ്പെടുത്തിയപ്പോള്‍ പുരോഹിതന്മാര്‍ അടവ് മാറ്റി. പക്ഷെ, പിന്നോട്ടെടുത്ത കാലു വന്നു വീണത്‌ പാവം അനുയായികളുടെ നെഞ്ചെത്താണെന്നു മാത്രം. തിരുകേശത്തിനു നിഴലുണ്ടാവില്ലെന്നു പറയുന്നത് ശുദ്ധയുക്തിവാദം ആണെന്ന ഒ.എം. തരുവണയുടെ ഫത്‌വ കേട്ട് വാ പൊളിച്ചു പോയ അണികളുടെ അണ്ണാക്കിലേക്ക് ഇത്രയും കൂടി പകര്‍ന്നു കൊടുത്തു അദ്ദേഹം. "നബിക്ക് നിഴലില്ലെന്നതിന് ഞമ്മളെ കൈയ്യില്‍ രേഖയുണ്ട് (?). അത് അത്രത്തോളം മനസ്സിലാക്കിയാല്‍ മതി. അല്ലാതെ കാരന്തൂരിലെ മുടിക്ക് നിഴലില്ലെന്നു പറയാന്‍ ഞമ്മളെ കൈയ്യില്‍ തെളിവൊന്നുമില്ല. ആരെങ്കിലും അങ്ങനെ പറഞ്ഞാല്‍ അവനാണ് യുക്തിവാദി, സാത്താന്റെ ജന്മം". അല്‍ഹംദുലില്ലാഹ്! ഇത്രയും സമ്മതിച്ചല്ലോ. ഇനി ശ്രദ്ധേയനെതിരെ പോസ്റ്റിറക്കിയവര്‍ മാന്യതയുണ്ടെങ്കില്‍ അവയൊക്കെയും പിന്‍വലിക്കണം. മാന്യതയോ? എവിടെ!!

തീര്‍ന്നില്ല, കേശവാണിഭത്തിനെതിരെ ഒറ്റക്കെട്ടായ സമുദായത്തില്‍ നിന്നും വഴുതിപ്പോയൊരു വിഭാഗത്തിന്റെ നേതാവിന്‍റെ പ്രഭാഷണമാണ് ഇവര്‍ക്കിന്നു വേദവാക്യം. നാദാപുരം അങ്ങാടിയില്‍ പേരോട് സഖാഫിയെ കല്ലെറിഞ്ഞോടിച്ച സമസ്താനയുടെ നേതാവ് നജീബ് മൗലവിയാണ് ഇവരുടെ പുതിയ മിശിഹ! മൈക്ക് വെച്ചുള്ള ഖുതുബ സ്വീകാര്യമല്ലാത്ത മൗലവി സാഹിബിന്റെ കോഴിക്കോടന്‍ 'ഖുതുബ' എപിക്കാര്‍ക്ക് മൃതസഞ്ജീവിനിയാവുന്നതിന്റെ കാരണം രസകരമാണ്. തരുവണ മുസല്യാര്‍ നിര്‍ത്തിയേടത്ത് നിന്നാണ് മൂപ്പരുടെ തുടക്കം. "അല്ലാഹുവിന്റെ റസൂലിന്റെ മുടി തീയിലിട്ടാല്‍ കരിയില്ല എന്ന് ഏതു കിതാബിലാണുള്ളത്? അങ്ങനെയൊരു സിദ്ധാന്തവും വേണ്ട. നബിയുടെ മുടിയില്‍ ഈച്ച ഇരിക്കില്ലെന്നു പറഞ്ഞത്‌ ജീവിച്ചിരിക്കുമ്പോള്‍ മാത്രമാണ്!" എങ്ങിനെയുണ്ട്! ഇടിവെട്ടിയവനെ പാമ്പ് കടിച്ചത് കാണണമെങ്കില്‍ നേരെ കാരന്തൂര്‍ മര്‍ക്കസിലേക്ക് പോയാല്‍ മതി. കരിച്ചിട്ടും കരിയാത്ത, ദിക്ര്‍ മജ്‌ലിസില്‍ ചാടിക്കളിച്ച അത്ഭുത മുടിയുടെ കറാമത്ത് മുഅജിസത്തുകള്‍ പഴയ എതിരാളികളുടെ സഹായത്തോടെ പുതിയ 'നിരീക്ഷക - തരുവണ' കൂട്ടുകെട്ട് പൊളിച്ചടക്കുമ്പോള്‍ ബോധം കേടാതിരിക്കാന്‍ മുടിവെള്ളം തേടുന്നത് സഖാഫി - അഹസനിമാര്‍ തന്നെയാണെന്നതില്‍ കാന്തപുരത്തിന് അഭിമാനിക്കാം.

സ്വന്തം പുത്തന്‍വാദങ്ങള്‍ തിരുത്തുക മാത്രമല്ല; മുസ്ലിം ലോകം ഇതുവരെ കേള്‍ക്കാത്തതെന്നു ഇവര്‍ തന്നെ മുമ്പ്‌ പറഞ്ഞ വ്യാജ ത്വരീക്കത്ത് വാദങ്ങളെ സിറാജിലൂടെയും ബ്ലോഗുകളിലൂടെയും ആഹുലുസ്സുന്നതിന്റെ പേരില്‍ ഇറക്കുമതി ചെയ്യാന്‍ കൂടി ശ്രമിക്കുന്നുമുണ്ട് ഇക്കൂട്ടര്‍. അതില്‍ പ്രധാനമാണ് പ്രവാചക തിരുമേനിയുടെ മുടിയെ കുറിച്ചുള്ള പുതിയ കണ്ടുപിടുത്തം. വിവാദം തുടങ്ങി നാലു മാസമായിട്ടും കാണാതെ പോയത്‌ കണ്ടെത്തിയെന്ന തോന്നല്‍ ഇവരെ വല്ലാതെ മതിഭ്രമിപ്പിച്ചു കളഞ്ഞുവെന്നു വേണം കരുതാന്‍. തിരുമുടി വാദത്തിന്റെ പരിണാമ വഴികളെ ഓര്‍ത്തെടുത്താല്‍ തരിച്ചിരുന്നു പോവും. വിവാദം തുടങ്ങിയപാടെ നിഷേധത്തിന്റെ പ്രളയമായിരുന്നു. അങ്ങനെയൊരു മുടിക്കെട്ടേ ഖസ്രജിയുടെ വീട്ടില്‍ ഇല്ലെന്നു നാവിട്ടടിച്ചവര്‍ നിരവധി. മര്‍ക്കസിലേക്ക് വിളിച്ചപ്പോള്‍ ലഭിച്ച മറുപടിയും ഇതുതന്നെ. ഗത്യന്തരമില്ലാതെ സത്യം സമ്മതിച്ചപ്പോള്‍ ഖസ്രജിയുടെ കൈയ്യിലുള്ളത് അദ്ദേഹത്തോട് തന്നെ ചോദിക്കണം എന്നായിരുന്നു തരുവണയുടെ പോലും വിശദീകരണം. അതും ചോദ്യം ചെയ്യപ്പെട്ടപ്പോള്‍ ചുവടു പിന്നെയും മാറ്റി. മുടി സ്വയം പെറ്റു പെരുകുകയാണ് എന്നായി പുതിയ വാദം. ഏറ്റവും പുതിയ ഗവേഷണ പ്രതിഭകളുടെ കണ്ടെത്തല്‍ മൂത്ത പുരോഹിതരെ പോലും ഞെട്ടിക്കുന്നതാണ്. അവരുടെ പ്രഭാഷണങ്ങളിലും പുസ്തകങ്ങളിലും ക്ലാസ്സ്‌ റൂമുകളിലും പണ്ട് പഠിപ്പിച്ചത് അപ്പാടെ വിഴുങ്ങിക്കളയുന്ന ഇവരുടെ തൊലിക്കട്ടി എത്രമാത്രമാണ്! പത്തു വയസ്സ് മുതല്‍ നബിയുടെ സേവകനായി ഒപ്പം നടന്ന അനസ്ബിനു മാലിക്ക് ഉദ്ധരിക്കുന്ന, 'നബിയുടെ മുടി ചെവിക്കും പിരടിക്കും ഇടക്കായിരുന്നുവെന്ന' സ്വഹീഹുല്‍ ബുഖാരിയിലെ ഹദീസ്‌ പോലും ചാടിക്കടന്ന്, വര്‍ഷങ്ങളോളം മുടി മുറിക്കാത്ത വ്യക്തിയാക്കി പ്രവാചകനെ ചിത്രീകരിക്കാന്‍ ഇവര്‍ കാണിക്കുന്ന ധൈര്യത്തിന്റെ പിന്‍ബലം മുടി വ്യവസായമല്ലാതെ മറ്റെന്താണ്? ചുമലോളമുള്ള മുടിയും മെടഞ്ഞിടാമെന്നു ഇവര്‍ക്കറിയാഞ്ഞിട്ടല്ല. എന്നാല്‍, പെണ്ണുങ്ങളെ പോലെ നീളത്തില്‍ മെടഞ്ഞിട്ട മുടിയായി അത് ചിത്രീകരിച്ചില്ലെങ്കില്‍ ഖസ്രജിയുടെ കയ്യിലെ ഒരു മീറ്ററോളമുള്ള മുടിക്ക് തെളിവാകില്ലല്ലോ. പക്ഷെ, പ്രശ്നം അവിടെയും തീരുന്നില്ലല്ലോ പുരോഹിതരെ. വര്‍ഷങ്ങളോളം നീട്ടി വളര്‍ത്തിയ നീളമുള്ള മുടിയായിരുന്നു സ്വഹാബതിനു കൈമാറിയതെങ്കില്‍ നിങ്ങളുടെ പഴയ സിദ്ധാന്ത പ്രകാരം ഇപ്പോഴും വളര്‍ന്നു കൊണ്ടിരിക്കണമല്ലോ. എങ്കില്‍ ഇപ്പോള്‍ ഖസ്രജിയുടെ കൈയില്‍ കാണുന്ന നീളം മതിയാവുകയുമില്ല. ഇതിനു പരിഹാരമായി അടുത്ത ലേഖനത്തില്‍ ഇപ്പോഴും മുടി വളരും എന്ന് പറയുന്നവര്‍ മുനാഫിഖാണ് എന്നൊരു ഫതവ പുറപ്പെടുവിച്ചേക്കുകയല്ലാതെ മറ്റൊരു വഴിയുണ്ടെന്ന് എനിക്ക് തോന്നുന്നില്ല!

തരുവണയുടെ മാഗദര്‍ശി ഒരു പടി കൂടി കടന്ന് സ്വഹാബികളെല്ലാം മുടി മുറിക്കാത്തവരാണെന്ന് വാദിക്കുമ്പോള്‍ പാവം അനുയായികള്‍ സ്വകാര്യം ചോദിച്ചത് 'എന്നാല്‍ നമുക്കും അങ്ങനെയായിക്കൂടെയെന്നായിരുന്നു'. അതിനുള്ള മറുപടിയോ, 'നന്നായി പരിപാലിക്കാമെങ്കില്‍ അഹങ്കരിക്കാതെ നീട്ടിവളര്‍ത്താം' എന്നും.! നഊദു ബില്ലാഹ്! പ്രവാചകന്‍ വ്യക്തമായി അതിര്‍ വരമ്പ് നിശ്ചയിച്ചിട്ടുണ്ട് എന്ന് പേരോട് സഖാഫി തന്നെ പ്രസംഗിച്ച, രണ്ടത്താണിയിലെ നുസ്രത്ത്‌ ദഅവാ കോളജ്‌ വ്യാജകേശ വിവാദത്തോട് അനുബന്ധിച്ച് പുറത്തിറക്കിയ നോട്ടീസില്‍ വ്യക്തമാക്കിയ സത്യം വ്യാജകേശം തിരുകേശമാക്കാന്‍ തള്ളിപ്പറഞ്ഞ ഇവരൊക്കെ ഈ ഹദീസിനെ എങ്ങിനെ തള്ളുമെന്ന് അറിയാന്‍ കൌതുകമുണ്ട്. റസൂലുല്ലാഹി (സ) പറഞ്ഞു : “ഖുറൈമുല്‍ അസദി എത്ര നല്ലവനാണ്, അദ്ധേഹത്തിന്റെ മുടിയുടെ നീളവും തുണി വലിച്ചിഴക്കലും ഇല്ലായിരുന്നെങ്കില്‍” . ഇതറിഞ്ഞ ഖുറൈമ് ഒരു കത്തിയെടുത്തു തന്റെ മുടി ചെവിയുടെ അവിടെ വെച്ച് മുറിക്കുകയും തന്റെ തുണിയെ തണ്ടംകാലിന്റെ പകുതി വരെ ഉയര്‍ത്തി ഉടുക്കുകയും ചെയ്തു (അബൂദാവൂദ്‌). എന്തേ ഖുറൈമുല്‍അസദി അഹങ്കാരിയായിരുന്നോ? ആണെങ്കില്‍ പ്രവാചകന്റെ വാക്ക് കേള്‍ക്കുമ്പോഴേക്കും മുടി മുറിക്കാനും വസ്ത്രം കയറ്റാനും തയ്യാറാവുമായിരുന്നോ? നിങ്ങളുടെ പുതിയ വാദപ്രകാരം ഇസ്ലാമില്‍ മുടി വളര്‍ത്തുന്നതിന്റെ പരിധി എത്രയാണ്? അങ്ങിനെയൊന്നില്ലേ? ഉത്തരം പറയേണ്ടത്‌ നവപുരോഹിതന്മാരാണ്. അല്ലെങ്കിലും, മാറ്റിവെക്കേണ്ട ഉദ്ദരണികള്‍ വാരിപ്പുല്‍കാനും നെഞ്ചോട്‌ ചേര്‍ക്കേണ്ടത് വലിച്ചെറിയാനും ഇക്കൂട്ടര്‍ പണ്ടേ മിടുക്കന്മാരാണല്ലോ! ഇതിലും രസകരമാണ് രിസാലയിലെ അഹമദ്കുട്ടി ശിവപുരത്തിന്റെ മുടി പുരാണം. സാഹിത്യഭംഗിയില്‍ സത്യങ്ങളും അര്‍ധസത്യങ്ങളും കൂട്ടിക്കുഴച്ചുള്ള ലേഖനം പറഞ്ഞു വെക്കുന്നത്, പ്രവാചകന്‍ ബലി മൃഗങ്ങളെ വളര്‍ത്തും പോലെ, ഹജ്ജില്‍ ബലി നല്‍കാന്‍ തിരുമുടിയും വളര്‍ത്തി എന്നാണ്! വല്ലാത്ത കണ്ടുപിടുത്തം തന്നെ പ്രൊഫസറേ!

ചുരുക്കിപ്പറഞ്ഞാല്‍, വാലിനു തീപിടിച്ച ഹനുമാനെ അനുസ്മരിപ്പിക്കുന്നതാണ് പുരോഹിത വര്‍ഗ്ഗത്തിന്റെ വെപ്രാളപ്പാച്ചില്‍. കാണുന്ന കുടിലിലും കൊട്ടാരത്തിലും തീ പടര്‍ത്താന്‍ അവര്‍ മടി കാണിക്കുന്നില്ല. അത്തരമൊരു തീവെപ്പാണ് പ്രബോധനത്തിനും ഡോ. ബഹാഉദ്ദീന്‍ മുഹമ്മദ് നദ്‌വിക്കും നേരെ നടത്തുന്നത്. നദ്‌വിയുമായുള്ള അഭിമുഖം പ്രസിദ്ധീകരിച്ചതാണ് ഇവരെ ചൊടിപ്പിച്ച കുറ്റം. ഒരു പ്രസിദ്ധീകരണത്തിന് ആളുകളെ അറിയിക്കാനുള്ള ആശയമെന്നു തോന്നുന്ന കാര്യങ്ങള്‍ ആര് പറഞ്ഞാലും പ്രസിദ്ധീകരിക്കാന്‍ അവകാശമില്ലേ? അവിടെ സുന്നിയും ജമാഅത്തും പറഞ്ഞു മാറി നില്‍ക്കല്‍ ഏറ്റവും ചുരുങ്ങിയത്‌ ഏപിക്കാര്‍ക്കെങ്കിലും പതിവുള്ളതാണോ? എങ്കില്‍ സാക്ഷാല്‍ ഒ. അബ്ദുല്ലയുടെ ലേഖനം സുന്നീ ജിഹ്വയായ രിസാലയില്‍ പ്രസിദ്ധീകരിച്ചതിന്റെ ന്യായമെന്താണ്? ജമാഅത്തെ ഇസ്‌ലാമിയുടെ യുവശബ്ദം സി. ദാവൂദിന്റെ പ്രബോധനം ലേഖനം അങ്ങനെ തന്നെ കോപ്പിയടിച്ചു രിസാല പ്രസിദ്ധീകരിച്ചപ്പോള്‍ എവിടെയായിരുന്നു തരുവണയും സഖാക്കളും? പ്രവാചകനെ കുറിച്ച് കാന്തപുരത്തിന് മാധ്യമത്തില്‍ എഴുതാമെങ്കില്‍ ചെറുശ്ശേരിക്ക് പ്രവാചക കേശത്തെ കുറിച്ചും എഴുതാനുള്ള അര്‍ഹതയുണ്ടെന്നു അതിന്റെ എഡിറ്റോറിയല്‍ ബോര്‍ഡിനു തോന്നിയാല്‍ അവരെയെങ്ങനെ കുറ്റപ്പെടുത്തും?

നവപുരോഹിത വര്‍ഗമേ, നിങ്ങള്‍ ഗവേഷണം തുടരുക; പക്ഷെ, ഒരപേക്ഷയുണ്ട്. ഓച്ചിറ ഉപ്പാപ്പയുടെ നഗ്നതയ്ക്ക്‌ മാത്രം പ്രവാചക ജീവിതത്തില്‍ തെളിവ് തേടരുത്‌. അങ്ങനെയൊരു ഉദ്യമത്തിന് ഏതെന്കിലും നിരീക്ഷകനെയോ തരുവണയെയോ എല്പ്പിക്കുകയുമരുത്. കാരണം, ദീനുല്‍ ഇസ്ലാമിന്റെ മുണ്ട് പറിച്ചോടുന്നതില്‍ ലവലേശം ലജ്ജയില്ലാത്തവരാണവര്‍!

മക്കളെയറിയുക

2011-06-08T09:42:00.001+03:00

പ്രവാസത്തിന്റെ തീച്ചൂളയില്‍ വെന്തു തിളച്ച യുവത്വം കൊണ്ട് പണിതീര്‍ത്ത സ്വപ്ന സൌധത്തിന്റെ ഉമ്മറത്ത് ജീവിതസായാഹ്നത്തിലൊരു ദിനം കാറ്റ് കൊള്ളാനിരിക്കവേ, ഒന്നുറക്കെ ചുമച്ചു പോയതിന്റെ പേരില്‍ സ്വന്തം മകനില്‍ നിന്നും 'ഛെ' എന്നു കേള്‍ക്കേണ്ടി വരുന്നയാളുടെ മാനസികാവസ്ഥയൊന്നു സങ്കല്‍പ്പിച്ചു നോക്കൂ. 'അകത്തെവിടെയെങ്കിലും ഒതുങ്ങിയിരുന്നുകൂടെ'യെന്ന തീക്ഷ്ണമായ നോട്ടത്തില്‍ പതറിപ്പോവുന്ന ആ പിതാവിന്റെ സ്ഥാനത്ത് നിങ്ങള്‍ തന്നെയാണെന്ന് കൂടി കരുതി നോക്കൂ. ഹൊ! കരിമ്പ് ചണ്ടി പോലെ വലിച്ചെറിയപ്പെട്ടേക്കാവുന്ന ഒരു ഭാവികാലത്തെ കുറിച്ചുള്ള ഭാവന പോലും നമ്മിലെത്രമാത്രം അസ്വസ്ഥതകളാണ് സൃഷ്ടിക്കുന്നത്!

കണ്കുളിര്‍മ നല്‍കുന്ന മക്കളാണ് ഒരു മനുഷ്യന്റെ ഭൂമിയിലെ ഏറ്റവും വലിയ സമ്പാദ്യം. നമുക്ക് കൈത്താങ്ങാവുന്ന, കുടുംബത്തിനു ആശ്വാസമാവുന്ന മക്കളായി സ്വന്തം മക്കളെ മാറ്റിയെടുക്കാനായി പണിയെടുക്കേണ്ടത് നാം തന്നെയല്ലാതെ മറ്റാരാണ്‌? എന്നാല്‍, പലതുമെന്ന പോലെ പ്രവാസിക്ക് സാധ്യമാവാതെ വരുന്നതും ഇത് തന്നെയാണ്. ഒന്നോ രണ്ടോ വര്‍ഷം കഴിയുമ്പോള്‍ ലഭിക്കുന്ന അവധി ദിനങ്ങളില്‍ മക്കളെ ശരിക്കുമൊന്ന് പരിചയപ്പെടാന്‍ പോലും കഴിയാതെ തിരിച്ചു പോരേണ്ടി വരുന്ന ഹതഭാഗ്യവാന്മാരാണ് നമ്മില്‍ പലരും. നാല് - അഞ്ച് വയസ്സ് വരെയുള്ള കാലഘട്ടമാണ് ഒരു കുട്ടിയുടെ വളര്‍ച്ചയില്‍ ഏറ്റവും രസകരമായത്. മലര്‍ന്നും കമഴ്ന്നും മുട്ടില്‍ നിരങ്ങിയും പിച്ച വെച്ചും പാല്‍പ്പല്ല് കാട്ടി ചിരിച്ചും അവര്‍ നമ്മെ ആനന്ദിപ്പിക്കും. വാക്കുകള്‍ കൂട്ടിപറഞ്ഞും പാട്ടുകള്‍ക്ക് വരികള്‍ ചമയ്ചും നമ്മുടെ മനംകവരും. പക്ഷേ, ഇതൊക്കെയും മിക്ക പ്രവാസികളുടെയും നഷ്ടക്കണക്കുകളായി ജീവിത ഡയറിയില്‍ രേഖപ്പെട്ടുകിടക്കും. ടെലഫോണ്‍ സംഭാഷങ്ങളില്‍ അപൂര്‍വമായി കേള്‍ക്കുന്ന 'ബാപ്പാ / അച്ഛാ' വിളികളെ പലവുരു മനനം ചെയ്ത് അവര്‍ ആശ്വാസം കണ്ടെത്തും. ഉതിര്‍ന്നു വീഴുന്ന കണ്ണുനീര്‍ തുള്ളികളെ 'സഹബാച്ചി'കളില്‍ നിന്നും മറയ്ക്കാന്‍ ശ്രമിക്കും. കുഞ്ഞുമക്കള്‍ക്കാവട്ടെ, പിതാവെന്നാല്‍ ടെലഫോണ്‍ റെസീവറാണെന്ന് പോലും തോന്നിപ്പോകും!

ചോദിക്കുന്നതെന്തും വാങ്ങിക്കൊടുക്കുന്ന പിതാവിലേക്ക് ഒരു ഗള്‍ഫുകാരന്‍ മാറുന്നതിന്റെ ആദ്യ കാരണങ്ങളാണ് ഈ പറഞ്ഞതൊക്കെയും. കെട്ടിപ്പിടിച്ചും വാരിപ്പുണര്‍ന്നും മതിവരുവോളം സ്നേഹം പകരാന്‍ കഴിയാത്തതിലുള്ള നിരാശാ ബോധത്തെ മറികടക്കാന്‍ അവര്‍ കാണുന്ന എളുപ്പവഴി പണം മാത്രമാണ്. സ്നേഹത്തിനു പകരം പണമെന്നും പണത്തിനു പകരം സ്നേഹമെന്നുമുള്ള പുതുലോകത്തിന്റെ സൂത്രവാക്യത്തിനു പ്രവാസിയും അറിയാതെ അടിമപ്പെടുകയാണിവിടെ. ബൈക്കായും മൊബൈലായും ലാപ്ടോപ്പായും സ്നേഹം എക്സ്ചേഞ്ചുകളിലൂടെ ട്രാന്‍സ്ഫര്‍ ചെയ്യുന്നിടത്ത് തന്റെ 'രക്ഷാകര്‍തൃത്വം' അവസാനിച്ചു എന്നു മനസ്സിലാക്കുന്ന പ്രവാസിയില്‍ നിന്നു തുടങ്ങുന്നു പുതുതലമുറയുടെ സാംസ്കാരികാധപ്പതനം. ലൈസന്‍സില്ലാതെ വാഹനമോടിക്കുന്നത് ഒരു നാട്ടിലും അനുവദനീയമല്ലെന്ന് നമുക്കറിയാം. എന്നാലും പൊന്നുമോന്‍ എസ് എസ് എല്‍ സി പാസായാല്‍ നാം വാഗ്ദാനം ചെയ്യുന്ന ഉപഹാരം പാഷനും പള്‍സറുമാണ്. സ്കൂളുകളില്‍ നിരോധിക്കപ്പെട്ട മൊബൈല്‍ ഫോണ്‍ എന്തിന്റെ പേരിലാണ് നമ്മുടെ കുട്ടിക്ക് നാം വകവെച്ചു കൊടുക്കുന്നതെന്ന് മനസ്സിലാവുന്നില്ല. ത്രീജിയും വൈഫൈയും അടക്കം അത്യാധുനിക സംവിധാനങ്ങളുള്ള മൊബൈല്‍ ഫോണുകള്‍ എങ്ങിനെയൊക്കെ ദുരുപയോഗം ചെയ്യപ്പെടുന്നുവെന്ന് ഒരു രക്ഷിതാവും വ്യാകുലപ്പെടുന്നുമില്ല. 'മാനസപുത്രി'യുടെ ദീനരോദനം തടസ്സപ്പെടാതിരിക്കാന്‍ മക്കളുടെ പഠനം അടച്ചിട്ട മുറികളിലേക്ക് ഒതുക്കപ്പെടുമ്പോള്‍, ആധുനിക പഠന സാമഗ്രികളില്‍ ഒന്നായ കമ്പ്യൂട്ടറില്‍ തെളിയുന്ന നീല വര്‍ണങ്ങളെ നമ്മുടെ പ്രിയപത്നിമാരും തിരിച്ചറിയുന്നില്ല!

ദിനേനെ നാം നടത്തുന്ന ഇന്റര്‍നെറ്റ് ടെലെഫോണ്‍ സംഭാഷങ്ങങ്ങളില്‍ മക്കളെ കുറിച്ച് എന്തൊക്കെ തിരക്കാറുണ്ട്. ബൈക്കില്‍ എണ്ണയടിക്കാന്‍ കാശ് കൊടുക്കാത്തതിനു ചീത്ത പറഞ്ഞ മകനെ കുറിച്ചുള്ള പരിഭവംപറച്ചിലില്‍ ഒതുങ്ങിപ്പോവുന്ന മാതാവായി, പകരമായി മകനെയൊന്നു ശാസിച്ചു കടമ തീര്‍ക്കുന്ന പിതാവായി രക്ഷിതാക്കള്‍ മാറിപ്പോകുന്നുവെങ്കില്‍ ചിന്തിക്കാനേറെയുണ്ട്. അരമണിക്കൂറിനു അമ്പത് പൈസ കൊടുത്തു വാടക സൈക്കിളില്‍ നാല് റൌണ്ട് അങ്ങാടിയില്‍ കറങ്ങി സന്ധ്യക്ക് മുമ്പേ വീടണഞ്ഞ നമ്മുടെ ചെറുപ്പത്തെ ഇന്നത്തെ തലമുറയുമായി താരതമ്യം ചെയ്യരുത്. കാലം വല്ലാതെ മാറിപ്പോയിരിക്കുന്നു. ഒപ്പം മാറാന്‍, കാലത്തിനും മുന്നേ ഓടാന്‍ മത്സരിക്കുന്ന പുതു തലമുറയില്‍ നമ്മുടെ മക്കള്‍ മാത്രം സുരക്ഷിതരാണെന്ന മുന്‍ വിധിയാണ് നമുക്കുള്ളതെങ്കില്‍ നാം അത് തിരുത്തിയെ മതിയാവൂ. നമ്മുടെ നാട്ടില്‍ നടന്ന ഒരു പിടി പഠനങ്ങളില്‍ തെളിയുന്നത് ധാര്‍മിക ജീവിതം നയിക്കുന്ന വിദ്യാര്‍ഥി സമൂഹം തുലോം തുച്ഛമാണ് എന്നത്രേ! ലൈംഗിക അരാചകത്വവും മയക്കുമരുന്നിന്റെ ഉപയോഗവും ദൈവത്തിന്റെ സ്വന്തം നാടിനെ സാത്താന്റെ സ്വന്തം നാട്ടിലേക്ക് വഴിനടത്തിക്കൊണ്ടിരിക്കുകയാണ്.

നമ്മള്‍ കടലിനിപ്പുറമായിപ്പോയത് കൊണ്ട് മാത്രം നമ്മുടെ മക്കള്‍ ധര്മച്യുതിയില്‍ പെട്ടുപോകാന്‍ പാടില്ല. മകനായാലും മകളായാലും അവരുമായി നല്ലൊരാത്മ ബന്ധം സ്ഥാപിച്ചെടുക്കാന്‍ നമുക്ക് കഴിയേണ്ടതുണ്ട്. ചൂരല്‍ കാണിച്ചു പേടിപ്പിക്കുന്ന പഴയ രക്ഷിതാക്കളല്ല ഇന്നിനാവശ്യം. ഫോണെടുത്ത് റസീവര്‍ ചെവിയില്‍ നിന്നും മാറ്റിപ്പിടിച്ചു നമ്മുടെ ചീത്ത പറച്ചിലിനെ 'ആസ്വദിക്കുന്ന' മക്കളാക്കി അവരെ നാം മാറ്റരുത്. നല്ലൊരു സൗഹൃദം; ഏറ്റവുമടുത്തൊരു കൂട്ടുകാരനോടെന്ന പോലെ നന്നായി ഇടപഴകുന്നൊരു ബന്ധം. അതാണ്‌ പുതു തലമുറ രക്ഷിതാക്കളില്‍ നിന്നും ആഗ്രഹിക്കുന്നത്. അങ്ങനെയൊരു ബന്ധം സ്ഥാപിക്കാന്‍ നമുക്ക് കഴിഞ്ഞാല്‍ അവരുടെ ആവശ്യങ്ങളിലെ തെറ്റും ശരിയും സൌമ്യമായി അവരെ ബോധ്യപ്പെടുത്താന്‍ അതുവഴി സാധിക്കും. ആഗ്രഹങ്ങളിലെ തെരഞ്ഞെടുപ്പിന് അന്യരുടെ മക്കളെയോ സിനിമാ താരങ്ങളെയോ മാതൃകകളാക്കുന്നതിനു പകരം നമ്മുടെ അഭിപ്രായം തേടപ്പെടും. നെല്ലും പതിരും വേര്‍തിരിച്ചറിയിക്കാന്‍ നമുക്കും കഴിയും. പലപ്പോഴും കുട്ടികള്‍ക്കുണ്ടാവുന്ന ചീത്ത അനുഭവങ്ങള്‍ മാതാപിതാക്കള്‍ അറിയാതെ പോകുന്നത് ഇത്തരമൊരു കൊടുക്കലും വാങ്ങലും സാധ്യമാവുന്നൊരു ബന്ധം അവര്‍ക്കിടയില്‍ ഇല്ലാതെ പോവുന്നത് കൊണ്ടാണ്. ഞാനിത് പിതാവിനോട്‌ പറഞ്ഞാല്‍ എന്നെ ചീത്ത പറയും എന്നു വിശ്വസിക്കുന്നൊരു കുട്ടി നാമറിയേണ്ട പലതും ഉള്ളിലൊതുക്കും. പങ്കുവെച്ചു പരിഹാരം കാണേണ്ടവ അവിടെ കിടന്നു ചീഞ്ഞളിയും. ഒടുവില്‍ ദുര്‍ഗന്ധം നാടു മുഴുവന്‍ വ്യാപിച്ച ശേഷമാവും നാമറിയുക. പക്ഷേ അപ്പോഴേക്കും സമയം വല്ലാതെ വൈകിപ്പോയിരിക്കും.

മക്കളുടെ മൊബൈല്‍ ഫോണുകളും കമ്പ്യൂട്ടറുകളും ഇടക്കൊന്നു പരിശോധിക്കാന്‍ നാം ആരെയെങ്കിലും ചട്ടം കെട്ടിയെ മതിയാവൂ. അനാവശ്യമെന്ന് നൂറു ശതമാനം ബോധ്യമുള്ള മൊബൈല്‍ ഫോണ്‍ കുട്ടികള്‍ക്ക് നല്‍കാതിരിക്കുക തന്നെയാണ് ഉചിതം. കമ്പ്യൂട്ടറുകള്‍ പഠനപ്രവര്‍ത്തനങ്ങളുടെ ഭാഗമാണെങ്കില്‍ പരമാവധി സ്വകാര്യത ഇല്ലാത്ത മുറികളില്‍ സ്ഥാപിക്കാന്‍ ശ്രദ്ധിക്കണം. ഇന്റര്‍നെറ്റ് കണക്ഷന്‍ അത്യാവശ്യമെങ്കില്‍ മാത്രം അനുവദിക്കണം. ഓരോ അന്വേഷണങ്ങളിലും അവരുടെ പഠനവും ആരോഗ്യവും കൂട്ടുകെട്ടുകളും ചര്‍ച്ചയാവണം. നാം നല്‍കുന്ന പണം അനാവശ്യമായി ചെലവഴിക്കപ്പെടുന്നില്ലെന്നു ഉറപ്പു വരുത്തണം. ധാര്‍മികകാര്യങ്ങളില്‍ ചെറിയൊരു അശ്രദ്ധ പോലും ഗുരുതരമാണെന്ന് അവരെ ബോധ്യപ്പെടുത്തണം. പെണ്മക്കളുടെ വസ്ത്ര ധാരണ രീതികളില്‍ അധാര്‍മിക പ്രവണതകള്‍ കടന്നു വരാതെ ശ്രദ്ധിക്കണം. ആളുകളുമായുള്ള ഇടപെടലുകളില്‍ പാലിക്കപെടേണ്ട മര്യാദകളും നിയന്ത്രണങ്ങളും നിരന്തരം ഒര്മിപ്പിക്കപ്പെടണം. നാം കാണുന്നത് പോലെ മറ്റുള്ളവരും നമ്മുടെ മക്കളെ കാണണമെന്നില്ല. അവരെത്ര ചെറുതാണെങ്കിലും, ഇടപെടുന്നത് അടുത്ത ബന്ധുക്കളാണെങ്കില്‍ പോലും കൃത്യമായ ശ്രദ്ധ അവരുടെ മേല്‍ ഉണ്ടാവണമെന്ന് ഭാര്യയോടും പറയണം.

ഇങ്ങനെയൊരു റിമോട്ട് കണ്ട്രോള്‍ നമ്മുടെ കൈയില്‍ ഇല്ലാതെ പോയാല്‍ കുടുംബത്തിനും സമൂഹത്തിനും ശാപമായ ഒരു തലമുറയാവും നാളെ വളര്‍ന്നു വരിക. മുന്‍വിധികള്‍ മാറ്റിവെച്ച്, പകരം തിരിച്ചറിവിന്റെ കണ്ണട വെച്ച് ഉത്തരവാദിത്തമുള്ള രക്ഷിതാവായി മാറാന്‍ ശ്രമിക്കാതെ, സ്നേഹത്തെ പണമാക്കി പരിവര്‍ത്തിപ്പിക്കാന്‍ തന്നെയാണ് ഇനിയും നാം ശ്രമിക്കുന്നതെങ്കില്‍ സ്വസ്തമായൊരു ജീവിതസായാഹ്നം നമുക്കന്യം തന്നെയായിരിക്കും.

മാണിയുടെ മനസ്സില്‍ മറ്റൊരു ലഡ്ഡു പൊട്ടി!

2011-05-14T14:52:00.003+03:00

അടുത്ത ഭരണം ആരുടെ കൈയ്യിലാവുമെന്ന നെഞ്ചിടിപ്പിന്‌ ഒരു മാസം നീണ്ട കാത്തിരുപ്പിനൊടുവില്‍ അറുതിയായി. ഇനി യു ഡി എഫ് ഭരിക്കും. എല്‍ ഡി എഫ് പ്രതിപക്ഷത്തിരിക്കും. പക്ഷെ, എത്ര കൊല്ലത്തേക്ക് എന്ന് മാത്രം ചോദിക്കരുത്. പരാജയത്തിന്റെ പടുകുഴിയില്‍ നിന്നും കഷ്ടിച്ച് രക്ഷപ്പെട്ട ടി എം ജേക്കബ് മുതലുള്ള ഏകാംഗ പാര്‍ട്ടികളും മലപ്പുറത്തിന്റെ മുത്തും പാലായുടെ സത്തുമൊക്കെയാവും ആ കാര്യം തീരുമാനിക്കുക. മുഖ്യമന്ത്രിപദം ഏതായാലും കോണ്ഗ്രസിന് തന്നെ 'ലഭിച്ചേക്കുമെന്നു' കൂടി വിലയിരുത്തേണ്ട വിധം കേരള ചരിത്രത്തില്‍ അപൂര്‍വമായി, ഭരിക്കുന്ന പാര്‍ട്ടി അംഗ സംഖ്യയില്‍ രണ്ടാം സ്ഥാനത്തേക്ക് തള്ളപ്പെടുന്ന ദയനീയ കാഴ്ചയ്ക്കും നാം സാക്ഷികളായിയിരിക്കുകയാണ്. അപൂര്‍വതകളുടെ കാഴ്ചകള്‍ ഇനിയുമൊരുപാട് വരാനിരിക്കുന്നുവെന്ന സൂചനകളാണ് ചില ഘടകകക്ഷി നേതാക്കളുടെ പ്രസ്താവനകള്‍ നല്‍കുന്നത്.

സകലമാന എതിര്‍പ്പുകളെയും മറികടന്നു കൊണ്ടുള്ള മുസ്ലിം ലീഗിന്റെ ചരിത്ര വിജയം കോണ്ഗ്രസ്സുകാരെ പോലും അത്ഭുതപ്പെടുത്തിയിരിക്കുന്നു എന്നതാണ് സത്യം. മുഖ്യമന്ത്രിയുടെ നേരിട്ടുള്ള ആക്രമണങ്ങള്‍ മുസ്ലിം ലീഗിന്റെ വിജയത്തെ തരിമ്പു പോലും ബാധിച്ചിട്ടില്ല. എന്നാല്‍, കേരളത്തിലെ മുസ്ലിം ജനസാമാന്യത്തിന്റെ യുഡിഎഫിനുള്ള പിന്തുണ മുസ്ലിം ലീഗില്‍ മാത്രം ഒതുങ്ങിപ്പോയിരിക്കുന്നു എന്നതും തെരഞ്ഞെടുപ്പു ഫലങ്ങള്‍ സാക്ഷ്യപ്പെടുത്തുന്നു. മുസ്ലിം പൊതുബോധത്തെ ഉള്‍ക്കൊള്ളാനോ അതിനനുസൃതമായ പ്രതികരണങ്ങള്‍ അടയാളപ്പെടുത്താനോ കഴിയാത്തവിധം ഒരു സമൂഹത്തെ രൂപപ്പെടുത്തുന്നതില്‍ മുസ്ലിം ലീഗിന്റെ നേതൃത്വം വിജയിച്ചിരിക്കുന്നു. ഇത്തരത്തിലുള്ള മുസ്ലിം ലീഗിന്റെ സ്ഥിരം വോട്ടുബാങ്കില്‍ വിള്ളലുകള്‍ വീഴ്ത്താന്‍ സാധിച്ചില്ലെങ്കിലും നിക്ഷ്പക്ഷ മുസ്ലിം വോട്ടുകള്‍ പെട്ടിയിലാക്കുന്ന കാര്യത്തില്‍ ഇടതുപക്ഷവും ലക്‌ഷ്യം നേടിയിരിക്കുന്നു. അതിന്റെ ശക്തമായ തെളിവുകളാണ് കേരളത്തിലെ അങ്ങോളമിങ്ങോളമുള്ള മുസ്ലിം ലീഗിന്റെ പോക്കറ്റുകളല്ലാത്ത മേഖലകളിലെ ഇടതുപക്ഷത്തിന്റെ വിജയം.

വിഎസ് എന്ന 'വൃദ്ധനെ' കേരളം ഉള്‍ക്കൊള്ളില്ലെന്ന 'യുവരാജാവിന്റെ' പ്രവചനത്തിനേറ്റ കനത്ത തിരിച്ചടി കൂടിയാണ് ഈ തെരഞ്ഞെടുപ്പ് ഫലം. പ്രായവും സൌന്ദര്യവുമല്ല, അനീതിക്കും അഴിമതിക്കുമെതിരെ ശബ്ദിക്കാനുള്ള ആര്‍ജവമാണ് ഒരു പാര്‍ട്ടീ നേതാവിനുണ്ടാവേണ്ടതെന്ന പാഠമാണ് ഇടതുപക്ഷത്തിന്റെ ശക്തമായ പ്രതിരോധം രാഹുലിനെ പോലുള്ള യുവനേതാക്കളെ പഠിപ്പിക്കുന്നത്. ഇന്നലെ കുഞ്ഞാലിക്കുട്ടി പ്രതികരിച്ചത് പോലെ ജനപക്ഷ പ്രവര്‍ത്തനങ്ങളിലൂടെ ശക്തമായ തിരിച്ചുവരവ്‌ നടത്താന്‍ ഒരു സര്‍ക്കാരിന് കഴിയുമെന്നതിന്റെ തെളിവാണ് ഈ തെരഞ്ഞെടുപ്പു ഫലം. മിമിക്രിക്കാരനെന്നും കോമാളിയെന്നും അപഹസിച്ചും പരിഹസിച്ചും ജനങ്ങളുടെ മുമ്പില്‍ വിഎസിനെ താറടിക്കാന്‍ ശ്രമിച്ചവര്‍ക്ക് തെരഞ്ഞെടുപ്പു ഫലം പുറത്തുവരുന്നതിന്റെ അവസാന നിമിഷങ്ങളെ ഒരു ഹൃദയാഘാതം കൂടാതെ തരണം ചെയ്യാന്‍ കഴിഞ്ഞത് ഏതോ മുന്‍കാല സുകൃതം കൊണ്ടാവണം. അത്രയ്ക്കും ഇഞ്ചോടിഞ്ച് പോരാട്ടം കാഴ്ചവെക്കാന്‍ ഇടതു പക്ഷത്തിനു കഴിഞ്ഞത് ഈ വൃദ്ധ നേതാവിന്റെ കരുത്തുറ്റ നേതൃഗുണവും തോമസ്‌ ഐസകിനെ പോലുള്ളവരുടെ ഭരണ മികവും തന്നെയാണ്.

തമ്മില്‍ തല്ലും പാരവെപ്പും മാറ്റിവെച്ചു നല്ലൊരു സര്‍ക്കാരുണ്ടാക്കാന്‍ കഴിഞ്ഞാല്‍ എല്‍ ഡി എഫ് സര്‍ക്കാര്‍ നിര്‍ത്തിയേടത്തു നിന്നും ഭരണം തുടങ്ങാന്‍ യു ഡി എഫ് തയ്യാറാവണം. അല്ലാതെ പഴയ ജനവിരുദ്ധ നയങ്ങള്‍ പൊടിതട്ടിയെടുത്തു ജനങ്ങളെ മറന്നുള്ള വികസന അജണ്ടകളുമായി മുന്നോട്ടു പോവാനാണ് നീക്കമെങ്കില്‍ ഒന്നോ രണ്ടോ വര്‍ഷങ്ങള്‍ക്കു ശേഷം കേരളമൊരു ഇടക്കാല തെരഞ്ഞെടുപ്പിലെക്കാവും നീങ്ങുക. താരതമ്യേന അഴിമതി മുക്തമായൊരു ഭരണം കാഴ്ചവെച്ചത് കൊണ്ട് മാത്രമാണ് ഇടതുപക്ഷം ഈ തെരഞ്ഞെടുപ്പില്‍ മണ്ണാങ്കട്ടയാവാതെ പോയതെന്ന കാര്യം യുഡിഎഫിന്റെ മനസ്സിലുണ്ടാവണം. അമൃത കുംഭം കൈയില്‍ കിട്ടുമ്പോഴേക്കും തലയടക്കം ഉള്ളിലേക്കിടുന്ന സ്വഭാവം വലതുപക്ഷം വെടിയണമെന്ന് സാരം.

യു ഡി എഫിന് ജന്മസിദ്ധമായ ചില സ്വഭാവങ്ങളുണ്ട്. ആ സ്വഭാവ വിശേഷങ്ങള്‍ ഇന്നലെ തെരഞ്ഞെടുപ്പു ഫലം പുറത്തു വന്നതു മുതല്‍ ചിലര്‍ പ്രകടിപ്പിച്ചു തുടങ്ങിയിട്ടുമുണ്ട്. തന്റെ പാര്‍ട്ടിക്ക് ലഭിച്ച ഒമ്പത് സീറ്റെന്ന മാന്ത്രിക സംഖ്യയെ എങ്ങിനെയൊക്കെ ഉപയോഗപ്പെടുത്താമെന്ന ചര്‍ച്ച മാണി സാറിന്റെ പാര്‍ട്ടിയില്‍ തുടങ്ങിക്കഴിഞ്ഞതായാണ് സൂചന. മുസ്ലിം ലീഗ് ചാടിയാല്‍ മുട്ടോളം മാത്രമാണെന്ന് കോണ്ഗ്രസിന് നന്നായറിയാം. എന്നാല്‍ മാണി സാര്‍ അങ്ങിനെയല്ല. ചട്ടിയും കടന്നുള്ള ചാട്ടത്തിനും അദ്ദേഹം തയ്യാറാവും. ഇടതുപക്ഷത്തോടൊപ്പം ചേര്‍ന്നൊരു ഭരണത്തിന് പോലും അവസാന നിമിഷം അദ്ദേഹത്തിന് മടിയുണ്ടാവില്ല. ഇതൊക്കെയും മനസ്സിലാക്കി കുഞ്ഞാലിക്കുട്ടിയെ നടുവില്‍ നിര്‍ത്തി തന്ത്രപരമായൊരു നീക്കുപോക്കിനാവും കോണ്ഗ്രസ് ശ്രമിക്കുക. മനസ്സില്‍ പൊട്ടിയ ലഡ്ഡുവിന്റെ മധുരം മാണി സാര്‍ എത്രകാലം മറച്ചു വെക്കുമോ അത്രയും കാലം യു ഡി എഫ് സര്‍ക്കാരിന് സ്വസ്ഥമായി ഭരിക്കാമെന്നേ ഇപ്പോള്‍ പറയാന്‍ കഴിയൂ.

നുണപ്പള്ളിയുടെ അവസാനത്തെ ആണി

2011-05-08T12:27:00.007+03:00

പുലിവാല് പിടിച്ച നായരെ നമുക്ക് മറക്കാം; പകരം മുടിനാര് പിടിച്ച കാന്തപുരമെന്നു തിരുത്തുകയുമാവാം. അബുദാബിയില്‍ നിന്നും 'ഇരന്നു' വാങ്ങിയ വ്യാജമുടിയെ തിരുമുടിയാക്കാന്‍ 'കുനാ കുനാ' മൈക്കിലൂടെ കരഞ്ഞും പറഞ്ഞും കൈകാലിട്ടടിച്ചും നാടായ നാടൊട്ടുക്കും കേശവിശദീകരണ മഹാമാഹമങ്ങള്‍ പൊടിപൊടിക്കവേ ഇടിത്തീ വീണു കറുത്ത് കരുവാളിച്ച കാന്തപുരത്തിന്റെ തലയില്‍ തേങ്ങക്ക് പകരം നല്ലൊരു ഉല്‍ക്ക തന്നെ വന്നു പതിച്ചതാണ് കേശ കഥയിലെ ഏറ്റവും പുതിയ വഴിത്തിരിവ്. നാല്പതു കോടിയുടെ മുടിപ്പള്ളി ഉണ്ടാക്കാന്‍ കളവും കളവിന്മേല്‍ കളവും പറഞ്ഞ് പണപ്പിരിവ് തകര്‍ത്താടവേ, പ്രസ്തുത കേശങ്ങള്‍ വ്യാജമാണെന്ന് അബുദാബിയില്‍ നിന്നും മുടി കൊടുത്ത അറബിയുടെ മൂത്ത സഹോദരന്‍ തന്നെ രേഖാമൂലം മാലോകരെ അറിയിച്ചപ്പോള്‍ തകര്‍ന്നു വീണത് കാന്തപുരം എന്ന പുരോഹിതന്റെ മുഖം മൂടി തന്നെയാണ്. മുടിപ്പള്ളിയുടെ ദിവ്യത്വം ആയിരത്തിന്റെ നാല് ലക്ഷം ഓഹാരികളാക്കി ആളുകളെ പറ്റിച്ചവര്‍ ഇനിയെങ്കിലും സത്യം തുറന്നു പറഞ്ഞ്, പിരിച്ചെടുത്ത പണം തിരിച്ചു കൊടുത്ത് അല്ലാഹുവിനോട് തൌബ ചെയ്തു മടങ്ങുകയാണ് വേണ്ടത്.

കീശയിലെ മുഷിഞ്ഞ നോട്ടുകളെണ്ണി കേരള സര്‍ക്കാര്‍ പ്രഖ്യാപിച്ച രണ്ടു രൂപാ അരിയും കാത്ത് ദിക്റും ചൊല്ലിയിരിക്കുന്ന പട്ടിണിപ്പാവങ്ങളുടെ കൂരയിലേക്ക്‌ നീണ്ട വാലുള്ള തലപ്പാവും അതിനേക്കാള്‍ നീളമുള്ള സലാമും ചൊല്ലി കയറി വരുന്ന 'മുസല്ല്യാക്കന്‍മാര്‍' ഇക്കഴിഞ്ഞ മാസങ്ങളില്‍ കേരളത്തിലെ സ്ഥിരം കാഴ്ചകളായിരുന്നു. ഒരുനാളും വരാത്തവരുടെ 'പട്ടിണിപ്പെരുന്നാളിലെ' വരവ് കണ്ട് വാ പൊളിച്ചന്താളിച്ചു പോയ വീട്ടുകാരന്‍ വെട്ടിത്തിളങ്ങുന്ന വെള്ളക്കുപ്പായക്കാരെ പൊടി പുരളാതെ ഒന്നിരുത്താന്‍ നാല് കാലും തികച്ചില്ലാത്ത സ്റ്റൂളുകളുമായി പലപ്പോഴും നിസ്സഹായരായിട്ടുണ്ട്. വീട്ടുകാരിയാവട്ടെ, ഉസ്താദുമാര്‍ക്ക് ഏലക്ക വെള്ളം കലക്കാന്‍ ഭരണിയിലെ വക്ക് മൂലകളില്‍ ഒട്ടിപ്പിടിച്ച പഞ്ചസാര മണികള്‍ തികയാതെ വന്നതിനാല്‍ ജീവിതം പോലെ പുകപിടിച്ചു കറുത്തപോയ അടുക്കള മൂലയില്‍ നാണിച്ചിരുന്നിട്ടുമുണ്ട്. തങ്ങളുടെ കഷ്ടപ്പാടില്‍ മനം നൊന്തു വല്ലതും സഹായിക്കാന്‍ വന്നവരാവുമെന്നു കരുതി ഭവ്യതയോടെ നീട്ടിയ കൈകളില്‍ 'തിരുകേശത്തിനൊരു ഉത്തമ കേന്ദ്ര'ത്തിന്റെ മള്‍ട്ടി കളര്‍ ആയിരം രൂപാ ടോക്കണ്‍ വന്നു വീണപ്പോള്‍ നേരത്തെ ചൊല്ലിയ ദിക്റിന്റെ മഹത്വമൊന്നു കൊണ്ട് മാത്രം പലരും ബോധം കെട്ട് വീണില്ലെന്നു മാത്രം! പിന്നെ നടക്കുന്നത് അസ്സലൊരു വഅളാണ്. പുണ്യറസൂലിന്റെ തിരുമുടി സൂക്ഷിക്കാന്‍ ഉസ്താദിനെ ചുമതലപ്പെടുത്തി കൊണ്ട് പ്രവാചക തിരുമേനി തന്നെ നേരിട്ട് സ്വപ്നത്തില്‍ അവതരിച്ച കഥ മുതല്‍ മര്‍ക്കസിലും അതിന്റെ ശാഖകളിലും വിതരണം ചെയ്യപ്പെട്ട മുടിവെള്ളം കുടിച്ച് മാറാവ്യാധികള്‍ സുഖപ്പെട്ടെന്ന കള്ളക്കഥ വരെ നീട്ടിയും കുറുക്കിയും ഈണം തെറ്റാതെയും ബിരിയാണി മണക്കുന്ന ഏമ്പക്കത്തിന്റെ അകമ്പടിയോടെ വീട്ടുകാരെ 'ബോധ്യപ്പെടുത്തും'. ഒടുവില്‍ വലിയൊരു ഭീഷണിയും; 'ഇതൊക്കെ കളവാണെന്ന് ഞമ്മളെ സമസ്തക്കാരും മറ്റു പുത്തന്‍ വാദികളും പ്രചരിപ്പിക്കുന്നുണ്ട്. വെറുതെ അത് വിശ്വസിച്ചു നരകത്തീയില്‍ കിടക്കേണ്ട. ഉസ്താദിന്റെ കൈയ്യിലുള്ള തിരുമുടിയില്‍ വിശ്വസിക്കാത്തവര്‍ ഇസ്ലാമല്ല. പറഞ്ഞില്ലെന്നു വേണ്ട!' അതോടെ പാവങ്ങള്‍ വീണു. ചുമരിനോട് ഒട്ടിക്കിടക്കുന്ന മര്‍ക്കസിന്റെ കലണ്ടറിനെക്കാള്‍ തങ്ങള്‍ നെഞ്ചോടു ചേര്‍ക്കുന്ന കാന്തപുരത്തെ അവിശ്വസിക്കാന്‍ അവര്‍ക്കാവില്ലല്ലോ;‍ അതിനപ്പുറം ഒന്നു ചിന്തിക്കാന്‍ പോലും അവരെ സമ്മതിക്കില്ലല്ലോ! ഇനിയെന്താലോചിക്കാന്‍? റേഷനരിക്കു മാറ്റിവെച്ചതും മരുന്ന് വാങ്ങാന്‍ കരുതിവെച്ചതും ചേര്‍ത്തിട്ടും ആയിരം തികയാതെ വന്നാല്‍ അയല്‍വീട്ടിലെ ഹസ്സന്‍ ഹാജിയോടു പോയി കടം വാങ്ങിയെങ്കിലും പാവങ്ങള്‍ ടോക്കണ്‍ വാങ്ങിക്കും. ഒരു ഇരയെ കൂടി വീഴ്ത്തിയ സന്തോഷം വിളിച്ചറിയിക്കുന്ന പുഞ്ചിരിയോടെ വന്നവര്‍ പടിയിറങ്ങുകയും ചെയ്യും.

മാസങ്ങള്‍ക്ക് മുമ്പ് തന്നെ ഈ ബ്ലോഗിലൂടെ വ്യാജ മുടിയുടെ ചിത്രങ്ങള്‍ പ്രസിദ്ധീകരിച്ചതോടെ കാരന്തൂരിയന്‍ നുണക്കൊട്ടാരം തകര്‍ന്നു വീണതാണ്. എണ്ണവും പെരുപ്പവും നിഴലും ആളുകളെ മുന്നില്‍ നേര്‍ചിത്രമായപ്പോള്‍ സഖാഫിമാരും അഹസനിമാരും വിഷയം തൊടാതെ വിശദീകരണ യോഗങ്ങള്‍ നടത്തുന്നതാണ് നാം കണ്ടത്. ഇടയ്ക്ക് ചിലര്‍ ഖസ്രജിയുടെ കയ്യിലെ മുടിക്കെട്ടിന്റെ നീളവും എണ്ണവും മുഅജിസത്ത് കറാമത്ത് ആണെന്ന് വാദിച്ച് നോക്കിയെങ്കിലും, എങ്കില്‍ പിന്നെയെന്തിന് കാന്തപുരം ഈ സിദ്ധികളൊന്നുമില്ലാത്ത ചെറിയൊരു മുടി ഏറ്റുവാങ്ങിയെന്നും കാന്തപുരം തന്നെ പങ്കെടുത്ത അബുദാബിയിലെ കേശ പ്രദര്‍ശന ചടങ്ങിന്റെ ഫോട്ടോകള്‍ കൈയ്യില്‍ ഉണ്ടായിട്ടും ഈ അത്ഭുത മുടിക്കെട്ടിന്റെ കാര്യം മാലോകരില്‍ നിന്നും മറച്ചുവെച്ചുവെന്നും മറു ചോദ്യമുയര്‍ന്നപ്പോള്‍ അവരും വായടച്ചു. അവിടെയുള്ളത് നാമറിയേണ്ട, നമ്മുടെ കൈയ്യിലുള്ളതിനു 'വ്യക്തമായ' സനദ് ഉണ്ട്, ഇനി സനദ് ഇല്ലെങ്കിലും നമ്മള്‍ ചിലതൊക്കെ വിശ്വസിച്ചേ തീരൂ എന്നു വരെ ചില പണ്ഡിത കേസരികള്‍ പറയുന്നത് കേട്ടപ്പോള്‍ സ്വന്തം അണികള്‍ പോലും അന്തംവിട്ടു പോയി. ഒരു പണ്ഡിതന്റെ മറുചോദ്യം ഇന്നും കേരളത്തില മതമണ്ഡലത്തിലെ ഏറ്റവും വലിയ 'വിഡ്ഢി ചോദ്യമായി' നിലനില്‍ക്കുന്നു. "ഈ മുടിക്ക് സനദ് ചോദിക്കുന്നവരുടെ ഭാര്യ പ്രസവിച്ച കുട്ടിയെ നഴ്സ് കൈയില്‍ കൊടുക്കുമ്പോള്‍, അകത്ത് ധാരാളം കുട്ടികള്‍ ഉണ്ടല്ലോ അതിനാല്‍ ഇത് എന്റെ കുട്ടി തന്നെ എന്നതിന് സനദ് എവിടെ എന്നു അയാള്‍ ചോദിക്കുമോ" എന്നു ചോദിച്ച സഖാഫിക്ക് ഏറ്റവും ചുരുങ്ങിയത് ഒരു അഹ്സനി പട്ടമെങ്കിലും അനുവദിച്ചു കൊടുക്കാന്‍ മര്‍ക്കസിന്റെ അധിപന്‍ തയ്യാറാവണം.

ശൈഖ് ഖസ്രജി അബുദാബിയില്‍ നടത്തിയ കേശപ്രദര്‍ശന ചടങ്ങിന്റെ കൂടുതല്‍ ഫോട്ടോകള്‍. കാന്തപുരം പങ്കെടുത്ത ഈ പരിപാടി കഴിഞ്ഞ വര്‍ഷം റമദാന്‍ ഇരുപത്തി മൂന്നാം രാവാണ്‌ നടന്നത്. (ഇതില്‍ ചിലത് കരിനാക്കില്‍ മുമ്പ് പ്രസിദ്ധീകരിച്ചിരുന്നു).

ഇങ്ങനെ ഒരു മുടി ഖസ്രജി കുടുംബത്തിന്റെ കൈയ്യില്‍ ഇല്ലായിരുന്നുവെന്നും അത് ഷെയ്ഖ്‌ ഖസ്രജി എവിടെ നിന്നോ സംഘടിപ്പിച്ചതാണെന്നും ഈ മുടിയുടെ ആധികാരികതയെ ആദ്യമായി ചോദ്യം ചെയ്ത സമസ്തയുടെ യുവപണ്ഡിതന്‍ അലവിക്കുട്ടി ഹുദവി വെളിപ്പെടുത്തിയിരുന്നു. ആ വെളിപ്പെടുത്തലിനു അടിവരയിടുന്നതാണ് അഹമ്മദ് ഖസ്രജിയുടെ ജേഷ്ഠസഹോദരന്‍ ഹസന്‍ ബിന്‍ ഷെയ്ഖ്‌ മുഹമ്മദ്‌ അല്‍ ഖസ്രിയുടെ കത്ത്. ചെമ്മാട് ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റി വൈസ് ചാന്‍സലറും അന്താരാഷ്ട്ര മുസ്‌ലിം പണ്ഡിതസഭാ അംഗവുമായ ഡോ. ബഹാഉദ്ദീന്‍ മുഹമ്മദ് നദ്‌വിയുടെ കത്തിനുള്ള മറുപടിയില്‍ തങ്ങളുടെ പിതാവിന്റെ കാലത്തോ അതിന് മുമ്പോ അങ്ങനെയൊരു മുടിയെ കുറിച്ച് കേട്ടിട്ട് പോലുമില്ലെന്ന് അദ്ദേഹം വെളിപ്പെടുത്തുന്നു. മാത്രമല്ല, അനുജന്‍ ഖസ്രജി ലോകത്തിലെ അന്‍സാര്‍ കുടുംബത്തിന്റെ നേതാവായി സ്വയം പട്ടാഭിഷകം വരെ നടത്തിയെന്ന് അദ്ദേഹം പറയുമ്പോള്‍ സംഗതിയുടെ കിടപ്പിനെ കുറിച്ച് ബുദ്ധിയുള്ളവര്‍ക്ക് ഏകദേശ ധാരണ ലഭിക്കും. ഇത്തരം പെരും നുണകളില്‍ തനിക്കോ കുടുംബത്തിനോ ഒരു ഉത്തരവാദിത്വവും ഇല്ലെന്നു അദ്ദേഹം ഭരണാധികാരികളെ മുമ്പ് തന്നെ അറിയിച്ചതായും കത്തില്‍ വ്യക്തമാക്കുന്നു.

ഹസന്‍ ഖസ്രജിയെ പുത്തന്‍ വാദിയായി മുദ്രയടിക്കുകയാവും കാന്തപുരവും കൂട്ടരും ഇനി ചെയ്യാന്‍ പോകുന്നത്. അല്ലെങ്കില്‍ ഇനിയും വലിയ കളവുകള്‍ എഴുന്നള്ളിക്കപ്പെട്ടേക്കാം. എന്തായാലും ഒരു കാര്യം സത്യമാണ്. തിരുനബിയെ കുറിച്ച് കളവു പറഞ്ഞ്, എവിടെ നിന്നോ കിട്ടിയ വ്യാജ മുടി പ്രതിഷ്ഠിച്ച ഒരു മുടിപ്പള്ളി നിര്‍മിച്ചു അതില്‍ കുഞ്ഞാടുകളെ തെളിച്ചു കൊണ്ടുപോയി തളച്ചിടാനുള്ള കാന്തപുരത്തിന്റെ നീക്കത്തിനേറ്റ മറ്റൊരടിയാണ് ഹസന്‍ ഖസ്രജിയുടെ കത്ത്. തിരുനബി ദര്‍ശനത്തിനു ആളുകള്‍ക്ക് ടിക്കറ്റ് മുറിക്കുന്ന പ്രവാചകന്റെ സ്വന്തം ആളായി വരെ അനുയായികളെ കൊണ്ട് 'സ്വപനം കാണിക്കുന്ന' കാന്തപുരത്തിന് വ്യാജമുടി കഥയുടെ ഹോംവര്‍ക്കില്‍ സാരമായ അബദ്ധം സംഭവിച്ചിട്ടുണ്ട്. സ്വന്തം പദവി ഉയര്‍ത്താന്‍ വേണ്ടി നാണം കെട്ട കളവുകള്‍ പ്രചരിപ്പിക്കുമ്പോള്‍ ചുറ്റിലും കണ്ണും കാതും തുറന്നു വെച്ച കുറേയേറെ ആളുകള്‍ ഉണ്ടെന്നത് അദ്ദേഹം മറന്ന് പോയി. തല പോയാലും സത്യം തുറന്നു പറയാന്‍ ആര്‍ജവമുള്ള ഇക്കൂട്ടരെ മറികടന്നും കേരളത്തിലൊരു നുണപ്പള്ളി പണിയാന്‍ തന്നെയാണ് കാന്തപുരത്തിന്റെ നീക്കമെങ്കില്‍ നടക്കട്ടെ എന്നേ പറയാന്‍ കഴിയൂ. എല്ലാം കാണുന്നവനും അറിയുന്നവനുമായി അല്ലാഹു ഉണ്ട് എന്നത് തന്നെ കാരണം!

പോറ്റമ്മ ജയിക്കട്ടെ!!!

2011-04-28T17:48:00.001+03:00

തികഞ്ഞ ബോധ്യത്തോടെ,
നിറഞ്ഞ ധൈര്യത്തോടെ
ഞാനെന്റെ മുഷ്ടി ചുരുട്ടട്ടെ...

ഖത്തറിലെ മണല്‍ത്തരികളെ സാക്ഷി നിര്‍ത്തി
മാതൃരാജ്യത്തിനെതിരെ മുദ്രാവാക്യമുയര്‍ത്തട്ടെ ;

കാസര്‍കോടിന്റെ കണ്ണീര്‍ മറന്ന,
കുത്തകക്കാരുടെ രക്ഷകന്‍ ചമഞ്ഞ
പെറ്റമ്മ തോല്‍ക്കട്ടെ...

ചങ്കൂറ്റത്തിന്റെ, ധീരതയുടെ ചൂണ്ടുവിരലുയര്‍ത്തിയ
പോറ്റമ്മ ജയിക്കട്ടെ!!!

തള്ളേ... ജമാഅത്ത് പെളര്‍ന്നില്ലേ..!!

2011-04-05T11:29:00.028+03:00

വടകര ലോകസഭാ മണ്ഡലത്തിലെ സര്‍വകാല സ്വതന്ത്രനായിരുന്നു കലന്തന്‍ ഹാജി. തന്നെ വിജയിപ്പിച്ചാല്‍ കുറ്റ്യാടിപ്പുഴ കടലാക്കുമെന്നു വരെ പറഞ്ഞ് നോക്കിയിട്ടും ഒരിക്കല്‍ പോലും കെട്ടിവെച്ച കാശ് ഹാജിയാര്‍ക്ക് തിരിച്ചുകിട്ടിയിരുന്നില്ല. എന്നിട്ടും നിരാശനാവാതെ മത്സരം തുടരവേ ഒരു തെരഞ്ഞെടുപ്പ് കാലത്ത് ഹാജിയുടെ പ്രചരണവാഹനം വടകരക്ക് പോകുംവഴി ചോറോട് റെയില്‍വേ ഗേറ്റില്‍ കുടുങ്ങി. നീണ്ട കാത്തിരിപ്പിനൊടുവില്‍ ട്രെയിന്‍ കടന്നു പോയി ഗേറ്റ് തുറന്നു യാത്ര പുനരാരംഭിച്ചപ്പോള്‍ ഹാജിയാരുടെ മൈക്ക് അനൌണ്‍സറും നല്ലൊരു തമാശക്കാരനുമായ വെള്ളൂര്‍ പിയുടെ വാക്കുകള്‍ മൈക്കിലൂടെ ഒഴുകിയെത്തി. "വടകരയുടെ പൊന്നോമന പുത്രന്‍ കലന്തന്‍ ഹാജി നയിക്കുന്ന വാഹന പ്രചരണ ജാഥയിതാ, നൂറുക്കണക്കിനു വാഹനങ്ങളുടെ അകമ്പടിയോടെ വടകരയെ ലക്‌ഷ്യം വെച്ച് നീങ്ങുകയാണ്... അനുഗ്രഹിക്കുക.. ആശീര്‍വദിക്കുക..." കേട്ടവരെ മുഴുവന്‍ പൊട്ടിച്ചിരിപ്പിച്ച, ഹാജിയുടെ വാഹനമായ ഓട്ടോയുടെ പുറകില്‍ കുടുങ്ങിയ വടകരയെന്നും കൊയിലാണ്ടിയെന്നും കോഴിക്കൊടെന്നും ബോര്‍ഡ് വെച്ച ബസ്സുകളിലെയും മറ്റു വാഹനങ്ങളിലേയും യാത്രക്കാരെ സ്വന്തം അനുയായികളാക്കി മാറ്റിയ ചരിത്ര പ്രസിദ്ധമായ ആ അനൌണ്സ് മെന്റിന്റെ തനിയാവര്‍ത്തനം ഇന്നലെ പലയിടങ്ങളിലും കേള്‍ക്കേണ്ടി വന്നതിനാലാണ് ഇത് വായനക്കാരുമായി പങ്കുവേക്കേണ്ടി വന്നത്.

പറഞ്ഞു വരുന്നത് ജമാഅത്തിലെ 'പൊട്ടിത്തെറി'യെക്കുറിച്ചാണ്. ജമാഅത്തെ ഇസ്ലാമിയില്‍ നിന്നും ഹമീദ് വാണിമേല്‍ രാജിവെച്ചുവെന്ന് കേട്ടപാടെ ഒരു പോസ്റ്റെഴുതാന്‍ തുനിഞ്ഞ എന്നെ അതില്‍ നിന്നും പിന്തിരിപ്പിച്ചത് ജമാഅത്തില്‍ ഉണ്ടാവുമെന്ന് പ്രചരിപ്പിക്കപ്പെട്ട സ്ഫോടന വാര്‍ത്തകളായിരുന്നു.ഓണ്‍ലൈന്‍ പത്രങ്ങളും ചാനലുകളും മാറി മാറി പരതിയിട്ടും പുറത്തു വന്ന സ്ഫോടന വാര്‍ത്തകളില്‍ ഒന്നു പോലും ഹിറാ സെന്ററില്‍ നിന്നായിരുന്നില്ല എന്നത് മറ്റു പലരെയുമെന്ന പോലെ എന്നെയും 'നിരാശപ്പെടുത്തി'.

നാദാപുരത്തെ സ്ഫോടനം വഴി അഞ്ച് യുവാക്കളെ ബലികൊടുത്തതിന്റെ പേരില്‍ അറസ്റ്റിലായ ലീഗ് പ്രവര്‍ത്തകനെ കുറിച്ചും മലബാര്‍ ലീഗെന്ന കേരള സ്റ്റേറ്റ് മുസ്ലിം ലീഗിലും പേരില്‍ മാത്രമുള്ള 'ഇന്ത്യന്‍' യൂണിയന്‍ മുസ്ലിം ലീഗിലും ഇരട്ട 'പൌരത്വം' നേടിയവര്‍ക്കെതിരെ ആ പാര്‍ട്ടിയില്‍ ഉണ്ടായ പൊട്ടിത്തെറിയെക്കുറിച്ചുമല്ലാത്ത വാര്‍ത്തകള്‍ ലഭികാതെ വരികയും കേഡര്‍ പാര്‍ട്ടിയില്‍ നിന്നും ഒരാളെ പോലും പ്രതീക്ഷിക്കുന്നില്ലയെന്ന് ഹമീദ് സാഹിബ് തന്നെ മനോരമയിലൂടെ സമ്മതിക്കുകയും ചെയ്ത സാഹചര്യത്തില്‍ ഇനിയും കാത്തിരിക്കുന്നതില്‍ അര്‍ത്ഥമില്ല.

ഹമീദിന്റെ ഓട്ടോയുടെ പുറകെ പാഞ്ഞ ബസ്സുകളിലെ യാത്രക്കാരില്‍ ഒരാള്‍ പോലും ഹിറാ സെന്ററില്‍ നിന്നും കയറിയവരായിരുന്നില്ല. വെള്ളിമാടുകുന്നില്‍ സ്റ്റോപ്പുണ്ടായിരുന്നിട്ടും ഒരാള്‍ പോലും കൈ കാണിച്ചിട്ടുമില്ല. പിന്നെയോ, കോഴിക്കോട്ടെ മറ്റു ചില കേന്ദ്രങ്ങളില്‍ നിന്നും മലപ്പുറത്ത്‌ നിന്നും പുറപ്പെട്ട കുറേ പേര്‍ ഗേറ്റില്‍ കുടുങ്ങിയത് കണ്ടു ഏതോ വിദൂഷകന്‍ നടത്തിയ അനൌണ്സ് മെന്റ് മാത്രമായിരുന്നു ഇന്നലെ കേട്ടതത്രയും.

സമീപകാലത്ത് പാര്‍ട്ടികളില്‍ നിന്നുമുള്ള കൂടുവിട്ടു കൂടുമാറ്റം വല്ലാതെ കൂടി വന്നിട്ടുണ്ട്. എണ്ണിപ്പറഞ്ഞാല്‍ ഒടുങ്ങാത്തവിധം വലുതാണ്‌ കാലുമാറ്റ വിദഗ്ധനിര. കാലുമാറ്റം ഏറ്റവും കൂടുതല്‍ സംഭവിച്ചിട്ടുള്ളത് സി പി എമ്മില്‍ നിന്നു തന്നെയാണ്. തൊട്ടു മുമ്പിലത്തെ നിമിഷത്തില്‍ പറഞ്ഞത് പോലും ഓര്‍മയില്ലാത്ത വിധം അല്ഷിമേഴ്സ് ബാധിതരായി മാറിയ യുവജനങ്ങളാണ് ഈ കൂട്ടത്തില്‍ ബഹുഭൂരിപക്ഷവുമെന്നത് കേരളീയ സമൂഹത്തെ ചിന്തിപ്പിക്കേണ്ടതുണ്ട്. ഓന്ത് പോലും തോറ്റു പോകും വിധം നിറം മാറാനുള്ള ഇവരുടെ കഴിവിനെ 'അംഗീകരിക്കാതെ' വയ്യ. ഈ ഗണത്തിലെ ഒടുവിലത്തെ കണ്ണിയാണ് ഹമീദ് വാണിമേല്‍. അദ്ദേഹം ജമാഅത്തിന് നേരെ ഉന്നയിച്ച ആരോപണം തന്നെയാണ് അദ്ദേഹത്തിന്റെ ഉദ്ദേശ്യ ശുദ്ധിയെ ചോദ്യം ചെയ്യാന്‍ പ്രേരിപ്പിക്കുന്നത്.

പിണറായി വിജയന്‍ എന്ന സി പി എം നേതാവുമായി ജമാഅത്ത് അമീര്‍ 'രഹസ്യ' ചര്‍ച്ച നടത്തിക്കളഞ്ഞുവത്രേ! നോക്കണം തമാശ. ഇക്കഴിഞ്ഞ തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പില്‍ സ്വന്തം പഞ്ചായത്തായ വാണിമേലില്‍ പോലും സി പി എമ്മുമായി ചര്‍ച്ച നടത്തി അവരുട പിന്തുണയോടെ സ്വതന്ത്രയെ മത്സരിപ്പിക്കാന്‍ മുന്‍കൈ എടുത്ത സാഹിബ് ഹമീദിന് ഇപ്പോള്‍ മാത്രം ഒരു ചര്‍ച്ച അപ്രസക്തമായി തോന്നുന്നത് എന്തടിസ്ഥാനത്തിലാണ്! മുസ്ലിം ലീഗുമായി കോഴിക്കോട്ടു നടത്തിയ, മുനീര്‍ പരസ്യമാക്കികളഞ്ഞ രഹസ്യ ചര്‍ച്ചയുടെ 'മുന്‍കൈ' ആരുടെതായിരുന്നു? അതിനും മുമ്പ് ഇടതും വലതും മുന്നണികളുമായി നിരന്തര ചര്‍ച്ചകള്‍ നടത്തുമ്പോള്‍ പൊളിറ്റിക്കല്‍ സെക്രട്ടറി ആരായിരുന്നു? ചോദ്യങ്ങള്‍ തിരിഞ്ഞു വരുന്നത് ഹമീദ് സാഹിബ് അറിയുന്നുണ്ടാവും.

ജമാഅത്ത് അമീര്‍ പറയുന്നത് വിശ്വസിക്കാതിരിക്കാന്‍ ന്യായമില്ല. പലരോടും ചര്‍ച്ച നടത്തുന്ന കൂട്ടത്തില്‍ പിണറായിയോടും സംസാരിച്ചിട്ടുണ്ട്. കോണ്ഗ്രസ്സിന്റെ ഭാഗത്ത് നിന്നും സാക്ഷാല്‍ എം. ഐ. ഷാനവാസ് തന്നെ ഹിറാ സെന്ററില്‍ നേരിട്ടെത്തി ചര്‍ച്ച നടത്തിയിട്ടുണ്ട്. യു ഡി എഫിലെ ഇപ്പോള്‍ പേര് വെളിപ്പെട്ടിട്ടില്ലാത്ത പലരും സംസാരിച്ചിട്ടുണ്ട്. എന്തിനു, ജമാഅത്തിന്റെ നിശിത വിമര്‍ശകന്‍ സാക്ഷാല്‍ വയനാടന്‍ ഷാജി വരെ സോളിഡാരിറ്റി കണ്ണൂര്‍ ജില്ലാ ആപ്പീസില്‍ പോയി സഹായമഭ്യര്‍ഥിച്ചിട്ടുണ്ട്.

ഒരു പ്രബല മുസ്ലിം സംഘടന എന്ന നിലയില്‍ അവരുമായി സംസാരിക്കാത്തവര്‍ ഇന്ത്യന്‍ രാഷ്ട്രീയത്തില്‍ ആരുമില്ല എന്നതാണ് സത്യം. തീവ്രവാദിയെന്നും ഭീകരവാദിയെന്നുമൊക്കെ പേര് ചൊല്ലി വിളിക്കുമെങ്കിലും നാളിതുവരെ ഒരു ഭീകര പ്രവര്‍ത്തനത്തിലും ആ സംഘടന ഉള്‍പ്പെട്ടതായി ഒരു വിമര്‍ശകര്‍ പോലും പറയില്ല. ജനകീയ പ്രശ്നങ്ങളില്‍ സജീവ സാന്നിധ്യമായി നിലകൊള്ളുമ്പോഴും അക്രമ സമരങ്ങളിലേക്ക് അവര്‍ പോയിട്ടില്ല. ഈയൊരു ബോധ്യം അവരെ കുറ്റം പറയുന്നവര്‍ക്ക് പോലും നന്നായുള്ളത് കൊണ്ടാണ് ചര്‍ച്ചകളും സംസാരങ്ങളും നിര്‍വിഘ്നം നടക്കുന്നതും.

ഇതൊക്കെയും ഹമീദിനും അറിയാം. പിന്നെയെന്താണിവിടെ സംഭവിച്ചത്? ആര്‍ക്കു പിന്തുണ കൊടുക്കണം എന്നു അന്തിമ പ്രഖ്യാപനം വരുന്നതിനു മുമ്പേ പാര്‍ട്ടി രഹസ്യങ്ങള്‍ പരസ്യമാക്കിയത് ആര്‍ക്കു വേണ്ടിയാണ്? മണ്ഡലങ്ങള്‍ തോറും കണ്‍വെന്ഷനുകള്‍ വിളിച്ചു പ്രവര്‍ത്തകരുടെ അഭിപ്രായം തേടിക്കൊണ്ടിരിക്കുന്ന വേളയില്‍ ഇങ്ങനെയൊരു പ്രഹസനം നടത്തുക വഴി ഹമീദ് ലക്‌ഷ്യം വെച്ചത് എന്തായിരിക്കും? ഉത്തരം കിട്ടാന്‍ കാത്തിരിപ്പല്ലാതെ മാര്‍ഗമില്ല. കാരണം, ജമാഅത്തിന്റെ ആശയ - ആദര്‍ശങ്ങളോട് അദ്ദേഹം വിയോജിപ്പ് പ്രകടപ്പിച്ചിട്ടില്ല. അവരെ തീവ്രവാദി എന്നു വിളിച്ചവര്‍ക്ക് നേരെയാണ് രോഷം. തെരുവില്‍ വെച്ച് ശാരീരികമായി നേരിട്ടവര്‍ക്ക് വോട്ട് നല്‍കുന്നതിലാണ് പരിഭവം. അങ്ങിനെയെങ്കില്‍ ജമാഅത്ത് ആരെ തുണക്കും? യു ഡി എഫിനെയോ? ഷാജിയേയും മുനീറിനെയും ആര്യാടനെയും രവിയെയുമൊക്കെ മറന്ന് കൊണ്ട്, രണ്ടു പ്രാവശ്യം അകാരണമായി അവരെ നിരോധിച്ചു നേതാക്കളെ ജയിലിലടച്ചു പീഡിപ്പിച്ച കോണ്ഗ്രസ്സിന്റെ ചെയ്തികളെ വെള്ളപൂശിക്കൊണ്ട്, കോട്ടക്കലില്‍ വെച്ച് പടിയടച്ചു പിണ്ഡം വെച്ച, വേളത്തു വെച്ച് ബോംബെറിഞ്ഞും തെരുവില്‍ തല്ലിയും കൃഷി നശിപ്പിച്ചും 'സൗഹൃദം' കാട്ടിയ ലീഗിനെ മാറോടു ചേര്‍ത്ത് കൊണ്ട് യു ഡി എഫിനൊരു സമ്പൂര്‍ണ്ണ പിന്തുണ അവര്‍ക്ക് സാധ്യമാണോ? എനിക്ക് തോന്നുന്നില്ല. ഇതൊന്നുമല്ലാതെ തെരഞ്ഞെടുപ്പില്‍ മാറി നില്‍ക്കാന്‍ കഴിയുമോ?

ഇവിടെ ജമാഅത്തിന് സാധ്യമായത് ഇത് മാത്രമാണ്. പരമാവധി തോമ്മന്മാരെ കണ്ടു പിടിക്കുക. തല്‍ക്കാലം അവരെ പിന്തുണക്കുക. അവിടെ ഇടതിന് മുന്‍‌തൂക്കം വന്നാല്‍ പോലും അതൊരു പ്രശ്നമാക്കേണ്ടതില്ല. കാരണം ഇതിനു മുമ്പും തൊമ്മന്‍മാര്‍ക്ക് അവര്‍ വോട്ട് കൊടുത്തിട്ടുണ്ട്. ഷാനവാസും ഇ ടി ബഷീരുമൊക്കെ ജയിച്ചു വന്നതും അങ്ങിനെയാണ്. അന്നൊന്നും തൊമ്മനെ തിരഞ്ഞപ്പോള്‍ ഇടതിന് മുന്‍‌തൂക്കം വന്നിട്ടും ഇല്ലാതെ പോയൊരു തുമ്മല്‍ ഇപ്പോള്‍ മാത്രം ഹമീദ് സാഹിബിനു ഉണ്ടായതെങ്ങിയാണെന്ന് എത്ര ആലോചിട്ടും മനസ്സിലാവുന്നില്ല.

ഒരു കാര്യം വ്യക്തമാണ്. ജമാഅത്തിന്റെ നേതൃത്വത്തില്‍ രൂപം കൊള്ളുന്ന പുതിയ രാഷ്ട്രീയ പാര്‍ട്ടി മറ്റു പല പാര്‍ട്ടിക്കാരുടെയും മനസ്സില്‍ ചില്ലറ അങ്കലാപ്പുകള്‍ സൃഷ്ടിച്ചിട്ടുണ്ട്. നിഷ്കൃയരായ യുവജന സംഘടനകളുടെ ഇടയില്‍ ശക്തമായ സാന്നിധ്യം വിളിച്ചറിയിച്ച സോളിഡാരിറ്റി പോലെ 'വെല്‍ഫെയര്‍ പാര്‍ട്ടിയും' വളരുകയാണെങ്കില്‍ അതിന്റെ അലയൊലികള്‍ പലരെയും അസ്വസ്ഥപ്പെടുത്തും. ഇത് മുന്‍കൂട്ടി കണ്ട ആരൊക്കെയോ ചേര്‍ന്ന് നടത്തിയ നാടകത്തിന്റെ ഒന്നാം രംഗമാണ് നാം കണ്ടത്. പക്ഷേ, കഥയിലെ നായകന് വേണ്ടി കുറേ ഫാന്‍സ്‌ ക്ലബ്ബുകള്‍ രൂപം കൊള്ളുമെന്നും അവരെ വെച്ച് പുതിയ കഥകള്‍ രചിക്കാമെന്നുമുള്ള സംവിധായകരുടെയും നിര്‍മാതാക്കളുടെയും വ്യാമോഹം തുടക്കത്തിലേ തകര്‍ന്നത് നാടകത്തിലെ മറ്റു രംഗങ്ങളുടെ ത്രില്ല് വല്ലാതെ കുറച്ചു കളഞ്ഞേക്കാം.

ഫ്രീകിക്ക്: എന്‍റെ എഴുത്ത് വായിച്ചു മടുത്തെങ്കില്‍ ഹമീദ് സാഹിബിന്റെ സാഹിത്യം അല്പമാവാം, ല്ലേ?

എലിയെത്ര കരഞ്ഞിട്ടെന്താ!

2011-03-30T12:09:00.008+03:00

കൂടെക്കിടക്കുന്നവര്‍ക്ക് രാപ്പനി അറിയുമെങ്കില്‍ ഉമ്മന്‍ ചാണ്ടിക്കും രമേശ്‌ ചെന്നിത്തലയ്ക്കും കലശലായ ജ്വരബാധയുണ്ടെന്ന കാര്യത്തില്‍ സംശയം വേണ്ട. ഇരുവര്‍ക്കും സാധാരണ പനിയല്ല. ട്രാവന്‍കൂര്‍ ടൈറ്റാനിയത്തില്‍ കെട്ടിക്കിടന്ന മാലിന്യത്തില്‍ നിന്നും പടര്‍ന്നു പിടിച്ച '256 കോടി ജ്വരം' തന്നെയാവാം. ഗുരുതരമായ രോഗം രണ്ടുപേര്‍ക്കും ഉണ്ടെന്നറിഞ്ഞിട്ടും മുന്‍ ആരോഗ്യമന്ത്രി കൂടിയായിരുന്ന രാമചന്ദ്രന്‍ മാസ്റ്റര്‍ രോഗവിവരം ഇത്രയും കാലം ഒളിച്ചു വെച്ചതില്‍ ദുരൂഹത ഇല്ലെന്നും പറഞ്ഞുകൂടാ. വീണ്ടുമൊരു എം എല്‍ എ സീറ്റിനുള്ള മോഹം പൂവണിയാതെ വന്നപ്പോഴുള്ള പൊട്ടി-തെറിയും പൊട്ടിക്കരച്ചിലുമായിരിന്നോ ഇന്നലെ തലസ്ഥാനത്ത് നടന്നത് എന്നതും കേവലം സംശയമായി കണ്ടു കൂടാ. ഏതായാലും ഒരു കാര്യം തീര്‍ച്ച. കോണ്ഗ്രസ്സുകാര്‍ അവരുടെ ജന്മസിദ്ധമായ ബലഹീനതകളില്‍ നിന്നും മുക്തമായൊരു കാലത്തെ കുറിച്ചുള്ള സ്വപ്നം പോലും അപ്രസക്തമാണ്! അഴിമതി അഴിമതി എന്നു രാമചന്ദ്രന്‍ മാഷെ പോലുള്ള മുതിര്‍ന്ന നേതാക്കള്‍ തന്നെ വിളിച്ചു പറഞ്ഞാല്‍, യുഡിഎഫ് നേതാക്കള്‍ക്ക് 'അഴി മതി, അഴി മതീ... പൂജപ്പുരയിലെ അഴി മതി' എന്ന് മുഖ്യമന്ത്രി തിരിച്ചു പറഞ്ഞില്ലെങ്കിലല്ലേ അത്ഭുതമുള്ളൂ!

മാഷ്‌ കരഞ്ഞു പറഞ്ഞു എന്നത് കൊണ്ട് സംഗതി തമാശയായി തള്ളിക്കളയാന്‍ പറ്റില്ല. മുപ്പത് കോടിയുടെ പദ്ധതി വേണ്ടിടത്ത് ഇരുന്നൂറ്റി അമ്പതിയാറ് കോടി രൂപയുടെ പദ്ധതി നടപ്പിലാക്കിയാല്‍ അവിടെ അഴിമതി നടക്കും എന്ന കാര്യത്തില്‍ സംശയമില്ല. അത് തുറന്നു പറഞ്ഞതാണ് രാമചന്ദ്രന്‍ മാസ്റ്റര്‍ക്ക് പറ്റിയ 'അബദ്ധം'. പിന്നീട് ഉമ്മചാണ്ടിയുടെ വക ഭീഷണി, ചെന്നിത്തലയുടെ വക തെറിപ്പാട്ട്, കോണ്ഗ്രസ്സിലെ നേതാക്കളുടെ ഗൂഡാലോചനയുടെ ഫലമായി കള്ളക്കേസ്, ഫോണ്‍ ചോര്‍ത്തല്‍, ഊരുവിലക്ക്‌! എങ്ങിനുണ്ട്? ഭീഷണിപ്പെടുത്താന്‍ ജയരാജനെക്കാള്‍ മിടുക്ക് ഉമ്മന്‍ - ചെന്നിത്തല കൂട്ടുകെട്ടിനുണ്ട് എന്നതിന്റെ തെളിവാണ് ഇന്നലെ തലസ്ഥാനത്ത് കുലംകുത്തിയൊഴുകിയ രാമചന്ദ്രന്‍ മാഷുടെ കണ്ണുനീര്‍ പുഴ. വെറുതെയല്ല ഭീഷണി രാഷ്ട്രീയത്തിന്റെ തലതൊട്ടപ്പന്‍ പി.കെ. ബഷീറിനെ യുഡിഎഫ് ഏറനാട്ട് സ്ഥാനാര്‍ഥിയാക്കിയത്!

മറ്റൊരു കാര്യം പറയാതിരുന്നു കൂടാ. ഇന്നലത്തെ കരച്ചില്‍ സമ്മേളനം നടത്തിയത് ഏതെങ്കിലും എല്‍ ഡി എഫ് മുന്‍മന്ത്രി, വേണ്ട മുന്‍ എംഎല്‍എ-യെങ്ങാന്‍ ആയിരുന്നെങ്കില്‍ എന്താകുമായിരുന്നു പുകില്! ഇന്നത്തെ പല പത്രങ്ങളും ചെയ്ത പോലെ വാര്‍ത്തയുടെ സ്ഥാനം മെയിന്‍ പേജിന്റെ അടിഭാഗതും പുറംഭാഗത്തും ഉള്ഭാഗത്തും ഒതുക്കപ്പെടുമായിരുന്നോ? ചാനലുകളില്‍ മുഖ്യവാര്‍ത്തകളില്‍ ഇടംപിടിക്കാതെ വരുമായിരുന്നോ? 'ചര്‍ച്ചജ്ഞന്‍'മാരുടെ നാക്കുകള്‍ അണ്ണാക്കിലേക്ക് ഇറങ്ങിപ്പോവുമായിരുന്നോ? ഇല്ല, ഇല്ലേയില്ല. നമ്മുടെ മാധ്യമങ്ങളുടെ പക്ഷപാത സമീപനങ്ങളെ കുറിച്ചുള്ള പരാതികളില്‍ കഴമ്പുണ്ടെന്ന് തോന്നുന്നത് അവിടെയാണ്. നമുക്ക് പുതിയൊരു ചാനല്‍ സംസ്കാരം ആവശ്യമാണെന്ന് ബോധ്യപ്പെടുന്നതും അപ്പോഴാണ്‌. ഇടതിനും വലതിനും വേണ്ടിയല്ല, ഇവരുടെ ഇടയില്‍ കുടുങ്ങി ഞെരിപിരി കൊള്ളുന്ന പൊതുജനങ്ങള്‍ക്കു വേണ്ടി സത്യത്തെ സാക്ഷ്യപ്പെടുത്തുന്ന ഒരു മാധ്യമ സംസ്കാരം ഇവിടെ ഉയര്‍ന്നു വരേണ്ടത് കാലത്തിന്റെ തേട്ടമാണ്‌.

ഏപ്രില്‍ പതിമൂന്നു അടുത്തെത്തുംതോറും തൊമ്മനെ തെരഞ്ഞെടുക്കുവാനുള്ള ദൌത്യം കൂടുതല്‍ ദുഷ്കരമാവുകയാണ്. ജനങ്ങള്‍ക്ക്‌ വേണ്ടത് മികച്ചൊരു ജീവിത സാഹചര്യമാണ്. അഴിമതിയും സ്വജന പക്ഷപാതവും ഇല്ലാത്തൊരു ഭരണമാണ്. രാഷ്ട്രീയക്കാരുടെ വിഴുപ്പലക്കലുകളില്‍ അവര്‍ക്ക് താല്പര്യമേയില്ല. അഴിമതിക്കെതിരെ ഉറച്ച ശബ്ദത്തില്‍ പറഞ്ഞാല്‍ ജനം കേള്‍ക്കും. അഴിമതിക്കാര്‍ക്കെതിരെ പാര്‍ട്ടി ആസ്ഥാനത്ത് നിരാഹാരം കിടക്കാതെ, പാര്‍ട്ടിയില്‍ നിന്നും രാജി വെച്ചിറങ്ങിപ്പോന്ന് നിയമത്തിന്റെ വഴി തേടുകയാണ് രാമചന്ദ്രന്‍ മാഷെ പോലുള്ളവര്‍ വേണ്ടത്. കരച്ചിലും പിഴിച്ചിലുമൊക്കെ കോണ്ഗ്രസ്സില്‍ പഴയ നമ്പരുകളാണ്. ശോഭനാ ജോര്‍ജും ചെന്നിത്തലയും ഇറക്കിപ്പൊളിഞ്ഞ നമ്പരുകള്‍. കോണ്ഗ്രസ്സുകാര്‍ നന്നാവും എന്ന് കരുതി കരഞ്ഞു വിളിച്ചാല്‍, പൊളിട്രിക്സുകാരന് ഒരു എപ്പിസോഡ് കൂടി കിട്ടുമെന്നല്ലാതെ അവരുടെ കണ്ണില്‍ നിന്നും ഒരു തുള്ളി കണ്ണുനീര്‍ പോലും പ്രതീക്ഷിക്കേണ്ട. പൂച്ച ഇത് കുറേ കണ്ടതാ മാഷേ!

ജയരാജോ... കൂതറയാവല്ലേ...

2011-03-29T09:27:00.012+03:00

സിനിമാതാരങ്ങള്‍ക്ക് കേരളത്തില്‍ ആരാധകര്‍ ഒരുപാടുണ്ട്. മതവും ജാതിയും പാര്‍ട്ടിയും ഒന്നുമൊന്നും താരാധനയ്ക്ക് വിലങ്ങുതടിയാവാറില്ല. ഇതേപോലെ, ചിലപ്പോള്‍ ഇതിലും കൂടുതല്‍ ആരാധകരുള്ള ഒരു വിഭാഗമായി മാറിക്കൊണ്ടിരിക്കുന്ന മറ്റൊരു താരസംഘമാണ് ദൃശ്യ-ശ്രാവ്യ മാധ്യമ പ്രവര്‍ത്തകര്‍. ഒരു പക്ഷേ, രാഷ്ട്രീയ നേതാക്കളേക്കാള്‍ ആളുകള്‍ ഇവരെ ഇഷ്ടപ്പെടുന്നുണ്ട്. നികേഷും വേണുവും ഷാനിയുമൊക്കെ ജനങ്ങളുടെ മനസ്സില്‍ താരവിഗ്രഹങ്ങളായി മാറിയത് അവരുടെ കഴിവ് കൊണ്ട് തന്നെയാണ്. വാര്‍ത്താവതാരകര്‍ക്ക് പുറത്ത് റിപ്പോര്‍ട്ടര്‍ എന്ന നിലയില്‍ തിളങ്ങി നില്‍ക്കുന്ന വ്യക്തിയാണ് ഏഷ്യാനെറ്റിലെ ഷാജഹാന്‍.

ചലച്ചിത്രതാരങ്ങള്‍ സാഹസികരംഗങ്ങള്‍ അഭിനയിച്ചു കയ്യടി നേടുമ്പോള്‍ ഷാജഹാനെ പോലുള്ളവര്‍ സാഹസികത അനുഭവിച്ചാണ് പ്രേക്ഷകരുടെ അഭിനന്ദനങ്ങള്‍ നേടിയെടുക്കുന്നത്. സമൂഹത്തിന്റെ ഒട്ടേറെ ജീര്‍ണതകള്‍ സാഹസിക മാധ്യമപ്രവര്‍ത്തനത്തിലൂടെ ലോകത്തിനു മുമ്പിലെത്തിക്കാന്‍ ഷാജഹാന്‍ എന്ന വികലാംഗനായ പത്രപ്രവര്ത്തകന് കഴിഞ്ഞിട്ടുണ്ട് എന്നത് മലയാളികള്‍ ഒന്നടങ്കം അംഗീകരിക്കുന്ന വസ്തുതയാണ്. ഇടതിനും വലതിനും അനുകൂലമായും എതിരായും ഒട്ടേറെ റിപ്പോര്‍ട്ടുകള്‍ ഷാജഹാനിലൂടെ പുറത്തു വന്നിട്ടുണ്ട്. അപ്പോഴൊക്കെയും സത്യത്തിന്റെ പക്ഷം ചേരുന്ന വലിയൊരു പ്രേക്ഷകസമൂഹം നീണ്ട കൈയ്യടികളോടെ ആ ചെറുപ്പക്കാരനെ പ്രോല്സാഹിപ്പിച്ചിട്ടുമുണ്ട്.

വാര്‍ത്തകളുമായി ചാനലില്‍ നിറയാറുള്ള ഷാജഹാന്‍ ഇന്നലെ ചാനലുകളിലും ഇന്ന് പത്രങ്ങളിലും വാര്‍ത്തയായി നിറഞ്ഞതിന്റെ കാരണം പി. ജയരാജന്‍ എം.എല്‍.എയും കൂട്ടാളികളും കണ്ണൂരില്‍ നടത്തിയ കലാ-കായിക പരിപാടിയായിരുന്നു.

നിയമസഭാ തെരഞ്ഞെടുപ്പുമായി ബന്ധപ്പെട്ടു ഏഷ്യാനെറ്റ് ചാനല്‍ നടത്തിവരുന്ന 'പോര്‍ക്കളം' പരിപാടിയുടെ പേരിനെ അന്വര്‍ത്ഥമാക്കുവാന്‍ ജയരാജന്‍ സഖാവിനെ പ്രേരിപ്പിച്ചത് സിപിഎമ്മിലെ പാര്‍ട്ടിവികാരമുള്ള നേതാവ് പി. ശശിയെ കുറിച്ചുള്ള ഷാജഹാന്റെ 'അധികപ്രസംഗ'മായിരുന്നു. പെണ്‍വാണിഭക്കാരെ കൈയ്യാമം വെച്ച് നടത്തിക്കാന്‍ ഒരുങ്ങിപ്പുറപ്പെട്ട സഖാവ് വിഎസ് മത്സരിക്കേണ്ടെന്ന് തീരുമാനിച്ച അതേ സംസ്ഥാനസമിതി ഒന്നിലധികം വനിതാ സഖാക്കളോട് വികാരഭരിതനായ പി. ശശിയെ താഴെ തട്ടിലേക്ക് 'സ്ഥലം' മാറ്റിയ വാര്‍ത്ത പുറത്തു വന്നപ്പോഴേ പാര്‍ട്ടി ലൈന്‍ കേരള ജനതയ്ക്ക് ഏകദേശം ബോധ്യപ്പെട്ടിരുന്നു. പി. ശശിക്ക് 'എല്ലാ അസുഖങ്ങള്‍ക്കുമുള്ള' ചികിത്സ കോയമ്പത്തൂര്‍ ആര്യവൈദ്യശാലയില്‍ ലഭിക്കുമെന്ന് പറഞ്ഞ മുഖ്യമന്ത്രിയെ തന്നെ മത്സരിപ്പിക്കാതെ ആക്രമിക്കാന്‍ ശ്രമിച്ച ജയരാജന്മാര്‍ക്ക് ഷാജഹാന്‍ എന്ന വികലാംഗന്റെ അടിവയറ്റില്‍ മുട്ടുകാലു കയറ്റാന്‍ വലിയ പ്രയാസമൊന്നും ഉണ്ടാവില്ലെന്നറിയാം. പക്ഷേ, രാഷ്ട്രീയത്തില്‍ തരിമ്പു പോലും താല്പര്യമില്ലാത്തവരടക്കം അല്പമെങ്കിലും രാഷ്ട്രീയം ശ്രദ്ധിക്കുന്ന തെരഞ്ഞെടുപ്പു കാലത്ത് ഇങ്ങനെയൊരു സാഹസം ചെയ്തത് 'ചരിത്രപരമായ വിഡ്ഢിത്ത'മല്ലാതെ മറ്റൊന്നുമല്ല.

ഫാഷിസത്തെ കുറിച്ച് പ്രസംഗിക്കാനും ചങ്ങല നിര്മിക്കാനുമൊക്കെ കാണിക്കുന്ന ആവേശം 'ഫാഷിസം' എന്താണെന്ന് പഠിക്കാനുള്ള കാര്യത്തിലും സിപിഎം കാണിക്കണം എന്നാണ് ഒരു കാഴ്ചക്കാരന്‍ എന്ന നിലക്ക് എനിക്ക് പറയാനുള്ളത്. തങ്ങള്‍ക്കു ഇഷ്ടമില്ലാത് കേള്‍ക്കുമ്പോഴുള്ള ഈ ഹാലിളക്കത്തിനും ഫാഷിസമെന്ന പേര് ചേരുമെന്ന് ജയരാജന്‍ അറിയണം. 'നാറിയവനെ പേറിയാല്‍ പേറിയവനും നാറും' എന്ന പഴമൊഴി മറന്ന് ശശിയെന്ന വികാരിയെ ചുമലില്‍ പേറി നടക്കുന്ന ജയരാജനും കൂട്ടര്‍ക്കും ധാര്‍മികതയെ കുറിച്ചോ നീതിന്യായത്തെ കുറിച്ചോ സ്റ്റഡീ ക്ലാസ് എടുക്കാനുള്ള അര്‍ഹത കൂടിയാണ് നഷ്ടമാവുന്നത്. ഷാജഹാന്‍ പറഞ്ഞതിനോടും ചോദിച്ചതിനോടും വിയോജിപ്പുണ്ടെകില്‍ പറയാനും അറിയിക്കാനും വേദികള്‍ ഇവിടെ ധാരാളമുണ്ടല്ലോ. സ്വന്തം ചാനലുകള്‍ തന്നെ മൂന്നെണ്ണം ഉണ്ടെന്നിരിക്കെ 'നാടന്‍ തല്ലു തൊഴിലാളിയെ' പോലെ ഗുണ്ടായിസം കാണിക്കാന്‍ പോയാല്‍ ഉള്ള വിലപോലും ഇടിഞ്ഞു പോവുകയേ ഉള്ളൂവെന്ന് ജയരാജനെ ഇനിയുമാരെങ്കിലും പഠിപ്പിക്കണോ? തല്ലിയിട്ടും അരിശം തീരാതെ മൊബൈലില്‍ വിളിച്ചു ഭീഷണിപ്പെടുത്തുന്നത് കൂടി ലോകം മുഴുവന്‍ കാണുമ്പോള്‍ എന്ത് പറഞ്ഞാണ് ജയരാജന്‍ സ്വന്തം ഭാഗം ന്യായീകരിക്കുക! കണ്ണൂര്‍ക്കാര്‍ തല്ലാനുള്ളവരാണെന്ന് ജയരാജനെ പോലൊരാള്‍ വിളിച്ചു പറയുന്നത് ആ നാടിനെ തന്നെ അപമാനിക്കലല്ലേ? അതോ, തല്ലുന്നതും കൊല്ലുന്നതും അഭിമാനമായി തന്നെയാണോ ജയരാജനും കൂട്ടരും ഇന്നും കാണുന്നത്? പഴയ സ്റ്റാലിന്‍ പ്രേമം ഇന്നും നിങ്ങളില്‍ ബാക്കിയുണ്ടെന്നാണോ?

വി എസിനെ പോലൊരാള്‍ പ്രായം പോലും വകവെക്കാതെ നേരിനും നീതിക്കും വേണ്ടി പടപൊരുതുന്നുവെന്ന ഇമേജ് നേടി മുന്നേറുമ്പോള്‍, അതുവഴി ലഭിക്കുമായിരുന്ന ആയിരക്കണക്കിന് വോട്ടുകളാണ് ജയരാജനെ പോലുള്ളവരുടെ ഒരു നിമിഷത്തെ വിവരക്കേട് മൂലം നഷ്ടമാവുന്നത് എന്നു തിരിച്ചറിയാന്‍ പാര്‍ട്ടിക്ക് കഴിയണം. ഇത്തരം ജയരാജന്‍മാരെ നിലക്ക് നിര്‍ത്താന്‍, ഫാഷിസത്തിന്റെ വക്താക്കളല്ല, എതിരാളികളാണ് തങ്ങളെന്ന് ജനങ്ങളെ ബോധ്യപ്പെടുത്താന്‍ പാര്‍ട്ടീ നേതൃത്വത്തിന് ബാധ്യതയുണ്ട്. അല്ലെങ്കില്‍, അശരണരുടെ, നിരായുധാരുടെ, വികലാംഗരുടെ വിരലിന്റെ ശക്തി ഈ തെരഞ്ഞെടുപ്പോടെ കേരളം ബോധ്യപ്പെടുത്തിതരികതന്നെ ചെയ്യും.

ഹുദവി തേടിയ സനദും കാന്തപുരത്തിന്റെ അടവും

2011-03-20T18:35:00.017+03:00

വ്യാജകേശ വിവാദത്തെ സംബന്ധിച്ച് നാലാമതൊരു പോസ്റ്റ്‌ കൂടി എഴുതണമെന്ന് ആഗ്രഹിച്ചതേയല്ല. രണ്ടാമത് പോസ്റ്റോടു കൂടി തന്നെ ചിന്തിക്കുന്നവര്‍ക്ക് കാര്യങ്ങള്‍ ബോധ്യമായതാണ്‌. എന്നാല്‍ സ്വന്തം ചിന്താശേഷി മറ്റുപലര്‍ക്കും പണയപ്പെടുത്തിയ ഒരു കൂട്ടര്‍ കളവുകള്‍ കൊണ്ട് പന്തല് കെട്ടുന്നത് കണ്ടപ്പോള്‍ അതൊന്നു പൊളിച്ചടുക്കാന്‍ തന്നെയാണ് തിരുനിഴല്‍ ദര്‍ശനം പ്രസിദ്ധീകരിച്ചത്. ഉറക്കം നടിക്കുന്നവരെ ഉണര്‍ത്താന്‍ കഴിയില്ലെന്ന് ഇടയ്ക്ക് പലരും ഓര്‍മപ്പെടുത്തിക്കൊണ്ടിരുന്നെങ്കിലും തല്‍ക്കാലം തീരുമാനത്തില്‍ ഉറച്ചു നിന്നത്തിന്റെ കാരണം, ഉറക്കം നടിച്ചവര്‍ പോലും 'ഉണര്‍ന്നെണീറ്റു' മര്‍ക്കസിലേക്കും സിറാജിലേക്കും നിരന്തരം നിര്‍ഭയം സത്യാവസ്ഥ അന്വേഷിച്ചു ഫോണിലൂടെയും നേരിട്ടും ബന്ധപ്പെട്ടു തുടങ്ങിയിരിക്കുന്നു എന്ന് ബോധ്യപ്പെട്ടത് കൊണ്ടായിരുന്നു. ഞാനും ഇടയ്ക്കിടയ്ക്ക് മര്‍ക്കസില്‍ വിളിച്ചു കളവുകളുടെ പുതിയ വേര്‍ഷനുകള്‍ ഇറങ്ങുന്നത് നിരീക്ഷിച്ചു വരികയായിരുന്നു. ഈ വിഷയവുമായി ബന്ധപ്പെട്ടു മര്‍ക്കസിലേക്ക് വിളിച്ച ഒരാള്‍ക്കും സത്യസന്ധമായ മറുപടി ലഭിച്ചിട്ടുണ്ടാവില്ലെന്നു എനിക്ക് നൂറു ശതമാനം ഉറപ്പുണ്ട്. ആര്‍ക്കെങ്കിലും സംശയമുണ്ടെകില്‍ മര്‍ക്കസിലേക്ക് ഒന്നു വിളിച്ചു നോക്കണം. ഖസ്രജിയുടെ കൈവശം നീണ്ട ഒരുപാട് മുടികള്‍ ഉള്ള കാര്യം ചോദിച്ചാല്‍ നിങ്ങള്‍ക്ക് ഇപ്രകാരം മറുപടി ലഭിക്കും. "അതൊക്കെ വെറുതെ പറയുന്നതാ... ആ മുടിയും ഈ മുടിയും രണ്ടും രണ്ടാ... ഉസ്താദിന് ലഭിച്ച മുടി ഒരു വിരലിന്റെ അത്ര വലുപ്പമേ വരൂ... അതിന്റെ 'വ്യക്തമായ' സനദും ഇവിടെയുണ്ട്." വീണ്ടും നിങ്ങള്‍ ചോദ്യം ആവര്‍ത്തിച്ചാല്‍ ഉത്തരം ഇങ്ങനെ വരും. "ഖസ്രജിയുടെ കൈയ്യില്‍ എന്തൊക്കെയുണ്ടെന്നു ഞങ്ങള്‍ അന്വേഷിച്ചിട്ടില്ല." അപ്പൊ ഈ ഖസ്രജിയും സനദും തമ്മില്‍ ബന്ധമൊന്നുമില്ലേ! പ്രവാചാകന്റെത് എന്നു പറഞ്ഞു കുറേ മുടിക്കെട്ടുകള്‍ സൂക്ഷിക്കുന്ന വ്യക്തി സനദില്‍ പ്രബലനാവുന്നതെങ്ങിനെ? ഇതിനുമുണ്ട് മറുപടി "സനദ് ജനലക്ഷങ്ങളുടെ മുന്നില്‍ വെച്ച് വായിച്ചു കേള്പ്പിച്ചതാ... ഈജിപ്ത് ഗ്രാന്‍ഡ്‌ മുഫ്തി അടക്കം വേദിയില്‍ സാക്ഷികളായതാ... ഇനിയും മതിയാവാതെ നേരില്‍ കാണേണ്ടവര്‍ മര്‍ക്കസിലേക്ക് നേരിട്ട് വന്നാല്‍ മതി"

ഇത്രയും കേട്ടാല്‍ ഒരുവിധം സാധാരണക്കാര്‍ അന്വേഷണ പരിപാടി നിര്‍ത്തും. എന്നാല്‍ ചെമ്മാട് ദാറുല്‍ ഹുദായിലെ ആബിദ് ഹുദവിക്ക് അങ്ങനെ തോറ്റു കൊടുക്കാന്‍ പറ്റില്ലെന്ന് തോന്നി. കാന്തപുരം അനുയായികളായ സുഹൃത്തുക്കളോടൊപ്പം മര്‍ക്കസിലെത്തിയപാടെ ഹുദവിയെ സ്വീകരിച്ചാനയിച്ചു കൊണ്ട് പോയത് ഉസ്താദിന്റെ ബുഖാരി ദര്സിലേക്ക്. അവിടെ എത്തുമ്പോഴേക്കും ക്ലാസ് കഴിഞ്ഞു പ്രാര്‍ത്ഥന തുടങ്ങിയിരുന്നു. ഖസ്രജിയില്‍ നിന്നും ലഭിച്ച മുടിയുടെ സനദ് നേരില്‍ കാണണമെന്ന ആഗ്രഹം ഉസ്താദിനെ ദൂതന്മാര്‍ മുഖേന അറിയിച്ചപ്പോള്‍ 'വരവ് ഔദ്യോകികമാണോ'യെന്ന മറുചോദ്യമുയര്‍ന്നു. അല്ലെന്ന മറുപടി കാന്തപുരത്തിന് ദഹിച്ചില്ല. 'എന്നാല്‍ കാണിക്കേണ്ട കാര്യമില്ല' എന്ന പ്രതികരണം ഉസ്താദില്‍ നിന്നും ആബിദ് ഹുദവി പ്രതീക്ഷിച്ചു കാണില്ല. 'സനദ് കാണമെങ്കില്‍ മര്‍ക്കസിലേക്ക് വാ' എന്ന് വലിയവായില്‍ ക്ഷണിക്കുന്നവരുടെ കപടമുഖമാണ് ആ യുവപണ്ഡിതന് മുമ്പില്‍ അനാവരണം ചെയ്യപ്പെട്ടത്. വന്ന സ്ഥിതിക്ക് കണ്ടോട്ടെയെന്ന സ്വന്തം അനുഭാവിയുടെ റെക്കമെന്റിന് ഫലമുണ്ടായി. ആകാക്ഷാപൂര്‍വമായ കാത്തിരിപ്പിനൊടുവില്‍ സ്ലേറ്റിന്റെ വലുപ്പത്തിലുള്ള 'സനദിന്റെ' ഫ്രെയിംഡ് കോപ്പി കൊന്നാലും കൈവിട്ടു തരില്ലെന്ന ഭാവത്തില്‍ മുറുക്കിപ്പിടിച്ച കാന്തപുരം വായന തുടങ്ങി. വായിച്ചു തുടങ്ങിയപ്പോഴാണ് ഹുദവിക്കും സംഗതി ബോധ്യമായത്. 'സനദ് മൂയെ മുബാറക് ' എന്ന ശീര്‍ഷകത്തിലുള്ള ഉര്‍ദുവില്‍ രേഖപ്പെടുത്തിയ സാക്ഷ്യപത്രം ബറക്കാത്തി കുടുംബം കൈമാറി എന്ന് പറയപ്പെടുന്ന താടി രോമത്തിന്റെതായിരുന്നു. അത് പോലും വ്യക്തമായ സനദല്ലെന്ന് കാന്തപുരം തന്നെ സാക്ഷ്യപ്പെടുത്തിയപ്പോള്‍ ഞെട്ടാതിരിക്കാന്‍ ഹുദവിക്കാവുമോ? വ്യക്തമായത് ഉസ്താദിന്റെ കൈയ്യില്‍ തന്നെയാണത്രേ ഉള്ളത്. എങ്കില്‍ പിന്നെ എന്തിനായിരുന്നു ഒരു ഡെമോ പ്രദര്‍ശനമെന്നൊന്നും ചോദിക്കരുത്. കുഫ്റു വരും! യുക്തിവാദിയാവും!! രണ്ടാമത്തെ മുടിയുടെ സനദിന് വേണ്ടി ആവശ്യമുയര്‍ന്നപ്പോള്‍ അവിടെ നടന്നത് ആസൂത്രിതമായ നാടകം തന്നെയായിരുന്നു. വേദിയിലേക്ക് ഓടിയെത്തുന്ന സഖാഫി, "ഉസ്താതെ...രണ്ടാമതെതിന്റെ സനദ് പിന്നെ ......" എന്ന പകുതി മുറിഞ്ഞ ഡയലോഗ്, " അതെ,അതെ...അത് പിന്നെ സംശയിക്കേണ്ടതില്ല ല്ലോ ..... ജന ലക്ഷങ്ങളുടെ മുമ്പില്‍ വെച്ചല്ലേ വായിച്ചു കേള്പിച്ചത് ....അതിന്റെ സീഡിയുമുണ്ടല്ലോ .!" എന്ന മുഖവുരയോടെ കാന്തപുരത്തിന്റെ ക്ലൈമാക്സ് ഡയലോഗും, "ഹിദായത്തുള്ളവര്‍ ഇത് അംഗീകരിക്കും...... അല്ലാത്തവര്‍ക്ക് പോകാം .....

കുഫ്ര്‍ വരണ്ടല്ലോ എന്ന്‍ വിചാരിച്ചു വായിച്ചതാ......." തിരിച്ചു പോരും വഴി ഹുദവിക്ക് മര്‍ക്കസില്‍ നിന്നും ഒരു ഫോണ്‍ "രണ്ടാമത്തേത് സമ്മേളനത്തില്‍ വെച്ച് വായിച്ചത് കൊണ്ടാ..." സംഗതി ക്ലീന്‍!!

ഗ്രൂപ്പ് മെയിലില്‍ ഹുദവിയുടെ വിശദീകരണം കണ്ടപ്പോള്‍ തന്നെ ഞാന്‍ അദ്ദേഹത്തെ വിളിച്ചു. താന്‍ മര്‍ക്കസില്‍ പോയി സനദ് കണ്ടു തൃപ്തിപ്പെട്ടെന്നത് പച്ചക്കള്ള പ്രചരണം മാത്രമാണെന്ന് അദ്ദേഹം വിശദീകരിച്ചു. ഉസ്താദിനെ കണ്ടപ്പോള്‍ കെട്ടിപ്പിടിച്ചു കരഞ്ഞുവെന്നു പോലും ഈ മനുഷ്യനെ കുറിച്ച് വാര്‍ത്തകള്‍ പ്രചരിപ്പിക്കുകയാണ് ഒരുകൂട്ടര്‍.

എങ്ങിനെയുണ്ട്? സനദ് കാണാന്‍ പോയ ഒരു യുവപണ്ഡിതന്റെ അനുഭവം ഇങ്ങനെയെങ്കില്‍ സാധാരണക്കാരായ ആളുകളെ മര്ക്കസിലേക്ക് വിളിച്ചു വരുത്തുന്നതിന്റെ യുക്തിയെന്താവും? പറ്റിപ്പോയ അബദ്ധം ഇനിയെങ്കിലും സമ്മതിക്കുന്നതാണ് ബുദ്ധി. ഒരു മുടിക്ക് വേണ്ടി കെഞ്ചി വര്‍ഷങ്ങളോളം ഖസ്രജിയുടെ പുറകെ കാന്തപുരം നടന്നിരുന്നുവെന്നാണ് സഖാഫികള്‍ പാടി നടക്കുന്നത്. ആ നടത്തത്തിനിടയില്‍ ഒരിക്കല്‍ പോലും ഖസ്രജിയുടെ കൈയ്യിലെ തിരുമുടിക്കെട്ടുകളുടെ യാഥാര്‍ത്ഥ്യം അന്വേഷിക്കാന്‍ കാന്തപുരം മിനക്കെട്ടില്ല എന്ന് വിശ്വസിക്കുക പ്രയാസം തന്നെയാണ്. പിന്നെയെന്താണ് സംഭവിച്ചത്? തിരുമുടിക്കെട്ടിലെ 'മുഅജിസത്ത് - കറാമത്ത് ' കൂടുതലുള്ള നീണ്ടു വളര്‍ന്ന മുടി സ്വീകരിക്കാതിരുന്നതെന്തു കൊണ്ട്? ഒരു വിരലോളം വലുപ്പത്തിലുള്ള മുടിയെക്കാള്‍ പ്രാധാന്യം നീണ്ടു വളര്‍ന്നു കൊണ്ടിരിക്കുന്ന മുടിക്കാണെന്ന് കാന്തപുരത്തെ ആരെങ്കിലും പഠിപ്പിക്കേണ്ടതുണ്ടോ? അതോ ഞാന്‍ മുമ്പ് സൂചിപ്പിച്ച പോലെ ലഭിച്ചിരിക്കുന്നത് ഒരു 'വിത്ത് മുടി'യാണോ? അതുമല്ല, ലഭിച്ച നീണ്ട മുടി വെട്ടി ചെറുതാക്കിയാതാണോ?

വ്യക്തമാക്കേണ്ടത് കാന്തപുരം തന്നെയാണ്. ഒന്നുകില്‍ ഖസ്രജിയുടെ കൈയ്യില്‍ മുടിക്കെട്ടില്ലെന്നു പരസ്യമായി പറയണം. അതല്ലെങ്കില്‍ ആ മുടിക്കെട്ടിന്റെ നീളവും എണ്ണവും ആളുകളില്‍ ഉയര്‍ത്തിയ സംശയങ്ങളെ ദൂരീകരിക്കണം. അല്ലാതെ, തനിക്കു കിട്ടിയ മുടി നീളം കുറഞ്ഞതാണെന്നും മറ്റുള്ളവയെ കുറിച്ച് താനറിയേണ്ട എന്നുമുള്ള നിലപാട് സ്വീകരിക്കുകയല്ല അദ്ദേഹം ചെയ്യേണ്ടത്. നീണ്ടു വളര്‍ന്നു പന്തലിച്ച ആയിരക്കണക്കിന് മുടിക്കെട്ടുമായി ഇരിക്കുന്ന ഒരാളെ തനിക്കു ലഭിച്ച കുഞ്ഞു മുടിയുടെ സനദിലെ പ്രബലവ്യക്തിയായി അവതരിപ്പിക്കാനുള്ള നീക്കം എത്രമാത്രം അപഹാസ്യകരമാണെന്ന് ഉസ്താദിനെ മര്‍ക്കസിലെ കുഞ്ഞാടുകളെങ്കിലും ഒന്നു ബോധ്യപ്പെടുത്തിക്കൊടുക്കണം.

ഞാന്‍ കഴിഞ്ഞ പോസ്റ്റില്‍ കൊടുത്ത കേശത്തിന്റെ നിഴലുള്ള ഫോട്ടോ വ്യാജമാണെന്നാണ് മറ്റൊരു ആരോപണം. പച്ചക്കള്ളം എന്റെ പോസ്റ്റില്‍ മാത്രമല്ല, നാടുനീളെ പ്രചരിപ്പിക്കുകയും ചെയ്യുന്നുണ്ട് ഇവര്‍. മുടിപ്പള്ളിക്ക് പിരിവിനു പോകുന്നവര്‍ വല്ലാഹി കൊണ്ട് പെരുമഴ പെയ്യിക്കുന്നത് കാണുമ്പോള്‍ ഇവരോട് തെറ്റിപ്പിരിഞ്ഞ ഒരു സഖാഫിയുടെ വാക്കുകള്‍ ഓര്‍ത്തു പോവുകയാണ്. 'ഉസ്താദ് വല്ലാഹി എന്ന് പറഞ്ഞാല്‍ ആ പറഞ്ഞത് കളവാണ്, സുമ്മ വല്ലാഹി എന്ന് പറഞ്ഞാല്‍ പച്ചക്കള്ളവും!'.

ഇത്രമാത്രം വിവാദം മുടിവിഷയത്തില്‍ ഉണ്ടായിട്ടും സമ്മേളനത്തില്‍ വായിച്ച 'ഖസ്രജി കുടുംബ സനദിനപ്പുറം' വ്യക്തമായ ഒരു രേഖയും ഹാജരാക്കാന്‍ മുടിവാദികള്‍ക്ക് കഴിയാത്തത് അവരുടെ പരാജയം തന്നെയാണ് വിളിച്ചു പറയുന്നത്. നാളെ മരണത്തെ അഭിമുഖീകരിക്കണം എന്ന ചിന്ത പോലും ഇക്കൂട്ടര്‍ക്ക് നഷ്ടമായിരിക്കുന്നു. മുടിയുടെ എണ്ണവും നീളവും വ്യക്തമാക്കുന്ന ഫോട്ടോകള്‍ കള്ളമാണെന്ന് പ്രചരിപ്പിച്ച്, ഖസ്രജിയുടെ വസ്ത്രത്തില്‍ നിഴല്‍ പതിക്കുന്ന ചിത്രം ഞാന്‍ നിര്‍മ്മിച്ചതാണെന്ന ആരോപണം ഉന്നയിച്ച് പറഞ്ഞു പോയ കളവുകള്‍ക്ക് മേലെ പുതിയ കളവുകള്‍ ഏച്ചുകെട്ടി മുടിപ്പള്ളിയുടെ ടോക്കണ്‍ വില്‍ക്കാന്‍ വേണ്ടി നാടു നീളെ ഓടിനടക്കുന്നതിനിടയില്‍ ഒരുനിമിഷം ചിന്തിക്കുക; വിയര്‍പ്പില്‍ കുളിക്കുന്ന പരലോക മൈതാനിയില്‍ നഫ്സി നഫ്സീയെന്ന വിളിക്കപ്പുറം പ്രവാചക തിരുമേനിയുടെ ശഫാഅത്ത് ചോദിക്കാന്‍ പോലും അര്‍ഹതയില്ലാതെ, പ്രവാചകരെ കുറിച്ച് കള്ളം പറഞ്ഞ് നരകത്തീയില്‍ സീറ്റൊരുക്കിയവരില്‍ നിങ്ങളും പെട്ടുപോയിട്ടുണ്ടോയെന്ന്! എങ്കില്‍ അന്ന് നിങ്ങള്‍ക്ക് വേണ്ടി വാദിക്കാന്‍, പുതിയ കളവുകള്‍ പഠിപ്പിക്കാന്‍ നിങ്ങളോടൊപ്പം കാന്തപുരം കാണില്ല, പ്രൊജക്ടര്‍ സ്ക്രീനുകളുമായി സഖാഫിമാരും ഉണ്ടാവില്ല!

തിരുമുടിക്കെട്ടിന്റെ തിരുനിഴല്‍ ദര്‍ശനം

2011-03-13T14:21:00.020+03:00

വളരുന്തോറും പിളരുകയും പിളരുന്തോറും വളരുകയും ചെയ്യുമെന്ന് പൊതുവേ പറയാറുള്ളത് കേരള കോണ്ഗ്രസ്സിനെ കുറിച്ചാണ്. എന്നാലിപ്പോള്‍ ആ വിശേഷണം തങ്ങളുടെ കൈയ്യിലുള്ള വ്യാജകേശത്തിനു കൂടി വകവെച്ചു തരണമെന്ന വാശിയിലാണ് കാന്തപുരം വിഭാഗം. 'എന്നെ കുറിച്ച് കളവു പറഞ്ഞവര്‍ നരകത്തില്‍ ഇരിപ്പിടം ഒരുക്കിക്കൊള്ളട്ടേ'യെന്ന് പ്രഖ്യാപിച്ച ലോക മുസ്ലിംകളുടെ എല്ലാമെല്ലാമായ പ്രവാചക തിരുമേനിയെ കുറിച്ച് കള്ളം പ്രചരിപ്പിച്ചവര്‍ ആ കളവിനെ സത്യമാക്കാന്‍ കളവുകളുടെ ഘോഷയാത്രയുമായി രംഗത്തിറങ്ങിയതാണ് പുതിയ വിശേഷം. തിരുമുടിയാട്ടത്തിന്റെ രണ്ടാം ഖണ്ഡം പുറത്തു വന്നതോടെ മാളത്തിലൊളിച്ച മുടിയാട്ടക്കാര്‍ പറഞ്ഞു നില്‍ക്കാന്‍ ഒരു വ്യാജ ഹദീസ് കൂടി ലഭിക്കാതെ വന്നപ്പോഴാണ് പുതിയ കളവുകളില്‍ അഭയം തേടിയത്. മറുപടിയെന്ന പേരില്‍ സിറാജില്‍ ലേഖന പരമ്പര വന്നപ്പോള്‍ പ്രതീക്ഷയുണ്ടായിരുന്നു. അതാകട്ടെ ഡോ. ബഹാവുദ്ധീനു നേരെയുള്ള കടന്നാക്രമണത്തില്‍ ഒതുക്കുവാന്‍ ലേഖകന്‍ വൈദഗ്ധ്യം കാണിച്ചുവെന്നതൊഴിച്ചാല്‍ ശൂന്യമായിരുന്നു ഫലം. ഈയുള്ളവന്റെ ആദ്യപോസ്റ്റിനെ ചെറുതായൊന്നു പോസ്റ്റുമോര്‍ട്ടം ചെയ്തെങ്കിലും രണ്ടാമത്തെ പോസ്റ്റ്‌ അദ്ദേഹം കണ്ടതേയില്ല!

വ്യാജ കേശത്തിന്റെ നീളവും എണ്ണവും ചൂണ്ടിക്കാട്ടി, പ്രവാചകന് ഇത്രയും മുടിയുണ്ടെന്നു തെളിയിക്കാന്‍ ആവശ്യപ്പെട്ടു കൊണ്ട് പുറത്തു വന്ന പോസ്റ്റില്‍ ഒരു ബ്ലോഗര്‍ ആദ്യമിട്ട കമന്റ് ഇപ്രകാരമായിരുന്നു. 'തികച്ചും തമാശയായി എന്റെ അഭിപ്രായത്തെ കാണുക. മുടി പ്രവാചകന്റെയാണെങ്കിൽ അതിന് ദിവ്യത്വം ഉണ്ടാകുമല്ലൊ ആ രീതിയിൽ കുറ്റിമുടി വളർന്നാലും അത്ഭുതപ്പെടാനുണ്ടൊ..? ദിവ്യത്വമുള്ള മുടി മുറിച്ചുകളഞ്ഞാലും വളരും..!' ഈ കമന്റു പബ്ലിഷ് ചെയ്തു മൂന്നാം നാള്‍ വരെ എന്നെ കൊണ്ട് വിഷയം മാറ്റിക്കാന്‍ മാത്രമായിരുന്നു എതിര്‍വിഭാഗത്തിന്റെ ശ്രമം. അതിനിടയില്‍ ഉസ്താദുമാരായ ഉസ്താദുമാരെയെല്ലാം സമീപിച്ചിട്ടും കിത്താബായ കിത്താബുകളൊക്കെ പരതിയിട്ടും പ്രവാചകന് പെണ്കുട്ടികളുടെത് പോലെ നീളമുള്ള മുടിയുണ്ടായിരുന്നുവെന്ന ഹദീസ് മാത്രം പഴയ 'അനിക്സ്പ്രേ' പരസ്യം പോലെ പൊടിപോലുമില്ല കണ്ടുപിടിക്കാന്‍ എന്ന് ബോധ്യമായതോടെ കഴിഞ്ഞ നൂറ്റാണ്ടില്‍ ജീവിച്ച യൂസുഫ് അല്‍ നബ്ബാനിയെ സര്‍വാംഗീകൃത പണ്ഡിതനായി രംഗത്തിറക്കിയിരിക്കുകയാണിക്കൂട്ടര്‍! പ്രസ്തുത ബ്ലോഗര്‍ പറഞ്ഞ തമാശ കാര്യമായി പുലര്ന്നുവെന്നര്‍ഥം !

ഖസ്രജിയുടെ കൈവശമുള്ള മുടി സ്വയം വളര്‍ന്നു വികസിച്ചു ചാടിക്കളിക്കാന്‍ തുടങ്ങിയ കാര്യം മാലോകരോട് 'വെളിപ്പെടുത്താന്‍' എന്‍റെ പുതിയ പോസ്റ്റ്‌ പുറത്തിറങ്ങുന്നത് വരെ കാത്തിരിക്കേണ്ടിവന്നു എന്നത് നമുക്ക് മറക്കാം. ഒരുകാര്യം എനിക്കുറപ്പുണ്ട്. ഈ നീണ്ട മുടി വിവാദമാകുന്നത് കാന്തപുരം മുമ്പേ ഓര്‍ത്തിരുന്നെങ്കില്‍ നല്ലൊരു ബാര്‍ബറെ ഖസ്രജിക്ക് അദ്ദേഹം ഏര്‍പ്പാടാക്കി കൊടുക്കുമായിരുന്നു. ഇപ്പോള്‍ ഈ 'അവകാശവാദ'ത്തിന്റെ ഉത്തരവാദിത്വം ഏറ്റെടുക്കാന്‍ ഒരു സഖാഫിയും മുന്നോട്ടു വന്നിട്ടില്ല എന്നത് ഇതൊരു 'പരീക്ഷണവാദമാണ്' എന്നതിന്റെ തെളിവായി വേണം കാണാന്‍. ഏതെങ്കിലും ബ്ലോഗില്‍ കാന്തപുരം എന്ന് കേള്‍ക്കുമ്പോഴേക്കും സര്‍വം ഏറ്റെടുത്ത് വെല്ലുവിളികളുമായി രംഗത്തിറങ്ങാറുള്ളവര്‍ വരെ ഈ പ്രസ്താവനകളുടെ ഉത്തരവാദിത്വം ഏല്‍ക്കാന്‍ തയ്യാറല്ല എന്നതാണ് കൌതുകകരം. എന്നാല്‍, ഇവര്‍ക്കും ഇങ്ങനെ ഒരു മറുപടി മുഖേന വ്യാജകേശം തിരുകേശമാക്കാന്‍ കഴിയുമോ എന്നറിയണം! ഹദീസ് തെളിവ് ചോദിക്കുമ്പോള്‍ അതിനു പകരം അടുത്ത കാലത്ത് ജീവിച്ച സാക്ഷാല്‍ കാന്തപുരത്തെ പോലുള്ള ഒരു വ്യക്തിയെ തെളിവായി ഉദ്ദരിക്കേണ്ടി വരുന്ന അവസ്ഥ ദയനീയമാല്ലാതെ മറ്റെന്താണ്? മുടി വളര്‍ന്നു പന്തലിക്കുമെന്നത് വിമര്‍ശകര്‍ക്കെന്ന പോലെ മുടിയനുകൂലികള്‍ക്കും പുതിയ അറിവായിരുന്നു. അതുവരെ അവരുടെ ന്യായീകരണം, പ്രവാചകന്‍ പ്രവാചകത്വം ലഭിക്കുന്നതിനു മുമ്പ് ഇങ്ങനെ മുടി നീട്ടി വളര്‍ത്തിയിരിക്കാം എന്നതായിരുന്നുവെന്നത് തമാശയായി പറയുന്നതല്ല. കാന്തപുരത്തിന് ലഭിച്ച വ്യാജകേശത്തെ എങ്ങിനെയെങ്കിലും തിരുകേശമാക്കണം എന്ന വാശിയില്‍ നിന്നും വരുന്ന ന്യായീകരണങ്ങളായി മാത്രം നമുക്കിത് കാണാം. എന്നാല്‍ കേശം സ്വയം വളരുമെന്നും ഒരു മുടി പലതായി മാറുമെന്നും സ്വയം ചലിക്കുമെന്നുമൊക്കെ വാദിച്ച് മുടിയുടെ നീളത്തെ ന്യായീകരിക്കേണ്ടി വരുന്നത് എത്രമാത്രം അപഹാസ്യകരമാണ്! ഇദ്ദേഹത്തിന്റെ വാദം വെച്ച് എനിക്കും പറയാം, എന്‍റെ കയ്യില്‍ തിരുകേശം എത്തിയെന്ന്. അത് പെറ്റു പെരുകി തിരുമുടിക്കെട്ട് തന്നെയായിമാറിയെന്ന്! അബുദാബിയില്‍ നിന്നും ഖത്തറിലേക്ക് പറന്നെത്താന്‍ തിരുമുടിക്ക് കഴിയില്ലെന്ന് ആര്‍ക്കു തെളിയിക്കാന്‍ പറ്റും! തങ്ങള്‍ പറയുന്നതെന്തും തക്ബീര്‍ മുഴക്കി അംഗീകരിക്കുന്ന കുറച്ചാളുകളെ കണ്ടു എന്ത് വിഡ്ഢിത്തവും പറയാമെന്നാണോ? ഒരുകാര്യം സംഭവിച്ചേക്കാം. ഇനി കാന്തപുരത്തിന്റെ കയ്യിലെ ഒരു മുടിയിഴ വളര്‍ന്നു വികസിക്കും. പടര്‍ന്നു പന്തലിക്കും. മുടിപ്പള്ളികള്‍ ഇന്ത്യ മുഴുവന്‍ വ്യാപിക്കുകയും ചെയ്യും. വീണത് വിദ്യയാക്കാന്‍ ഉസ്താദിനെ ആരും പഠിപ്പിക്കേണ്ടല്ലോ!

ഇടയ്ക്ക് വെച്ച് ഒരു കാന്തപുരം അനുയായി എന്നേയും വായനക്കാരെയും മുന്നറിയിപ്പ് തന്നു 'മുള്‍മുനയില്‍' നിര്‍ത്തിയത് മറക്കാനാവില്ല. 'ഈ കഥയറിയാതെ ആട്ടം ആടിയവരും അത് കണ്ട് ആടിയവരും അല്പം കാത്തിരിക്കുക. ഈ വ്യാജ പ്രചരണത്തിന്റെ യാഥാർത്ഥ്യം അടുത്ത ദിവസം അറിയുമ്പോൾ ഈ ബ്ലോഗ് പോസ്റ്റ് നീക്കം ചെയ്യാൻ തയ്യാറാവുക. ആശംസകൾ അർപ്പിച്ച് കൂടെയാടിയവരോടും കൂടിയാണീ അറിയിപ്പ് ' ഇത് കേട്ടാല്‍ എങ്ങിനെ ഞെട്ടാതിരിക്കും. ഒരാഴ്ചയോളം ഞെട്ടിവിറച്ചു കഴിഞ്ഞ് കൂടിയത് മിച്ചം. ചില ആധികാരികതകള്‍ ഉറപ്പു വരുത്തുകയാണെന്ന് ഇടയ്ക്ക് അറിയിപ്പ് തന്നുവെന്നതൊഴിച്ചാല്‍ മറ്റൊന്നും സംഭവിച്ചില്ല. തല്‍ക്കാലം സമയക്കുറവു മൂലം മറുപടി തരുന്നില്ലത്രേ! ശ്രദ്ധേയന് അപരനെ വരെ ഉണ്ടാക്കി ഇതിനിടയില്‍ ചിലര്‍. പഠിച്ചതും പഠിക്കാത്തതുമായ സര്‍വ അടവുകളും പയറ്റിയിട്ടും മുടിയുടെ നീളം തെളിയിക്കാനോ പോസ്റ്റിന്റെ 'വ്യാജം' തെളിയിക്കാനോ ഇക്കൂട്ടര്‍ക്ക് കഴിഞ്ഞില്ല. ഞാന്‍ സമസ്ത മെമ്പര്‍ പോലുമല്ല എന്ന് പോലും പറയേണ്ടി വന്നവര്‍ പറയാതെ പറഞ്ഞത് 'എനിക്കും ഈ മുടി തിരുകേശമാണെന്ന് ഉറപ്പില്ല' എന്നുതന്നെയാണ്.

പുതിയൊരു മറുപടി ഈ വിഷയത്തില്‍ ലഭിച്ചത് രസകരമാണ്. പരീക്ഷണ നിരീക്ഷണങ്ങള്‍ ഒരുപാട് നടത്തിയാണത്രേ ഇവര്‍ മുടിയുടെ ആധികാരികത ഉറപ്പു വരുത്തിയത്. കത്തിച്ചിട്ടും കത്താതെ ദിക്‌റ് ഹല്ഖകളില്‍ തെന്നി നീങ്ങിയത്രേ പ്രസ്തുത മുടി! കാന്തപുരത്തിന്റെ കൈയ്യിലെ ത്രിമുടിയിഴകളില്‍ ഈ പരീക്ഷണം ആവര്‍ത്തിക്കില്ലെന്ന് നമുക്കുറപ്പിക്കാം. പുതിയൊരു സ്വപ്നവും വ്യഖ്യാനവുമൊക്കെയായി പുതിയ മുടി സംഘടിപ്പിക്കാനുള്ള ബുദ്ധിമുട്ടിന് ഇനിയേതായാലും അദ്ദേഹം നില്‍ക്കുമെന്ന് തോന്നുന്നില്ല. ‍

കളവുകള്‍ പറഞ്ഞിറക്കുമ്പോഴും തെളിവുകള്‍ ഓരോന്നായി പുറത്തു വന്നു കൊണ്ടിരിക്കുകയാണ്. തിരുകേശത്തിനു നിഴലുണ്ടാവില്ലെന്ന ഇവരുടെ തന്നെ അവകാശവാദത്തെ തകര്‍ത്തു തരിപ്പണമാക്കുകയാണ് ദുബായിലുള്ള സുന്നീ പണ്ഡിതന്‍ അലവി അല്‍ ഹുദവി തന്റെ മൊബൈലില്‍ പകര്‍ത്തി പുറത്തു വിട്ട, ഖസ്രജിയുടെ നെഞ്ചില്‍ പതിഞ്ഞ 'തിരുനിഴലുകള്‍' ഉള്‍ക്കൊള്ളുന്ന ഫോട്ടോ.

വ്യാജകേശമെന്നു ഇനിയും സമ്മതിക്കാത്തവര്‍ക്ക് കിത്താബുകകള്‍ ഇനിയും പരതാം. പുതിയ നബ്ബാനിമാരെ തെളിവ് നിരത്താം. സ്വന്തം കണ്ണുകളെ പോലും വിശ്വാസത്തിലെടുക്കാതെ സ്വയം അന്ധത വരിച്ചവര്‍ക്ക് മുടിപ്പള്ളിയുടെ ടോക്കണ്‍ വില്പന തുടരുകയുമാവാം. പക്ഷെ, ഒടുവില്‍ നിങ്ങളില്‍ ചിലര്‍ പറഞ്ഞ പോലെ നിങ്ങളുടെ വിശ്വാസവുമായി നിങ്ങള്‍ക്ക് ജീവിക്കാമെന്നല്ലാതെ, വ്യാജകേശത്തെ തിരുകേശമെന്നു പേര് വിളിക്കാന്‍ ഒരുക്കമില്ലാത്ത ഒരുപിടിയാളുകള്‍ ഇവിടെയുണ്ട്. അവര്‍ക്ക് യുക്തിവാദിയെന്നും മുനാഫിഖെന്നും മുര്‍ത്തദ്ധെന്നും പേര് ചാര്ത്തിക്കളയരുത്. ആ വിളി കേട്ട് മൌനിയായിരിക്കാന്‍ കഴിയാത്തവരാണധികവുമെന്നതും മറക്കരുത്; പ്ലീസ്.

തിരുമുടിയാട്ടം: രണ്ടാം ഖണ്ഡം

2011-03-03T16:43:00.032+03:00

മുനാഫിഖ്, അബൂജഹല്‍, മുര്‍ത്തദ്ദ്, സ്റ്റുപ്പിഡ്.... തെറ്റിദ്ധരിക്കല്ലേ.. ഇതൊന്നും സാധാരണ തെറിയല്ല. 'തിരുതെറി'കളാണ്. മര്‍ക്കസിനെയും കാന്തപുരത്തിനെയും സ്നേഹിക്കുന്ന അനുയായി വൃന്ദത്തിന്റെ വിരലുകളിലൂടെ എന്‍റെ കമന്റ് ബോക്സിലേക്ക് ഒഴുകിയെത്തിയ മൊഴിമുത്തുകളാണ്. അതുകൊണ്ടുതന്നെ ഒന്നും നഷ്ടപ്പെടുത്താതെ ഞാന്‍ സൂക്ഷിച്ചു വെച്ചിട്ടുമുണ്ട്. തെറിക്കു പുറമേ ശാപ പ്രാര്‍ത്ഥനകളും ഭീഷണികളും കൂടി വരാന്‍ തുടങ്ങിയതോടെ കമന്റു ബോക്സില്‍ 'അനാഥ' കമന്റുകള്‍ തല്‍ക്കാലം മരവിപ്പിക്കേണ്ടിയും വന്നു. ഏതായാലും ഒ. അബ്ദുല്ലയോടു പറഞ്ഞ പോലെ കൈവെട്ടുമെന്നോ തട്ടിക്കളയുമെന്നോ പറഞ്ഞിട്ടില്ല, ഭാഗ്യം. എന്നാലും ഞാന്‍ പേടിക്കണം. കാരണം, എന്നെ പോലീസിനെ കൊണ്ട് പിടിപ്പിക്കുമത്രേ! യു എ ഇ പോലീസ് എന്നെ നോട്ടമിട്ടിട്ടുണ്ടത്രേ!!

ഇത്രയും തിരുതെറികളും ഭീഷണികളും വാങ്ങിച്ചു കൂട്ടാന്‍ മാത്രം ഞാന്‍ ചെയ്ത അപരാധമെന്തെന്നോ? പ്രവാചകന്റേത് എന്ന് പ്രചരിപ്പിച്ചു മര്‍ക്കസില്‍ സൂക്ഷിച്ച, നാല്പതു കോടിയുടെ പള്ളിയുണ്ടാക്കി 'ആദരിക്കാന്‍' പോകുന്ന വ്യാജകേശത്തിന്റെ ഫോട്ടോ ഞാന്‍ ബ്ലോഗില്‍ പ്രദര്‍ശിപ്പിച്ചുകളഞ്ഞുവത്രേ! എങ്ങനെയുണ്ട്? പൊതുജനങ്ങള്‍ക്കു മുമ്പില്‍ 'ഒറിജിനല്‍' വ്യാജകേശം തന്നെ ഇവര്‍ക്ക് പ്രദര്‍ശിപ്പിക്കാം. അത് മുക്കിയ വെള്ളം കൊടുത്തു പാവങ്ങളെ പറ്റിക്കാം. തിരുമുടിപ്പള്ളി നിര്‍മ്മിക്കാന്‍ ആളുകളില്‍ നിന്നും ഓഹരി പിരിക്കാം. 'ഒരു' മുടിയിഴ കൊണ്ട് ഇത്രയും നിങ്ങള്‍ക്കാവാമെങ്കില്‍ ഈ മുടിയിഴയുടെ ഒറിജിനല്‍ മുടിക്കെട്ടിന്റെ ഫോട്ടോ ഞാന്‍ കാശു മുടക്കി നടത്തുന്ന എന്‍റെ ബ്ലോഗില്‍ പ്രദര്‍ശിപ്പിക്കാന്‍ പാടില്ല എന്ന് പറയുന്നത് എന്ത് ന്യായത്തിന്റെ പേരിലാണ് കൂട്ടരെ? ഇനി ശൈഖ് ഖസ്രജിയുടെ അനുവാദമില്ലാതെ പ്രദര്‍ശിപ്പിച്ചു എന്നതാണ് കുറ്റമെങ്കില്‍ ഈ ഫോട്ടോകള്‍ എടുത്ത് എനിക്ക് അയച്ചു തന്ന കാന്തപുരത്തിന്റെ സ്വന്തം അനുയായിയല്ലേ ആദ്യത്തെ കുറ്റക്കാരന്‍? ഇക്കഴിഞ്ഞ റമദാന്‍ ഇരുപത്തി മൂന്നിന് അവിടെ നടന്ന ചടങ്ങിന്റെ ഫോട്ടോയില്‍ നമ്മുടെ സ്വന്തം ഉസ്താദും ഉണ്ടെന്നത് മറക്കരുത്.

ശ്രദ്ധേയനെതിരെ വാളെടുത്ത് ഉറഞ്ഞുതുള്ളാന്‍ മാത്രം ഈ ഫോട്ടോയില്‍ എന്തിരിക്കുന്നു എന്നന്വേഷിച്ചപ്പോഴാണ് സംഗതി പിടികിട്ടിയത്. ശൈഖ് ഖസ്രജിയുടെ കൈയ്യില്‍ ഇത്രയും മുടികളുള്ള കാര്യം ഇവര്‍ തന്ത്രപൂര്‍വ്വം മറച്ചു പിടിച്ചിരിക്കുകയായിരുന്നു. മാത്രമല്ല, ഖസ്രജിയുടെ സ്വപ്നത്തില്‍ പ്രവാചകന്‍ പ്രത്യക്ഷപ്പെട്ട് 'തിരു കേശം കാന്തപുരത്തിന് കൈമാറുവിന്‍' എന്ന് കല്പിച്ചുവെന്ന് അണികളെ വിശ്വസിപ്പിക്കണമെങ്കില്‍ ഇത് അപൂര്‍വമായ ഒരു കേശമായിരുന്നുവെന്ന ധാരണ പരത്തേണ്ടതും ഇവരുടെ ആവശ്യമായിരുന്നു. ആയിരക്കണക്കിന് 'പ്രവാചക'മുടികള്‍ ഒരാളുടെ പക്കല്‍ ഉണ്ടെന്നു മാലോകര്‍ അറിഞ്ഞാല്‍ പിന്നെ അതിന്റെ ആധികാരികത തകരുമെന്ന് ഇവര്‍ക്ക് നന്നായറിയാം. അത് വ്യക്തമാക്കുന്നതായിരുന്നു, ശൈഖിന്റെ കൈയ്യില്‍ ധാരാളം കേശമുണ്ടല്ലോ എന്ന എന്‍റെ ചോദ്യത്തിന് ഫോണിലൂടെ മര്‍ക്കസില്‍ നിന്നും എനിക്ക് കിട്ടിയ മറുപടി. 'നിങ്ങള്‍ ബഹാവുദ്ദീന്‍ പറയുന്നത് കേട്ടിട്ട് ചോദിക്കുന്നതാണോ? അത്രയൊന്നും മുടി ശൈഖിന്റെ കൈയ്യിലില്ല' എന്ന മറുപടിക്ക് എന്‍റെ കൈയ്യിലുള്ള ചിത്രങ്ങള്‍ മറുപടി കൊടുക്കുന്നുവെന്നത് ഇവരെ പ്രകോപിതരാക്കാതിരിക്കുന്നതെങ്ങനെ! ഔദ്യോകിക സമസ്തയുടെ സ്ഥാപനമായ ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റിയുടെ വൈസ് ചാന്‍സലര്‍ ഡോ. ബഹാഉദ്ദീന്‍ മുഹമ്മദ് നദ്‌വി നടത്തിയ പ്രസ്താവനയുടെ മര്മവും ഈ മുടിയുടെ ആധിക്യമായിരുന്നു.

മുടിയുടെ എണ്ണം പോലെ തന്നെ അവയുടെ നീളവും മുടി വ്യാജമാണെന്ന് വിളിച്ചോതുന്നു. പ്രവാചകന്റെ മുടിയെ കുറിച്ചുള്ള ഹദീസുകളില്‍ പറയുന്നത് പ്രകാരം മുടിയുടെ പരമാവധി നീളം കീഴ്ചെവിക്ക് താഴെ വരെയാവാം. ഇവിടെ ഖസ്രജിയുടെ കൈയ്യിലെ മുടിക്കെട്ടിന്റെ നീളം എഴുപതു സെന്റീ മീറ്ററിലും കൂടുതലാണ്. അഥവാ സാധാരണ ഒരു പെണ്‍കുട്ടിയുടെ മുടിയുടെ നീളം! പ്രവാചകന്റെ മുടിയുടെ നീളം ഇത്രവരുമോ എന്ന് വ്യക്തമാക്കേണ്ടത് ഈ മുടിക്കെട്ടില്‍ നിന്നും ഒരുമുടിയിഴ 'സ്വന്തമാക്കിയ' കാന്തപുരമാണ്. ഇത്രയും മുടി പ്രവാചകനുണ്ടായിരുന്നെങ്കില്‍ പിന്നെന്തുകൊണ്ട് മുടിയുടെ കാര്യത്തില്‍ ഇവരൊന്നും പ്രവാചകനെ അതുപോലെ അനുധാവനം ചെയ്യുന്നില്ല എന്നതും ചോദ്യമായി നിലനില്‍ക്കും.

നീളവും എണ്ണവും മുടിയുടെ ആധികാരികത സംശയാസ്പദമാക്കുന്നുവെന്നു യു എ ഇയില്‍ ജോലി ചെയ്യുന്ന സമസ്തയുടെ മറ്റൊരു യുവപണ്ഡിതന്‍ കൂടി വെളിപ്പെടുത്തുന്നു. ഖസ്രജിയുടെ കൈയ്യില്‍ പ്രവാചകകേശമുണ്ട് എന്ന് അമ്പലക്കടവ് ഫൈസിയെ പോലെ ആദ്യം വിശ്വസിച്ച ഇദ്ദേഹം 2009 റമദാന്‍ ഇരുപത്തിമൂന്നിന് ഖസ്രജിയുടെ വീട്ടില്‍ നടന്ന പ്രദര്‍ശന ചടങ്ങില്‍ പങ്കെടുത്തു. മാത്രമല്ല ഖസ്രജി മുമ്പ് കേരളത്തിലെ സമസ്തയുടെ സ്ഥാപനത്തില്‍ വന്ന കാര്യം പറഞ്ഞു പരിചയപ്പെടുകയും പരിപാടിയില്‍ പ്രസംഗിക്കുകയും ചെയ്തു. പക്ഷെ, മുടികണ്ടതോടെ അദ്ദേഹത്തിനും സംശയങ്ങള്‍ ഉടലെടുത്തു. ആയിരക്കണക്കിനുള്ള നീണ്ട മുടികളുടെ സാന്നിദ്ധ്യം തന്നെയായിരുന്നു കാരണം. മാത്രമല്ല, ഒരു മുടി ചോദിച്ചു കെഞ്ചിയ അദ്ദേഹത്തിനു മുടി കൊടുക്കാന്‍ കൂട്ടാക്കാത്ത ഖസ്രജി തന്റെ വേണ്ടപ്പെട്ട ആളുകള്‍ക്ക് യാതൊരു കൂസലുമില്ലാതെ മുടി വിതരണം ചെയ്തതും അദ്ദേഹത്തെ അത്ഭുതപ്പെടുത്തി. മുടി കൈമാറാന്‍ പ്രവാചകന്റെ ഉത്തരവ് ലഭിച്ചോയെന്ന് ഖസ്രജിയോടു അദ്ദേഹം ചോദിച്ചു കാണില്ല. കാരണം ഇങ്ങനെയൊരു നിബന്ധന കേള്‍ക്കാന്‍ തുടങ്ങിയത് ഈ വര്‍ഷമാണല്ലോ! ഏതായാലും തന്റെ മനസ്സിലുള്ള സംശയം ഇദ്ദേഹം അന്തരിച്ച മംഗലാപുരം ഖാസിയുടെ മരുമകന്‍ മുഹമ്മദ്‌ അബ്ദുല്‍ ഖാദര്‍ മൌലവിയുമായി പങ്കുവെച്ചു. വര്‍ഷങ്ങളായി യു എ ഇയില്‍ ഉള്ള ഇദേഹത്തിനു ഖസ്രജിയുടെ ഒരു സഹോദരുനുമായി അടുത്ത ബന്ധമാണുള്ളത്. അബ്ദുല്‍ ഖാദര്‍ മൌലവിക്ക് ഖസ്രജിയുടെ സഹോദരന്‍ നല്‍കിയ വിശദീകരം കേട്ടാല്‍ വ്യാജമുടിയുടെ 'ഒറിജിനാലിറ്റി' വ്യക്തമാകും. "എന്റെ ജേഷ്ഠനെ ആരോ പറഞ്ഞു പറ്റിച്ചു കുറെ കാശു വാങ്ങിച്ചു കുറെ മുടിക്കെട്ടും കൊടുത്തു. ഇതെല്ലാം റസൂലുല്ലാന്റെ മുടിക്കെട്ടാണെന്നു വിശ്വസിപ്പിചിരിക്കുകയാ... പക്ഷെ, സ്വന്തം കുടുംബക്കാരില്‍ തന്നെ എല്ലാരും അതൊന്നും വിശ്വസിച്ചിട്ടില്ല." എങ്ങിനെയുണ്ട്!!

പ്രവാചകന്റെ മുടിയെന്നു വിശ്വസിച്ചു അത് കാണാന്‍ പോയ ഒരു സുന്നീ പണ്ഡിതന്റെ മനസ്സില്‍ സംശയത്തിന്റെ വിത്ത് പാകാന്‍ ഈ മുടിക്കെട്ടു കാരണമായെങ്കില്‍ അത് ചെറിയ കാര്യമല്ല. ഇദ്ദേഹത്തെ പോലെ ഖസ്രജിയുടെ കൈയ്യിലെ മുടി കാണാതെ കേട്ടറിവ് വെച്ച് ഒറിജിനലാണെന്ന് വിശ്വസിച്ച അമ്പലക്കടവ് ഫൈസി പണ്ട് നടത്തിയ പ്രസംഗ ക്ലിപ്പാണ് ഇപ്പോള്‍ വ്യാജമുടിക്കാരുടെ പ്രചാരണായുധം. എങ്ങിനെയെങ്കിലും ആളുകളെ കൊണ്ട് കേശപൂജാ കേന്ദ്രത്തിന്റെ ടോക്കന്‍ വാങ്ങിക്കാന്‍ കച്ചകെട്ടിയിറങ്ങിയ ഒരുകൂട്ടരുടെ കണ്ണു തുറപ്പിക്കാന്‍ ഈ മുടിക്കെട്ടിന്റെ ചിത്രങ്ങള്‍ പര്യാപ്തമാവില്ലെന്നറിയാം. എന്നാലും ചിന്താശേഷി ആരുടെ കാല്‍ചുവട്ടിലും അടിയറ വെച്ചിട്ടില്ലാത്ത വലിയൊരു ജനവിഭാഗം ഇവിടെയുണ്ടല്ലോ. അവരുടെ അധ്വാനഫലം ഒരു വ്യാജകേശത്തിന് കൊട്ടാരമൊരുക്കാന്‍ ഓഹരി വെക്കപ്പെടാതിരിക്കാനെങ്കിലും ഈ ചിത്രങ്ങള്‍ ഉപകാരപ്പെടാതിരിക്കില്ല.

യു എ ഇ-യിലെ സുന്നീ പണ്ഡിതന്‍ രണ്ടായിരത്തി ഒമ്പത് സെപ്തംബര്‍ പന്ത്രണ്ടിന് വിശുദ്ധ റമദാന്‍ ഇരുപത്തിമൂന്നാം രാവില്‍ അബു ദാബിയിലെ അല്‍ ബത്ത്തീനില്‍ വച്ച് നടന്ന കേശ പ്രദര്‍ശന ചടങ്ങില്‍ പങ്കെടുത്തപ്പോള്‍ മൊബൈലില്‍ പകര്‍ത്തിയ രണ്ടു ചിത്രങ്ങള്‍.

എന്‍റെ നാടേ... നാദാപുരമേ....

2011-02-28T09:28:00.014+03:00

നിയമസഭാ നിയോജകമണ്ഡലത്തിന്റെ ആസ്ഥാനം എന്നതിനപ്പുറം നാദാപുരത്തോട് എനിക്ക് വലിയ ബന്ധമൊന്നുമില്ല. ജോലിയുമായി ബന്ധപ്പെട്ട കാര്യങ്ങള്‍ക്ക് വേണ്ടിയാവും മിക്കവാറും നാദാപുരത്ത്‌ എത്തിപ്പെടാറുള്ളത്. എങ്കില്‍ പോലും പ്രാവാസ ഭൂമിയില്‍ വെച്ച് 'നാട്ടിലെവിടെയാ' എന്ന ചോദ്യത്തിന്, കുറ്റ്യാടി തേങ്ങയ്ക്കും തെങ്ങിനുമപ്പുറം നാദാപുരം കലാപങ്ങള്‍ 'നേടിയെടുത്ത പ്രശസ്തി' അറിയാവുന്നത് കൊണ്ട് നാദാപുരം എന്നാവും പലപ്പോഴും ഉത്തരം. കലാപങ്ങളും കൊലപാതകങ്ങളും നടന്നതത്രയും ചുറ്റുമുള്ള പ്രദേശങ്ങളിലായിരുന്നിട്ടും എല്ലാറ്റിന്റെയും മാതൃഭൂമിയായി അവരോധിക്കപ്പെടേണ്ടി വന്നത് നാദാപുരത്തിന്റെ ദുര്യോഗം. മണ്ഡലത്തില്‍ എവിടെയെങ്കിലും അക്രമം മുളപൊട്ടുമ്പോഴേക്കും നാദാപുരത്തിന്റെ തെരുവോരങ്ങളില്‍ മുഷ്ടി ചുരുട്ടി വായുവിലെറിഞ്ഞുള്ള കുറേ പ്രകടനങ്ങള്‍ നടക്കും. ഓരോ സംഘര്‍ഷവും കെട്ടടങ്ങുമ്പോഴും നാദാപുരം എല്‍പി മുതല്‍ പ്ലസ്ടു വരെയുള്ള വിദ്യാര്‍ഥികളെ മുന്നില്‍ നടത്തി, ഒപ്പനയും തിരുവാതിരയും മേമ്പൊടി ചേര്‍ത്ത് ഖദറിട്ട മാന്യന്മാരുടെ നേതൃത്വത്തില്‍ മതസൌഹാര്‍ദ്ദ റാലി നടക്കും. സമാധാനത്തിന്റെ പ്രതീകങ്ങളാവാനായി കൂട്ടിലടക്കപ്പെട്ട വെള്ളരിപ്രാവുകള്‍ക്ക് സ്വാതന്ത്ര്യം ലഭിക്കും. ഇതിനപ്പുറമൊരു ബന്ധം ഒരു കലാപവുമായും നാദാപുരം പട്ടണത്തിനുണ്ടാവാറില്ല. എന്നാലും മണ്ഡലത്തിലെവിടെയെങ്കിലും ഒരു പൊട്ടാസ് പൊട്ടിയാല്‍ ചാനലുകളില്‍ ഫ്ലാഷ് ന്യൂസ് പാഞ്ഞു നടക്കും, 'നാദാപുരത്ത് സ്ഫോടനം'.

കഴിഞ്ഞ രാത്രി ചാനല്‍ ചര്‍ച്ചയിലെ വിദ്വാന്മാരുടെ വാചാലതയ്ക്ക് അലസമായി ചെവികൊടുക്കവേ പൊട്ടിവീണ ബ്രേക്കിംഗ് ന്യൂസിനും അത്രയൊക്കെ പ്രാധാന്യമേ ആദ്യം തോന്നിയിരുന്നുള്ളൂ. പക്ഷെ, മിനുട്ടുകള്‍ക്കകം മരണം ഒന്നായും മൂന്നായും പിന്നീട് അഞ്ചായും മാറുന്നത് കണ്ടപ്പോള്‍ ഒരായിരം സ്ഫോടനങ്ങള്‍ ഉള്ളില്‍ മുഴങ്ങിക്കൊണ്ടിരുന്നു. എന്‍റെ നാടേ... നാദാപുരമേ... നീയിനിയും പാഠം പഠിച്ചില്ലേയെന്ന് മനസ്സ് വിലപിച്ചു കൊണ്ടിരുന്നു. വെട്ടിയും കുത്തിയും കല്ലെറിഞ്ഞും ബോംബെറിഞ്ഞും മതിവരാതെ ഇനിയും പൊട്ടിച്ചിതറാന്‍ നിന്നുകൊടുക്കുന്ന എന്‍റെ അനിയമാരെ കുറിച്ചോര്‍ത്തു സഹതപിച്ചുകൊണ്ടിരുന്നു.

എന്താണ് നാദാപുരത്തിന്റെ പ്രശ്നം? എവിടെയാണ് കലാപങ്ങളുടെയും സ്ഫോടനങ്ങളുടെയും അടിവേര്? ആലോചനകളും ചര്‍ച്ചകളും കാമ്പയിനുകളും ഒരുപാട് നടന്നതാണ്. രാഷ്ട്രീയ പാര്‍ട്ടി നേതൃത്വങ്ങള്‍ പരസ്പരം പഴിചാരി പ്രാവ് പറത്തി പിരിയുമെന്നെല്ലാതെ ഇതുവരെയൊരു കൃത്യമായ ഉത്തരമോ പരിഹാരമോ ഈ ചോദ്യങ്ങള്‍ക്കുണ്ടായില്ലെന്നതിന്റെ ഒടുവിലത്തെ ഉദാഹരണമാണ് പൊട്ടിച്ചിതറിയ അഞ്ചു മനുഷ്യ ജീവനുകള്‍. ബോംബ്‌ നിര്‍മാണവും ശേഖരണവും പ്രദേശത്തിന് പുതുമയല്ല. പാര്‍ട്ടി - മത - ജാതി വ്യത്യാസങ്ങള്‍ ഒന്നുമില്ലാതെ ഇന്നുമത് തുടരുന്നു. ഇതിനു നിയോഗിക്കപ്പെടുന്ന പാവങ്ങളുടെ ആത്മാര്‍ഥത അറിയണമെങ്കില്‍ അവരോടുന്നു സംസാരിക്കണം. ജീവന്‍ പണയം വെച്ച് സ്ഥാപിച്ച കൊടിമരം എതിരാളികള്‍ വെട്ടിമുറിച്ച കദനകഥ പ്രതികാരബുദ്ധ്യാ പറയുമവര്‍. പകരമായി എതിര്പാര്ട്ടിയുടെ സമ്മേളന ബോര്‍ഡുകള്‍ കുത്തിക്കീറിയതിന്റെ വീരചരിതത്താല്‍ ആവേശപ്പെടുമവര്‍. മുളവടിക്ക് പകരം മുളകുപൊടി വിതറിയതും കല്ലേറിനു പകരം ബോംബേറു നടത്തിയതും പങ്കുവയ്ക്കുമ്പോള്‍ അവരുടെ കഴുത്തിലെ ഞരമ്പുകള്‍ വലിഞ്ഞു വികസിച്ചു പൊട്ടിത്തെറിച്ചു പോകുമോയെന്നു പോലും ആശങ്കിച്ചു പോകും! ഇടയ്ക്കെപ്പോഴെങ്കിലും സ്വന്തം മാതാവിന്റെ നീരുവന്നു വീര്‍ത്ത കാല്‍മുട്ടിന്റെ വേദനയെ കുറിച്ച് ചോദിച്ചാല്‍, ചുമച്ചു തളര്‍ന്ന പിതാവിനെ കുറിച്ചന്വേഷിച്ചാല്‍ നിര്‍വികാരമായ ചിരിയോടെ വഴിമാറി നടന്നേക്കുമവര്‍!

സാമ്പത്തികാസമത്വമാണ് ഇവിടുത്തെ പ്രശ്നങ്ങളുടെ അടിസ്ഥാനമെന്ന വാദത്തിനു അതിശയോക്തിയുണ്ട്. ഉള്ളവനും ഇല്ലാത്തവനും നാദാപുരത്തിന്റെ മാത്രം പ്രശ്നമല്ലല്ലോ. സോഷ്യലിസം ഇവിടെ മാത്രമല്ലല്ലോ പുലരാതെ പോയത്‌. എന്നാല്‍ ചിലരുടെ അഹന്തയും അഹങ്കാരവും നാദാപുരത്തിനു ശാപമായിട്ടുണ്ടെന്നു സമ്മതിക്കാതെ വയ്യ. ഒരു വിഭാഗത്തില്‍ പെട്ടയാള്‍ ലക്ഷങ്ങള്‍ വിലയുള്ള വാഹനം വാങ്ങിയപ്പോള്‍ 'പ്രതികാരമായി' അതുപോലൊരു വാഹനം വാങ്ങിയവനെ അവരുടെ അഭിമാന സംരക്ഷകനായി വിശേഷിപ്പിച്ച് എസ് എം എസ് ഒഴുകിയത് വെറും തമാശ മാത്രമല്ല. ഗള്‍ഫ്‌ പണത്തിന്റെ വിലയറിയാതെ അടിച്ചു പൊളിക്കുന്ന യുവതയും അവരോടു അസൂയപ്പെടുന്ന നാട്ടുകാരനും ഒരേ പോലെ നാദാപുരത്തിനു അപമാനമാണ്. കിട്ടുന്ന സമയത്ത്‌ സര്‍വം കൊള്ള ചെയ്യാന്‍ കാത്തു നില്‍ക്കുന്ന സാമൂഹിക വിരുദ്ധര്‍ക്ക് വളം വെച്ച് കൊടുക്കുന്നതില്‍ ഒരു പാര്‍ട്ടിക്കും മടിയേതുമില്ല. പലപ്പോഴും അക്രമങ്ങള്‍ക്ക് കാത്തുനില്‍ക്കുന്നത് പോലെയാവും ചിലരുടെ ഇടപെടല്‍. പുറത്തുള്ളവരുടെ ഇടപെടലിലൂടെയാണ് പലപ്പോഴും കവര്‍ച്ചകള്‍ നടക്കാറുള്ളത്. പണവും സ്വര്‍ണവും ഗൃഹോപകരണങ്ങള്‍ വരെയും കടത്തിക്കൊണ്ടുപോകുന്നവര്‍ പ്രതിനിധാനം ചെയ്യുന്നത് കൊള്ളയുടെ രാഷ്ട്രീയമല്ലാതെ മറ്റെന്താണ്?

തീവ്രവാദത്തിനും ഭീകരതയ്ക്കുമെതിരെ വാചാലരാവുന്നവരുടെ ചിറകിനടിയില്‍ സ്ഫോടനങ്ങള്‍ നടക്കുമ്പോള്‍, പച്ചമനുഷ്യര്‍ ചിന്നിച്ചിതറുമ്പോള്‍ വലിയനാക്കും വായിലൊളിപ്പിച്ചു 'ഇത് ഞങ്ങളല്ലേ'യെന്നു വിലപിക്കുന്നവരെ എന്തുവിളിക്കണം? രാഷ്ട്രീയമെന്നാല്‍ ബോംബും തോക്കുമാണെന്നു യുവതയെ പഠിപ്പിക്കുന്നവരെ ഇനിയും വിശ്വസിക്കണോ? ചിന്തിക്കേണ്ടത് അമ്മമാരാണ്, വിവാഹപ്പുടവ നിറംമങ്ങും മുമ്പേ വിധവകളാക്കപ്പെട്ട പാവം പെണ്‍കുട്ടികളാണ്. നിങ്ങളാണിനി നാദാപുരത്തെ നേരിലേക്ക് നയിക്കേണ്ടവര്‍. വോട്ടു ചോദിച്ചു വെളുക്കെ ചിരിച്ചു കയറിവരുന്ന പാര്‍ട്ടി നേതാക്കളോട് ചങ്കുറപ്പോടെ ചോദിക്കണം; തങ്ങളുടെ പൊന്നുമോനെ കൊലയ്ക്ക് കൊടുത്തിട്ട് പുലരാതെ പോയ സ്വര്‍ഗരാജ്യത്തെ കുറിച്ച്. നെയ്തെടുത്ത സ്വപ്നകൂട്ടില്‍ തീപടര്‍ത്തിയ കാപാലികരെ കുറിച്ച്. കൊള്ളമുതലുമായി വീട്ടില്‍ കയറിവരുന്ന മക്കളെ ചെരുപ്പൂരി അടിക്കാന്‍, രക്തസാക്ഷി ദിനാചരണ റാലിയിലേക്ക് ക്ഷണിക്കാന്‍ വരുന്നവര്‍ക്ക് കുമ്മായം തേക്കാത്ത ചുവര് കാട്ടിക്കൊടുക്കാന്‍ കഴിയണം നിങ്ങള്‍ക്ക് . രാഷ്ട്രീയത്തിന്‍റെ ജനസേവന മുഖം പഠിക്കാന്‍ മറന്നവര്‍ക്ക് മുമ്പില്‍ ഗാന്ധിയെയും ഉമറിനെയും വരയണം നിങ്ങള്‍. അക്രമത്തിന്, കൊലപാതകത്തിന് പ്ലാന്‍ വരയ്ക്കുന്നവര്‍ക്ക് ചായ്പും കട്ടന്‍ചായയും ഇനിയുള്ള കാലം ലഭിക്കാതിരിക്കണമെങ്കില്‍ നിങ്ങളുടെ ജാഗ്രത കൂടിയേ തീരൂ.

ഇപ്പോള്‍ പൊലിഞ്ഞത്‌ അഞ്ചു മനുഷ്യ ജീവനുകളാണ്. ലീഗോ സിപിഎമ്മോ അല്ല. പച്ച പുതച്ചാലും ചുവപ്പ് വിരിച്ചാലും മണ്ണിലേക്ക്‌ തന്നെയാണവര്‍ മടങ്ങിയത്‌. പാര്‍ട്ടിക്കാര്‍ക്ക് ബോംബ്‌ നിറയ്ക്കാനും ഒളിപ്പിക്കാനും ഇനിയും ഒരുപാട് പേരെ കിട്ടിയേക്കാം. പക്ഷെ, മക്കളെ നഷ്ടപ്പെട്ട മാതാപിതാക്കള്‍ക്ക് ആരവരെ തിരിച്ചു നല്‍കും? ഭര്‍ത്താവിനെ നഷ്ടപ്പെട്ട ഭാര്യക്കും പിതാവിനെ നഷ്ടപ്പെട്ട മക്കള്‍ക്കും വന്നു ചേരുന്ന വൈധവ്യത്തിനും അനാഥത്വത്തിനും ആരിവിടെ സമാധാനം പറയും? സര്‍വകക്ഷി യോഗങ്ങളും സമാധാന റാലികളും ഇനിയും നാദാപുരത്തു നടന്നേക്കും. അനുദിനം നഷ്ടപ്പെടുന്ന സ്വൈര്യവും സമാധാനവും തിരിച്ചു നല്‍കാന്‍ കഴിയാത്ത റാലിയും യോഗവും കൊണ്ട് നാട്ടിനെന്തു ഗുണം? പാര്‍ട്ടി ഓഫീസുകളിലെ, ആളൊഴിഞ്ഞ പറമ്പുകളിലെ വടിവാളുകളും ബോംബുകളും കണ്ടെടുത്തു കുഴിച്ചുമൂടാതെ നാദാപുരത്ത്‌ സ്വൈര്യജീവിതം എങ്ങിനെ സാധ്യമാവാന്‍! ഖദറു പൊതിഞ്ഞ നെഞ്ചിനുള്ളില്‍ നഞ്ഞൊളിപ്പിച്ച് വെള്ളരിപ്രാവിനെ വാനില്‍ പറത്തിയിട്ടെന്തു ലഭിക്കാന്‍!

ചിത്രങ്ങള്‍ക്ക് കടപ്പാട് : ഗൂഗിള്‍

പള്ളിയല്ല ഉസ്താദേ, പള്ളയാണ് പ്രശ്നം!

2011-02-09T17:24:00.036+03:00

കേരളത്തിലെ ഏറ്റവും മികച്ച സംഘാടനാപാടവം ഉള്ള മുസ്‌ലിം നേതാവ് ആരാണെന്ന് ചോദിച്ചാല്‍ രണ്ടു വട്ടം ആലോചിക്കാതെ ഞാന്‍ പറയുന്ന പേര് കാന്തപുരം അബൂബക്കര്‍ മുസല്ല്യാരുടെതായിരിക്കും. കാരന്തൂരിലെ ചതുപ്പുനിലത്തെ പടുകൂറ്റന്‍ വിദ്യാഭ്യാസ സമുച്ചയമാക്കി പരിവര്‍ത്തിപ്പിച്ചതിന്റെ പരിണാമ ശാസ്ത്രം മാത്രം പഠിച്ചാല്‍ മതി, കാന്തപുരം ഉസ്താദിന്റെ നേതൃപാടവം അംഗീകരിക്കാന്‍. കേരളമൊട്ടുക്കും ഇപ്പോള്‍ കേരളത്തിനു പുറത്തും പള്ളികളും സ്കൂളുകളും കുടിവെള്ള പദ്ധതികളുമൊക്കെയായി അദ്ദേഹം തന്റെ സേവനപ്രവര്‍ത്തനങ്ങള്‍ വിപുലപ്പെടുത്തികൊണ്ടിരിക്കുകയാണ്.

സ്തുത്യര്‍ഹമായ പ്രവര്‍ത്തനങ്ങള്‍ക്കിടയിലാണ് കാന്തപുരത്തിന്റെ വകയായി ഇന്ത്യയിലെ ഏറ്റവും വലിയ പള്ളി കോഴിക്കോട്ട് നിര്‍മിക്കാന്‍ പോകുന്ന വാര്‍ത്ത പുറത്തു വരുന്നത്. നാല്പതു കോടിയോളം വരുമത്രേ നിര്‍മാണ ചെലവ്! 'ശഅ‌റെ മുബാറക് ഗ്രാന്‍റ് മസ്ജിദ് ' എന്ന് പേര് വെച്ചിട്ടുള്ള പ്രസ്തുത പള്ളിയില്‍ ഇരുപത്തി അയ്യായിരം പേര്‍ക്ക് നിസ്കരിക്കാനുള്ള സൗകര്യം ഉണ്ടാവും. ആയിരത്തി ഇരുന്നൂറു പേര്‍ക്ക് താമസിക്കാനുള്ള സൌകര്യവും ലൈബ്രറി, സെമിനാര്‍ ഹാള്‍ എന്നിവയും പ്രത്യേകതകളാണ്. ഒരു സാംസ്കാരിക സമുച്ചയം എന്ന നിലവാരത്തിലേക്ക് പ്രസ്തുത പള്ളി ഉയരും എന്നാണ് പ്രതീക്ഷ.

കോഴിക്കോട് നഗരപരിധിയില്‍ ഇത്രയും പേര്‍ ഒന്നിച്ചു നമസ്കരിക്കാന്‍ വേണ്ടി എല്ലാ വെള്ളിയാഴ്ചകളിലും ഒരു പള്ളിയില്‍ ഒത്തുകൂടാന്‍ സാധ്യതയില്ല എന്ന കാര്യത്തില്‍ സംശയമില്ല. പിന്നെയെന്തിന് ഇത്ര വലിയ പള്ളി എന്ന് ചോദിച്ചാല്‍ അതിന്റെ ഉത്തരമാണ് പ്രവാചക തിരുമേനിയുടെ 'തിരു കേശ'ത്തിനുള്ള ആദരവാണ് ഈ പള്ളി എന്നത്. ആയിരത്തി നാനൂറിലധികം വര്‍ഷങ്ങള്‍ക്ക് മുമ്പ് ഇഹലോകവാസം വെടിഞ്ഞ പ്രവാചകന്റെ 'ഒരു മുടി' എങ്ങിനെ ഉസ്താദിന്റെ അധീനതയില്‍ വന്നു എന്നതാണ് ചോദ്യമെങ്കില്‍, ഉത്തരം അബുദാബിയിലെ ഡോ. അഹമ്മദ് ഖസ്‌റജ് എന്നയാളാണ് ഇത് കൈമാറിയത് എന്നതും.

ബഹുമാനപ്പെട്ട കാന്തപുരം, താങ്കളോടുള്ള എല്ലാ ആദരവുകളും നിലനിര്‍ത്തിക്കൊണ്ട് ചില കാര്യങ്ങള്‍ പറയട്ടെ: നാല്പതു കോടി എന്നൊക്കെ പറഞ്ഞാല്‍ താങ്കളെ സംബന്ധിച്ചേടത്തോളം വലിയ സംഖ്യ ഒന്നുമായിരിക്കില്ലെന്നറിയാം. എന്നാല്‍, ഉസ്താദിനെ കാണുമ്പോള്‍ ആവേശത്തോടെ എഴുന്നേറ്റു തക്ബീര്‍ മുഴക്കുന്ന ഒരുപിടി പാവങ്ങള്‍ക്ക് അങ്ങനെയല്ലെന്നു താങ്കളറിയണം. താങ്കളുടെ തന്നെ പള്ളികളില്‍ ആണ്ടിനും നേര്ച്ചയ്ക്കും ഇറച്ചി ചോറിനു ക്യൂ നില്‍ക്കുന്ന അനുയായികളില്‍ വലിയൊരു വിഭാഗത്തിന് ആ അന്നം കേവലം 'പ്രസാദം' മാത്രമല്ല; ഒരു ദിവസത്തെ തള്ളി നീക്കാനുള്ള ഊര്‍ജം കൂടിയാണ്.

നാടിന്റെ നാനാഭാഗത്തും പ്രഭാഷണങ്ങള്‍ക്കും സംവാദങ്ങള്‍ക്കും ഓടിനടക്കുന്ന താങ്കള്‍ വയനാടന്‍ മേഖലകളിലെ ചെറ്റക്കുടിലുകള്‍ കാണാതിരിക്കില്ല. പടച്ചതമ്പുരാനോട്‌ 'വീശിയടിക്കുന്ന കാറ്റിനെ തൊട്ടു ഞങ്ങളെ കാക്കണേ' എന്ന് ഭര്‍ത്താവുപേക്ഷിച്ച് മക്കളെ പോറ്റാന്‍ വഴികാണാതെ വേദന തിന്നുന്ന വിധവകള്‍ മനമുരുകി പ്രാര്‍ഥിക്കുന്നത് വിശാലമായ വയല്നിലങ്ങളിലെ വാഴത്തോട്ടം നിലംപതിക്കുമോ എന്ന് കരുതിയിട്ടല്ല. ടാര്‍പ്പോളിന്‍ ഷീറ്റ് ചുറ്റിയ ദുര്‍ബലമായ മേല്‍ക്കൂര പിഞ്ചുമക്കളുടെ മൂര്‍ദ്ധാവിലേക്ക് തകര്‍ന്നു വീഴുമോ എന്ന ഭയപ്പാടു കൊണ്ടാണ്. ഗ്രാന്‍ഡ്‌ മോസ്കിനു വേണ്ടി താങ്കളൊഴുക്കുന്ന പണം ഈ പാവങ്ങളുടെ പുനരധിവാസത്തിന് ഉപയോഗിച്ചാല്‍ ആയിരം പള്ളികള്‍ നിര്‍മ്മിച്ചതിന്റെ പ്രതിഫലം താങ്കള്‍ക്കു ലഭിക്കാതിരിക്കില്ല. പള്ളിക്ക് ചുറ്റും താങ്കളൊരുക്കുന്ന ഉദ്യാനത്തിന് ചെലവഴിക്കുന്ന കോടികള്‍, കോഴിക്കോട് നഗരത്തിലെ കിടത്തിണ്ണകളിലും ബസ്സ്‌സ്റ്റാന്റിലും അന്തിയുറങ്ങുന്നവരുടെ ഉന്നമനത്തിനു ചെലവഴിച്ചാല്‍, നാളെ മരണാനന്തരം ഏറ്റവും മഹത്തായ ഉദ്യാനം തന്നെ താങ്കള്‍ക്കു സമ്മാനിക്കപ്പെടാതിരിക്കില്ല. താനും പ്രസ്ഥാനവും പൊതുജന സേവനം വേണ്ടുവോളം നടത്തുന്നുണ്ട് എന്നാവാം മറുവാദം. അവിടെയോര്‍ക്കേണ്ടത് കൈയ്യിലുള്ളതെല്ലാം ദാനം ചെയ്ത പ്രവാചകാനുയായികളെയാണ്. താങ്കള്‍ വിചാരിച്ചാല്‍ നാല്പതല്ല, നാനൂറു കോടി പിരിച്ചുണ്ടാക്കാന്‍ കഴിയുമെന്നറിയാം. എന്നാല്‍ അവയൊക്കെയും പള്ളിയും ഉദ്യാനവും നിര്‍മിച്ചു ധൂര്‍ത്തടിക്കാനാണ് പരിപാടിയെങ്കില്‍ അതിനെ വിമര്‍ശിക്കാതെ വയ്യ.

പള്ളിയില്ലാത്തതിന്റെ കുറവ് കൊണ്ട് നിസ്കരിക്കാത്ത കോഴിക്കോട്ടുകാരന്‍ ഉണ്ടെന്നു താങ്കള്‍ കരുതുന്നുണ്ടോ? കോഴിക്കോട് നഗരത്തില്‍ ഒരു കേന്ദ്രം ഇല്ലാത്തതിന്റെ പരിമിതി താങ്കളുടെ പ്രസ്ഥാനത്തിനുണ്ടോ? ഇല്ലെന്നാണ് ഉത്തരമെങ്കില്‍ ഇരുപത്തി അയ്യായിരം പേരെ പ്രതീക്ഷിച്ചു ഒരു മഹാമസ്ജിദ് നിര്‍മ്മിക്കാന്‍ താങ്കളെ പ്രേരിപ്പിച്ചതെന്താണ്? പ്രാവചകകേശം എന്ന് തന്നെയാണ് ഉത്തരമെങ്കില്‍ ചോദിക്കാതെ നിര്‍വാഹമില്ല; എന്താണീ കേശത്തിന്റെ ആധികാരികത? മക്കയിലും മാദീനയിലും ഇല്ലാതെ പോയ ഒരു 'കേശപൂജാകേന്ദ്രം' കോഴിക്കോട്ടു തുടങ്ങുന്നതിന്റെ ഉദ്ദേശ്യമെന്താണ്? വാദത്തിനു വേണ്ടി ഇത് പ്രവാചകന്റേത് തന്നെ എന്ന് സമ്മതിച്ചാല്‍, എങ്ങനെയാണ് താങ്കളാ കേശത്തെ ആദരിക്കാന്‍ പോകുന്നത്? ഹസ്രത്ത്ബാല്‍ പള്ളിയിലേത് പോലെ ചില പ്രത്യേക ദിവസങ്ങളില്‍, പ്രത്യേക ചടങ്ങുകളോടെ 'നട തുറന്നു' പ്രദര്‍ശനം നടത്താനാണോ പരിപാടി? ഈയൊരു മുടി സത്യമാണെന്ന് വിശ്വസിച്ചു വരുന്ന പാമര ജനങ്ങള്‍ കാട്ടിക്കൂട്ടാന്‍ പോകുന്ന കോപ്രായങ്ങള്‍ എന്തൊക്കെയാവുമെന്നു താങ്കള്‍ ആലോചിച്ചിട്ടുണ്ടോ? തൊഴുതു ചുംബിച്ചു പ്രാര്‍ഥിച്ചു നില്‍ക്കുന്ന ഒരു ബഹുദൈവ സമൂഹത്തിന്റെ സൃഷ്ടിപ്പല്ലേ ഇവിടെ യഥാര്‍ത്ഥത്തില്‍ സംഭവിക്കാന്‍ പോകുന്നത്? നബിദിനത്തിലും മറ്റുമായി അവിടെ നടക്കാന്‍ പോകുന്ന അനാചാരങ്ങള്‍ താങ്കള്‍ മുന്‍കൂട്ടി കണ്ടിട്ടില്ല എന്ന് വിശ്വസിക്കാനാവില്ല. താങ്കളെ പോലെ പ്രവാചകനെ സ്നേഹിക്കുന്നവരാന് ഇവിടെയുള്ള സര്‍വ മുസ്ലിംകളും. സ്വന്തത്തെക്കാള്‍ പ്രവാചകനെ സ്നേഹിക്കുന്നവര്‍. ആ പ്രവാചക സ്നേഹ സാക്ഷ്യം ഉറവിടം വ്യക്തമല്ലാത്ത ഒരു മുടിയിഴയില്‍ കെട്ടിനിര്‍ത്താനുള്ള ശ്രമം അനുവദിക്കാനാവില്ല. സ്വന്തം ചിത്രം പോലും വരച്ചു വെക്കുന്നത് തടഞ്ഞ പ്രവാചകന്‍ ഭയപ്പെട്ടത് വ്യക്തിപൂജയിലേക്ക് തന്റെ സമുദായം ചെന്നെത്തുമോ എന്നതായിരുന്നു. ബിംബാരാധകരെ കൊണ്ട് തന്നെ ബിംബങ്ങള്‍ തച്ചുടപ്പിച്ചയാളാണ് പരിശുദ്ധ പ്രവാചകന്‍. ആ പ്രവാചകന്റെ പേരില്‍ തന്നെ ഒരു 'കേശ ബിംബം' ഉയരുമ്പോള്‍ പ്രതിഷേധിക്കാതിരിക്കാനാവില്ല.

താങ്കളുടെ ഉദ്ദേശശുദ്ധിയെ പലരെയും പോലെ ഞാനും സംശയിക്കുന്നു. തിരുനബിയുടെ തിരുകേശം കാണാനെത്തുന്ന ലക്ഷങ്ങളുടെ കീശയിലെ നോട്ടുകളും തുട്ടുകളും വളയും മാലയും വരെ 'സംഭാര പെട്ടിയിലെ' ലക്ഷങ്ങളാവുന്നത് താങ്കള്‍ക്കും സ്വപ്നദര്‍ശനമായിട്ടുണ്ടാവാം. നാല്പതു കോടിയുടെ മുടക്ക് മുതല്‍ ഒന്നോ രണ്ടോ സീസന്‍ കൊണ്ട് പതിന്മടങ്ങ്‌ ഇരട്ടിയാക്കാമെന്ന ചിന്ത താങ്കളിലും ആവേശം സൃഷ്ടിച്ചിരിക്കാം. ഈ വര്‍ത്തമാനം കേട്ട് ഒരു സഹോദരി പ്രതികരിച്ചത് പോലെ അല്ലാഹുവിനു മുമ്പില്‍ സുജൂദു ചെയ്യാന്‍ അനുവദിക്കില്ലെങ്കിലും 'തിരുമുടി' ദര്‍ശനമെങ്കിലും സാധ്യമാക്കി, സ്ഥാപനത്തിന്റെ 'എക്കൌണ്ട് ബുക്കില്‍' സ്ത്രീവിമോചനത്തിന്റെ പുതിയ അദ്ധ്യായം എഴുതിച്ചേര്‍ക്കാന്‍ കൊതിച്ചിരിക്കാം. എന്നാല്‍ താങ്കള്‍ ഒന്നോര്‍ക്കണം; ബഹുദൈവാരാധനയുടെ കരിപുരണ്ട നോട്ടുകെട്ടുകള്‍ കൊണ്ട് താങ്കള്‍ കെട്ടിപ്പൊക്കാന്‍ ഉദ്ദേശിക്കുന്ന മാണിക്യ കൊട്ടാരത്തിന്‍റെ 'മെഹബ്' ഏതായാലും സമുദായത്തിന്റെ കണക്കു പുസ്തകത്തില്‍ വരവുവെക്കരുത്. ആ കൊട്ടാരത്തിന്റെ പേരിലുള്ള ഒരു പ്രശസ്തിയും ഈ സമുദായത്തിന് വേണ്ട!

ഗ്രാണ്ട്മോസ്കില്‍ 'കേശപൂജ' തുടങ്ങുന്നതോടെ ഇന്ത്യയിലെ ഏറ്റവും വലിയ 'അജ്മീരായി' കോഴിക്കോട് മാറിയേക്കാം. ഈ റെക്കോര്ഡ് തകര്‍ക്കാന്‍ ഇതിലും വലിയ പള്ളിയുമായി അടുത്ത സംഘടന ഇറങ്ങിത്തിരിച്ചേക്കാം. 'പ്രവാചക കേശത്തിന്' പകരം 'പ്രവാചകപ്രതിമ' തന്നെ സ്ഥാപിക്കപ്പെട്ടേക്കാം. അപ്പോഴും ഉസ്താദുമാരെ കാണുമ്പോള്‍ തക്ബീര്‍ വിളിച്ച്, കൈപ്പുറം മുത്തി വിശക്കുന്ന അരമുണ്ട് മുറുക്കി കെട്ടി ഒരുപറ്റം പാവങ്ങള്‍ ഇറച്ചി ചോറിനു പാത്രം കഴുകുന്നുണ്ടാവും. അന്തരീക്ഷത്തില്‍ ഉത്തരം കിട്ടാത്ത ബാങ്കുവിളി മുഴങ്ങിക്കൊണ്ടിരിക്കുന്നുണ്ടാവും. പള്ളയുടെ വിളിക്ക് ഉത്തരമേകാന്‍ കഴിയാത്തവര്‍ പള്ളിയുടെ വിളി കേള്‍ക്കാതിരുന്നാല്‍ അവരെ കുറ്റപ്പെടുത്തുന്നതെങ്ങനെ?!

ഇഞ്ച്വറി ടൈമിലെ 'വി.എസ്. ഗോളുകള്‍'

2011-02-06T08:46:00.026+03:00

സഖാവ് വി. എസ്. അച്യുതാനന്ദൻ മികച്ചൊരു പ്ലെയറാണെന്നത് പ്രത്യേകം പറയേണ്ടതില്ല. എത്രയോ ചെറുതും വലുതുമായ ടൂര്‍ണമെന്റുകളില്‍ കളിച്ചു പരിചയമുള്ളയാള്‍. മത്സരങ്ങളാവുമ്പോള്‍ ജയവും തോല്‍വിയും സ്വാഭാവികം. വി എസിന്റെ ജീവിതത്തിലെ തോല്‍വികള്‍ പലതും പൊരുതിക്കളിച്ച ശേഷമായിരുന്നു. ചിലത്, സ്വന്തം ടീമിന്റെ നിസ്സഹകരണത്താലും! വീ എസ് നീട്ടി നല്‍കിയ പന്തില്‍ ഒന്ന് തലവെക്കാന്‍ പോലും തയ്യാറാവാതെ പലരും അലസരായി. ഗോളി പോലുമില്ലാത്ത ഗോള്മുഖത്തെക്ക് നേര്‍ക്കുനേര്‍ നിറയൊഴിക്കാന്‍ കിട്ടിയ സുവര്‍ണാവസരങ്ങള്‍ സഹകളിക്കാര്‍ തുലക്കുന്നത് കണ്ടു നിസ്സഹായനാകാനേ പലപ്പോഴും അദ്ദേഹത്തിനു സാധിച്ചുള്ളൂ. എന്നിട്ടും കിട്ടിയ അവസരങ്ങളില്‍ ചില ഒറ്റയാന്‍ മുന്നേറ്റങ്ങളിലൂടെ അദ്ദേഹം ആരാധകരുടെ മനസ്സിനെ സന്തോഷിപ്പിച്ചു. ഇടക്കാലത്ത് ന്യൂനപക്ഷത്തിന്റെ മുന്നേറ്റത്തെ 'ഇടങ്കാലിട്ടു' വീഴ്ത്താനുള്ള ദയനീയമായ ചില ശ്രമങ്ങള്‍ അദ്ദേഹത്തില്‍ നിന്നുണ്ടായപ്പോള്‍ പലരെപ്പോലെ ഞാനും വിമര്‍ശിച്ചിരുന്നു. മഞ്ഞക്കാര്‍ഡ് ലഭിച്ച ആ ഫൌള്‍ ഒഴിച്ച് നിര്‍ത്തിയാല്‍ ഇടതുപക്ഷ ടീമിലെ മികച്ച കളിക്കാരന്‍ വി എസ് തന്നെയാണെന്ന് വീണ്ടും തെളിയിക്കുന്നതാണ് ഇഞ്ച്വറി ടൈമില്‍ അദ്ദേഹം നേടിക്കൊണ്ടിരിക്കുന്ന മിന്നുന്ന ഗോളുകള്‍.

ടീം പ്രഖ്യാപന സമയത്ത് തന്നെ വീ എസിന് പ്രതിബന്ധങ്ങള്‍ ധാരാളമായിരുന്നു. യോഗ്യതാ റൌണ്ടിലെ അദ്ദേഹത്തിന്‍റെ മിന്നുന്ന പ്രകടങ്ങള്‍ സെലക്ഷന്‍ കമ്മിറ്റി കണ്ടില്ലെന്നു നടിച്ചപ്പോള്‍ ടീമിലെ സ്ഥാനം തന്നെ വീ എസിന് നഷ്ടമായി. എന്നാല്‍ കൊല്‍ക്കത്തയിലെ സൌരവിന്റെ ആരാധകരെ കടത്തിവെട്ടും വിധം കേരളത്തിലെ വീ എസ് ആരാധകര്‍ പന്തംകൊളുത്തി പ്രകടനങ്ങളും 'അടിച്ചുപൊളി' സമരങ്ങളും നടത്തി സെലക്ഷന്‍ കമ്മിറ്റിയുടെ തീരുമാനം തിരുത്തിച്ചു. ക്യാപ്റ്റന്‍ സ്ഥാനവും നേടിക്കൊണ്ടുള്ള അദ്ദേഹത്തിന്‍റെ ടീമിലേക്കുള്ള തിരിച്ചു വരവ് ആരാധകവൃന്ദത്തില്‍ മാത്രമല്ല, എതിര്‍ടീമില്‍ പോലും വന്പ്രതീക്ഷകളാണ് സമ്മാനിച്ചത്.

എന്നാല്‍, കളിയാരംഭിച്ചപ്പോഴാണ് സ്വന്തം ടീമിലെ പടലപ്പിണക്കങ്ങള്‍ തന്റെ മുന്നേറ്റങ്ങളെ വല്ലാതെ ബാധിക്കുന്നുവെന്ന് വീ എസ് പോലും തിരിച്ചറിയുന്നത്. ഞാന്‍ മുമ്പ് സൂചിപ്പിച്ച പോലെ ചില ഒറ്റയാന്‍ മുന്നേറ്റങ്ങളിലൂടെ പ്രതിഭയുടെ മിന്നലാട്ടങ്ങള്‍ കാണിക്കാനായി എന്നതൊഴിച്ചാല്‍ പൊതുവേ നിരാശയായിരുന്നു ഫലം. ടീം മാനേജര്‍ നടത്തിയ അഴിമതിക്കെതിരെ 'ബക്കറ്റിലെ കടല്‍ വെള്ളം' പോലെയാണെങ്കില്‍ പോലും അദ്ദേഹം പ്രതിഷേധിച്ചു. ഇതില്‍ ക്ഷുഭിതരായ ടീം മാനേജ്മെന്റ് അദ്ദേഹത്തെ മാനേജ്മെന്റ് കമ്മിറ്റിയില്‍ നിന്നും പുറത്താക്കി. ഇതിനിടയില്‍ ക്യാപ്ടന്സി ഒഴിയണം എന്ന മുറവിളി അദ്ദേഹത്തെ അസ്വസ്ഥനാക്കി.

സ്വന്തം ടീമംഗങ്ങള്‍ ഒത്തൊരുമയോടെ കളിച്ചില്ലെന്ന് മാത്രമല്ല, പലപ്പോഴും സെല്‍ഫ് ഗോളുകള്‍ അടിക്കുന്നതിലും പലരും പ്രാഗത്ഭ്യം തെളിയിച്ചു. സഹകളിക്കാരില്‍ നിന്നും സ്വന്തം ഗോള്‍മുഖം സംരക്ഷിക്കേണ്ട ദുരവസ്ഥ അദ്ദേഹത്തെ പ്രതിരോധത്തിലാക്കിയത് മുന്നേറ്റങ്ങളെ വല്ലാതെ ബാധിച്ചു. എന്നാല്‍, കളി തീരാന്‍ ഏതാനും നിമിഷങ്ങള്‍ മാത്രം ബാക്കി നില്‍ക്കെ വി എസ് ഫോം വീണ്ടെടുക്കുന്നതാണ് കാണാന്‍ കഴിയുന്നത്. സ്കോര്‍ ബോര്‍ഡിലെ കണക്കനുസരിച്ച് വലതു പക്ഷ ടീം അല്പം മുന്നിലാണ്. അവരടിച്ച ഗോളുകളേക്കാള്‍ ഇടതുപക്ഷ ടീം ദാനം നല്‍കിയ സെല്‍ഫ് ഗോളുകളാണ് അവരെ മുന്നിലാക്കിയതെന്നത് മറ്റൊരു കാര്യം! ഇനി നഷ്ടപ്പെടാന്‍ ഒന്നുമില്ലെന്ന തിരിച്ചറിവാകാം വീ എസിന്റെ മുന്നേറ്റത്തിനു പിന്നിലെ ഊര്‍ജം. എന്തായാലും ഇന്‍ഫോ പാര്‍ക്ക് പകരം നല്‍കിയും ഭൂമി മറിച്ചു വില്‍ക്കാന്‍ അനുമതി നല്കിയുമുള്ള സ്മാര്‍ട്ട് സിറ്റി കേരളത്തിനു വേണ്ടെന്ന നിലപാട് പോസ്റ്റില്‍ തട്ടി പുറത്തേക്കു പോകുമോ എന്ന ആശങ്കയെ സാഹസികമായി മറികടന്നു നല്‍കിയ മനോഹരമായ പാസ് എം എ യൂസുഫലി എന്ന മിഡില്‍ ഈസ്റ്റിന്റെ മികച്ച കളിക്കാരന്‍
അനായാസം വലയിലാക്കിയതോടെ കേരളം ഒന്നിച്ചു എഴുന്നേറ്റു നിന്ന് ഹര്‍ഷാരവം മുഴക്കുന്നതാണ് കണ്ടത്. ആ ഗോളിന്റെ പിന്നില്‍ വീ എസ് അല്ലെന്നും തങ്ങളുടെ കളിക്കാരുടെ മിസ്‌ പാസ് ആണെന്നുമൊക്കെ വലതുപക്ഷ ടീം പറഞ്ഞു നോക്കുന്നുണ്ടെങ്കിലും ആരും അത് മുഖവിലക്കെടുക്കുന്നില്ല. 'ഞാനാണെങ്കില്‍ ഒന്നല്ല രണ്ടു സ്മാര്‍ട്ട് ഗോളുകള്‍ അടിച്ചു കയറ്റുമായിരുന്നെന്ന' ഓവര്‍ സ്മാര്‍ട്ട് വീമ്പുപറച്ചിലൊക്കെ കേട്ട് തരിച്ചു നിന്നവര്‍ വീ എസിന്റെ സ്മാര്‍ട്ട് ഗോള്‍ കണ്ടു നിരാശയിലേക്ക് കൂപ്പുകുത്തിയിക്കുകയാണ്.

ഇതിനൊക്കെ പുറമേ കുഞ്ഞാലിക്കുട്ടി എന്ന വലതുപക്ഷത്തിന്റെ തന്ത്രജ്ഞനായ കളിക്കാരന്റെ ലക്‌ഷ്യം തെറ്റിയ ഫ്രീകിക്ക് പിടിച്ചെടുത്ത് സമര്‍ത്ഥമായി തിരിച്ചടിക്കാനൊരുങ്ങുകയാണ് വീ എസ്.

പഴയൊരു കളിയില്‍ ഇത്തരമൊരു ഫ്രീകിക്ക് കുഞ്ഞാലിക്കുട്ടി നല്‍കിയിരുന്നെങ്കിലും അത് മുതലാക്കാതെ കളി ഉഴപ്പി 'ഒത്തുകളി' വിവാദത്തില്‍ പെട്ട സഖാവ് ശശിയെ തന്ത്രപൂര്‍വമായ നീക്കത്തിലൂടെ ടീമില്‍ നിന്നും പുറത്താക്കാനുള്ള വീ എസിന്റെ ശ്രമം എതിര്‍ ടീമിന്റെ കൂടി കൈയ്യടി നേടിയിരിക്കുകയാണ്. പെണ്‍വാണിഭക്കാര്‍ക്ക് റെഡ് കാര്‍ഡ് വാങ്ങിച്ചു കൊടുക്കുമെന്ന ശപഥം നിറവേറ്റാനുള്ള മികച്ച അവസരമാണ് വീ എസിനെ തേടി വന്നിരിക്കുന്നത്. ഇത് ലാസ്റ്റ് ബസാണ്. ലാസ്റ്റ് ബസിനു ശേഷം മറ്റൊരു ബസ്സ്‌ വീ എസ് പ്രതീക്ഷിക്കുമെന്നു കരുതുക വയ്യ. അടുത്ത കളിയില്‍ ക്യാപ്ടന്‍ സ്ഥാനം പോയിട്ട് ടീമില്‍ വരെ സ്ഥാനം ഉണ്ടാവുമെന്ന് വീ എസ് പോലും കരുതുന്നുണ്ടാവില്ല. കളി ഇഞ്ച്വറി ടൈമില്‍ എത്തിയ സ്ഥിതിക്ക് ഇനി ആലോചിക്കാന്‍ ഒന്നുമില്ല. നേടാവുന്നത്ര ഗോളുകള്‍ നേടുക. കളി ജയിച്ചില്ലെങ്കിലും സമനിലയെങ്കിലും പിടിക്കാനായാല്‍ അഭിമാനിയായ പോരാളിയായി വി എസിന് കളം വിടാം.

മാണി സാറേ, ഇപ്പോള്‍ മനസ്സില്‍ എന്ത് പൊട്ടി ??!!

2011-01-30T10:23:00.033+03:00

മോങ്ങാനിരുന്ന നായയുടെ തലയില്‍ വീണത് തേങ്ങയല്ല; നല്ല മുഴുത്തൊരു എല്ലിന്‍ കഷണമാണ്. അത് എറിഞ്ഞു കൊടുത്തതോ പട്ടി പിടുത്തക്കാരുടെ നായകനും! പറഞ്ഞു വരുന്നത് മാണി സാറിന്റെ കാര്യമാണ്. മുന്നണിയില്‍ മൂന്നാമനാണെന്ന് ചെന്നിത്തല പോലും സര്‍ട്ടിഫിക്കറ്റ് നല്‍കിയതിന്റെ ക്ഷീണം തീര്‍ക്കാന്‍ രണ്ടു സീറ്റ് കൂടി ഒപ്പിക്കാനുള്ള വഴികളാലോചിച്ചു തലപുണ്ണാക്കുന്ന മാണി സാറിന്റെ പാര്‍ട്ടിക്ക് എളുപ്പ വിജയത്തിന്റെ സൂത്രവാക്യം പറഞ്ഞു കൊടുത്ത് വലിയൊരു 'സാമൂഹിക സേവനം' ചെയ്തിരിക്കുകയാണ് ജനാബ് കുഞ്ഞാലിക്കുട്ടി. കുഞ്ഞുപ്രായത്തിലെ ഐസ്ക്രീം പൂതി വരുത്തി വെച്ച വയറുവേദന തലവേദനയായും പിന്നെ സാമുദായിക പാര്‍ട്ടിയുടെ തന്നെ ഹൃദയവേദനയായും പരിണമിച്ചതൊക്കെ പഴയ കഥയായി മറന്നതായിരുന്നു. ഒരു പതിറ്റാണ്ടിനിപ്പുറവും അലിഞ്ഞു തീരാത്ത മാന്ത്രിക ഐസായി വാണിഭ കേസ് വീണ്ടും ഉയര്‍ന്നു വരുമ്പോള്‍ തിരശ്ശീലക്കു പിന്നിലെ ആദ്യ ചിരി ഏതായാലും പാലായിലെ മാണി സാറിന്റെതായിരിക്കും. ഒന്നാമനോ രണ്ടാമനോ എന്ന് അകത്തും പുറത്തും തര്‍ക്കിച്ചു തലപുണ്ണാക്കിയിരിക്കെ, സ്വന്തം അളിയന് നേരെ തൊടുത്തു വിട്ട വെടിയുണ്ട താരമന്നന്‍ രജനിയണ്ണാച്ചിയുടെ പടത്തിനെ വെല്ലുന്ന തരത്തില്‍ തിരിച്ചു വന്നു കുഞ്ഞാലിക്കുട്ടിയുടെ തന്നെ തലമണ്ടയില്‍ തുളഞ്ഞു കേറുന്നത് കാണുമ്പോള്‍ മാണി സാറിന്റെ മനസ്സില്‍ 'ലഡ്ഡു' പൊട്ടാതിരിക്കില്ല.

കുഞ്ഞാലിക്കുട്ടി ഐസ്ക്രീം തിന്നോ ഇല്ലേ എന്നതല്ല ഇവിടെ വിഷയം. ഇതിന്റെ പേരില്‍ ഖജനാവിലെ (അല്ലെങ്കില്‍ സ്വന്തം കീശയിലെ തന്നെ) കാശ് കൊടുത്തു ജുഡീഷ്യറിയെ വിലക്കെടുത്തു അനുകൂല വിധി സമ്പാദിച്ചു എന്ന ആരോപണമാണ്. അലോസരപ്പെടുത്തുന്നത്, നമ്മുടെ രാഷ്ട്രീയ മണ്ഡലത്തെ തന്നെ വിഴുങ്ങിയിരിക്കുന്ന ജീര്‍ണതയുടെ ഭീകര മുഖമാണ്. മതവും സമുദായവും പറഞ്ഞു കണ്ണില്‍ കണ്ടവനെ ഭീകരനെന്നും തീവ്രവാദിയെന്നും വിളിച്ചു പൊതുസമൂഹത്തിന്റെ മുന്നില്‍ മാന്യത ചമഞ്ഞവരുടെ മുഖംമൂടികളാണ് പൊഴിഞ്ഞു വീഴുന്നത്. ഭരണകൂട ഭീകരതയുടെ ഇരകള്‍ക്ക് നീതി തേടുന്നതിനു പകരം രാജ്യത്തെ സ്ഫോടനങ്ങളുടെ നേരവകാശികളെ മൌനം കൊണ്ട് വെള്ള പൂശാന്‍ ശ്രമിച്ചതിനുള്ള ദൈവിക ശിക്ഷയായി തന്നെ കാണണം ഇത്തരം തിരിഞ്ഞുകൊത്തലുകള്‍. പാവങ്ങളെ എപ്പോഴും ഇവര്‍ക്ക് പുച്ഛമാണല്ലോ. പാപികളോടാണല്ലോ എപ്പോഴും ഇവരുടെ ഐക്യദാര്‍ഡ്യം. ഇവരുടെ മുഖപത്രം, ടുനീഷ്യയിലും യമനിലും ഈജിപ്തിലും വീശിയടിച്ചു കൊണ്ടിരിക്കുന്ന ഏകാധിപതികള്‍ക്കെതിരെയുള്ള ജനകീയ മുന്നേറ്റത്തെ അവമതിച്ചും ഏകാധിപതികള്‍ക്ക് പിന്തുണ നല്‍കിയും ലേഖനമെഴിട്ടു മഷിയുണങ്ങും മുമ്പേ പാര്‍ട്ടിയിലെ ഏകാധിപതിയുടെ മുഖം മൂടി അഴിഞ്ഞു വീഴുന്നത് കാണുമ്പോള്‍ സഹതിപിക്കാന്‍ പോലും കഴിയുന്നില്ല. തീവ്രവാദികളുടെ നേതാവെന്നു പറഞ്ഞു ജയിലിലടച്ച മഅദനിക്ക് പോലും ഇയാള്‍ വാഗ്ദാനം ചെയ്തത് അരക്കോടിയാണെന്നു കേള്‍ക്കുമ്പോള്‍ ഇയാളെ ചുമലിലേറ്റി നടന്ന ഷാജിമാര്‍ നാണിക്കട്ടെ. ഷാജിയോടൊപ്പം നുകം പേറി കപട മതേതരത്വത്തിന്റെ നിലമുഴുത മുനീറിന്റെ 'അവിഹിതം' അന്വേഷിക്കാന്‍ അളിയനെ ചട്ടം കെട്ടിയ 'ചൊളിയനെ' എന്ത് പേരിട്ടാണ്‌ ഇവര്‍ ഇനി സിന്ദാബാദ് വിളിക്കുക?

റഊഫ് കള്ളനും ഭീകരനുമാണെന്ന് ഇന്നലെ വഹിയ് ലഭിച്ചിരിക്കുന്നു കുഞ്ഞാലിക്കുട്ടി സാഹിബിന്! എന്തിനാ സാഹിബേ ഇത്രയും കാലം ഈ ഭീകരനെ ചുമന്നതെന്ന് നാട്ടുകാര്‍ തിരിച്ചു ചോദിക്കുമ്പോള്‍ സാഹിബ് നിന്ന് വിയര്‍ക്കുകയാണ്, കിതക്കുകയാണ്. സാമൂഹ്യ സേവനം ചെയ്തിരിക്കുകയാണത്രെ! ഇത് വല്ലാത്ത സമുദായ സേവനമായിപ്പോയി സാഹിബേ. നാട്ടിലുള്ള റബ്ബര്‍ ഫാക്ടറി മുഴുവന്‍ തീയിടുന്ന, കള്ളപ്പണം വെളുപ്പിക്കുന്ന, അറക്കവാള്‍ പലിശക്കാരനായ അളിയനെ സ്വന്തം കേസ് കെട്ട് ഏല്‍പ്പിച്ചു കൊടുത്തത് വല്ലാത്ത സേവനമായിപ്പോയി . സത്യസന്ധരെയല്ലേ ഇത്തരം കാര്യങ്ങള്‍ ഏല്‍പ്പിക്കേണ്ടത്? അതോ കള്ളരേഖകളും വ്യാജമൊഴികളും ഉണ്ടാക്കി കോടതിയെ തന്നെ കൈയ്യില്‍ എടുത്താലെ ഈ കേസില്‍ 'സത്യം' വിജയിക്കൂവെന്ന് സാഹിബിനു അന്നേ ബോധ്യമുണ്ടായിരുന്നോ? ഇത്തരം ഡയലോഗുകള്‍ ഷാജി കൈലാസ് സിനിമകളില്‍ ഞങ്ങള്‍ ഒരു പാട് കേട്ടിരിക്കുന്നു സാഹിബേ. ഇനിയും ഈ പരിപ്പ് വേവാന്‍ പോകുന്നില്ല. കപട വിശ്വാസികളെ കുറിച്ച് ഇസ്ലാം നല്‍കുന്ന നിര്‍വചനമുണ്ട്. അതില്‍ ഒന്ന് വിശ്വസിച്ചാല്‍ ചതിക്കും എന്നതാണ്. മറ്റൊന്ന് ബന്ധം പിരിഞ്ഞാല്‍ തെറി വിളിക്കും എന്നതും. ഇവിടെ രണ്ടു പേരിലും ഇത് ചേരുന്നു എന്നത് കേവലം യാദൃശ്ചികം മാത്രമാവട്ടെ എന്ന് പ്രാര്‍ഥിക്കാം!

എന്താണ് നമ്മുടെ രാഷ്ട്രീയ നേതൃത്വങ്ങള്‍ക്ക്‌ പറ്റിപ്പോയത്? എന്ത് വിലകൊടുത്തും 'ജനസേവനം' തുടരാന്‍ ഇവരെ പ്രേരിപ്പിക്കുന്നതെന്താണ്‌? സമൂഹം സ്വയം ചോദിക്കേണ്ട ചോദ്യങ്ങളാണിവ. തൊണ്ടകീറി മുദ്രാവാക്യം വിളിക്കുന്നത്തിന്റെ മുമ്പ് നാമിതിന്റെ ഉത്തരം തേടേണ്ടതുണ്ട്. ഏതു തോന്ന്യാസം സ്വന്തം നേതാവിന്റെ പേരില്‍ ആരോപിക്കപ്പെട്ടാലും അയാള്‍ക്ക്‌ പിന്നില്‍ ഉറച്ചു നില്‍ക്കുന്ന പാര്‍ട്ടികളുടെ ഉദ്ദേശ്യശുദ്ധി വിചാരണ ചെയ്യപ്പെടേണ്ടതുണ്ട്. കുറച്ചു സ്കൂളും നഴ്സറിയും അനുവദിച്ചു തന്നാല്‍ സമുദായം സ്വര്‍ഗം പൂകുമെന്ന ധാരണ തിരുത്തപ്പെടേണ്ടതുണ്ട്. ധാര്‍മികത ഇല്ലാത്ത പൊതു ജീവിതം ഏതു ഇസ്ലാമിനെയാണ് പ്രതിനിധീകരിക്കുന്നത്? അതല്ല നിസ്കാരപ്പയയില്‍ നിന്നും എഴുന്നേറ്റു ഖദര്‍ ഉടുത്താല്‍ പിന്നെ എന്ത് തോന്ന്യാസവും ചെയ്യാമെന്നും അതൊന്നും ദൈവസന്നിധിയില്‍ ചോദ്യം ചെയ്യപ്പെടില്ലെന്നുമുള്ള പഴയ പുരോഹിത വേദവാക്യം തന്നെയാണോ നിങ്ങളെ നയിക്കുന്നത്? എങ്കില്‍ നിങ്ങള്‍ക്ക് നിങ്ങളുടെ മന്ത്രോച്ചാരണം തുടരാം; ദൈവത്തിനുള്ളത് ദൈവത്തിന്, സീസര്‍ക്കുള്ളത് സീസര്‍ക്ക്!

ബൂലോകവാസികള്‍ക്കൊരു തുറന്ന കത്ത്

2010-12-30T19:35:00.014+03:00

പ്രിയ ബൂലോക സുഹൃത്തുക്കളെ,

ബൂലോകം കൊഴുക്കുകയാണ്. കൈവിരലില്‍ എണ്ണാവുന്ന പോസ്റ്റുകള്‍ പിറന്നിരുന്ന കാലം കഴിഞ്ഞു പോയി. ദിനേനെ ഇപ്പോള്‍ പിറന്നു വീഴുന്നത് നൂറുക്കണക്കിനു പോസ്റ്റുകളാണ്, ജന്മമെടുക്കുന്നത് ദശക്കണക്കിനു ബ്ലോഗര്‍മാരാണ്. 'ഞാനും ഒരു ബ്ലോഗറാണ്' എന്ന് പറയാന്‍ വേണ്ടി ബ്ലോഗ്‌ തുറക്കുന്നവരല്ല അധികപേരും എന്നതും എടുത്തുപറയേണ്ടതാണ്. ഓരോരുത്തര്‍ക്കും നിറയെ പോസ്റ്റുകളാണ്, കമന്റുകളാണ്. നൂറിലധികം ഫോളോവര്‍സ് ഇല്ലാത്ത പുതിയ ബ്ലോഗര്‍മാരെ ഇല്ല. പല ബ്ലോഗര്‍മാരും ബ്ലോഗ്‌ പോസ്റ്റുകള്‍ ഉള്‍ക്കൊള്ളിച്ചു ഒന്നില്‍ കൂടുതല്‍ പുസ്തകങ്ങള്‍ പുറത്തിറക്കി കഴിഞ്ഞു. ഇടക്കാലത്ത് ചില സിനിമാതാരങ്ങള്‍ തുടങ്ങിയ ബ്ലോഗുകള്‍ നിര്ജീവമായെങ്കിലും അച്ചടി മാധ്യമങ്ങളിലെ പല കുലപതികളും സ്വന്തമായി ബ്ലോഗ്‌ തുടങ്ങി വായനക്കാരുമായി 'നേരില്‍' സംവദിച്ചു കൊണ്ടിരിക്കുന്നു. മിക്ക രാഷ്ട്രീയ പാര്‍ട്ടികള്‍ക്കും മത സംഘടനകള്‍ക്കും ഉത്തരവാദപ്പെട്ട പ്രവര്‍ത്തകരാല്‍ നടത്തപ്പെടുന്ന ബ്ലോഗുകള്‍ ഉണ്ട്. ഫേസ്ബുക്കില്‍ ബ്ലോഗര്‍മാര്‍ക്ക് വേണ്ടി മാത്രം പുതിയ കൂട്ടായ്മകളുണ്ട്. തീര്‍ന്നില്ല, ചാനലുകളുടെ അവാര്‍ഡ് നിശയെ വെല്ലുന്ന തരത്തില്‍ താരപ്പൊലിമയോടെ സൂപ്പര്‍ ബ്ലോഗ്‌ അവാര്‍ഡു നിശ പോലും ബൂലോകത്തിനു സ്വന്തമാണ്. സ്വന്തമായി പത്രങ്ങളുണ്ട്, ഓണ്‍ലൈന്‍ എഡിഷന്‍ മാത്രമല്ല, മേത്തരം കടലാസില്‍ വര്ണപൊലിമയോടെ അച്ചടി മഷി പുരണ്ടവ തന്നെ! സ്വാഭാവികമായും അവകാശം എന്ന നിലയില്‍ പുതിയ ആവശ്യവും ഉയര്‍ന്നു കഴിഞ്ഞു; സാഹിത്യ അക്കാദമി മോഡലില്‍ ബ്ലോഗ്‌ അക്കാദമി തുടങ്ങാന്‍ സര്‍ക്കാര്‍ മുന്‍കൈ എടുക്കണം. ന്യായമായ ആവശ്യം എന്ന നിലയില്‍ അധികം വൈകാതെ ഇതും പരിഗണിക്കപ്പെടുമെന്ന കാര്യം ഉറപ്പാണ്.

വളര്‍ച്ചയുടെ ഓരോ ഘട്ടവും സന്തോഷകരമാണെങ്കിലും ചില കാര്യങ്ങളില്‍ പല ബ്ലോഗര്‍മാരും അശ്രദ്ധരാണെന്നത് പറയാതിരിക്കാനാവില്ല. ഫെയ്സ്ബുക്കും ഓര്‍കുട്ടും പോലെ കേവലം ഒരു സൌഹൃദ കൂട്ടായ്മയായി ബ്ലോഗിനെ മനസ്സിലാക്കുന്നത് ചിലരുടെയെങ്കിലും അജ്ഞത കൊണ്ടായിരിക്കും. 'എന്നെ പിന്തുടരൂ', 'എനിക്ക് കമന്റ് തരൂ' എന്നൊക്കെ പറഞ്ഞു കൊണ്ടുള്ള ചില മെയിലുകള്‍ക്ക് പുറകെ പോയി കണ്ണിലെണ്ണ ഒഴിച്ച് കാത്തിരുന്നിട്ടും കഴമ്പുള്ള പോസ്റ്റുകള്‍ കാണാതെ നിരാശപ്പെട്ട് മടങ്ങേണ്ടി വരാറുണ്ട് പലര്‍ക്കും. ചില ബ്ലോഗര്‍മാര്‍ ശ്രീനിവാസന്റെ ബാര്‍ബര്‍ഷോപ് കോമഡിയുടെ പാരഡികളെഴുതി വായനക്കാരന്റെ വിലപ്പെട്ട സമയം നഷ്ടപ്പെടുത്തുന്നതാണ് മറ്റൊരു സങ്കടം. പഴയകാലത്തെ ബാര്‍ട്ടര്‍ സമ്പ്രദായം പോലെ കമന്റ് കൊടുത്ത് ഫോളോവറെ വാങ്ങുന്നതും ഫോളോ ചെയ്തു കമന്റ് വാങ്ങുന്നതും സാധാരണമായിരിക്കുന്നു. ഈയൊരഭ്യാസം കൊണ്ട് ഹിറ്റുകളും കമന്റുകളും നിറയുമെന്നല്ലാതെ നമ്മുടെ സര്‍ഗശേഷിയെ വികസിപ്പിക്കാമെന്ന് കരുതുന്നത് മൗഢ്യമാണ്.

ഫോളോവേര്‍സും കമന്റും ഹിറ്റും ബ്ലോഗറെ സംബന്ധിച്ചിടത്തോളം പ്രധാനമാണെന്ന കാര്യത്തില്‍ സംശയമില്ല. നാമോരുരുത്തരും ബ്ലോഗ്‌ തുടങ്ങിയത് പക്ഷെ, എങ്ങനെയെങ്കിലും കുറച്ച് ഹിറ്റ് ഉണ്ടാക്കിക്കളയാം എന്ന് കരുതിയുമല്ല. മറിച്ച്; സാഹചര്യം അനുകൂലമാവാത്തതിനാല്‍, എഡിറ്റര്‍ കനിയാത്തതിനാല്‍, സഭാകമ്പത്താല്‍ ഒക്കെ ഉള്ളിലെവിടെയോ ഉറങ്ങിക്കിടന്ന നമ്മിലെ സാഹിത്യകാരനെ / വിമര്‍ശകനെ / നിരൂപകനെ / ചിന്തകനെ / .... വളര്‍ത്തിയെടുക്കുക എന്നതായിരുന്നു നമ്മുടെ ബ്ലോഗിന്റെ പരമമായ ഉദ്ദേശം. ഈയൊരു സോദ്ദേശ്യം 'ഇത് അടിപൊളി, ഇനി നിന്‍റെ ഊഴം' എന്ന രീതിയില്‍ കമന്റെഴുതി നശിപ്പിക്കപ്പെടാന്‍ പാടില്ല. നമ്മളാരും എംടിയും ഓയെന്‍വിയുമൊന്നുമല്ല. എന്നാല്‍ നമുക്കുള്ളില്‍ എംടിമാരും ഓയെന്‍വിമാരുമുണ്ടുതാനും! അവരെ വളര്‍ത്തിയെടുക്കാന്‍ പരസ്പരം പുറം ചൊറിയുന്ന കമന്റുകള്‍ കൊണ്ട് സാധ്യവുമല്ല!

ഇവിടെ ഒരു പ്രശ്നം ഉദിക്കുന്നത്, നാമാരും കെപി അപ്പനോ ലീലാവതി ടീച്ചറോ അല്ല എന്നുള്ള പതംപറച്ചിലാണ്. നിരൂപണത്തിനും വിമര്‍ശനത്തിനും നാം എന്തൊക്കെയോ ബിരുദങ്ങള്‍ മാനദണ്ഡങ്ങളായി കല്പിച്ചു വെച്ചിരിക്കുന്നു എന്നുള്ളതാണ് ദു:ഖകരമായ യാഥാര്‍ത്ഥ്യം. ലോകത്തിലെ വായനക്കാരില്‍ മഹാഭൂരിപക്ഷവും സാധാരണക്കാരാണ് എന്ന കാര്യം നാം വിസ്മരിക്കുന്നു. നാം വായിക്കുന്നത് വിലയിരുത്തുവാനുള്ള ശേഷി നമുക്കുണ്ട് എന്നത് വസ്തുതയല്ലേ? അതിന്റെ അടിസ്ഥാനത്തിലല്ലേ ഇന്നയാള്‍ നല്ല / മോശം എഴുത്തുകാരനാണ്‌ എന്ന് നമ്മള്‍ വിലയിരുത്തുന്നത്. സുപ്പര്‍ ബ്ലോഗര്‍ക്ക് വോട്ടു രേഖപ്പെടുത്താന്‍ പോലും നാം സ്വീകരിച്ച മാനദണ്ഡം നമ്മുടെ ഈയൊരു വിവേചന ശേഷിയല്ലേ? എങ്കില്‍ പിന്നെ നമുക്ക് മുന്നിലുള്ള യഥാര്‍ത്ഥ പ്രശ്നം അതൊന്നുമല്ല. മറിച്ച്, 'ഇയാള്‍ എന്‍റെ ഫോളോവറാണ് , സ്ഥിരമായി എന്‍റെ എഴുത്തിനെ പുകഴ്ത്തി കമന്റ് ചെയ്യുന്ന ആളാണ്‌. പിന്നെയെങ്ങിനെ ഇദ്ദേഹം എഴുതിയതില്‍ പോരായ്മയുണ്ടെന്ന് പറയും' എന്ന മനുഷ്യസഹജമായ ചിന്തയല്ലേ 'ദീപസ്തംഭം' കമന്റിന്റെ മറ്റൊരു കാരണം? എന്നെ സംബന്ധിച്ചിടത്തോളം, അനുമോദന കമന്റുകളെ പോലെ - ചിലപ്പോള്‍ അതിലധികം - ക്രിയാത്മക വിമര്‍ശനങ്ങളെ ഞാന്‍ ഇഷ്ടപ്പെടുന്നു. സമയലഭ്യത പോലെ പരമാവധി പോസ്റ്റുകള്‍ വായിക്കുന്നു. കഴിയുന്നത്ര പേര്‍ക്ക് സത്യസന്ധമായി കമന്റ് ചെയ്യുന്നു. അതുകൊണ്ട് എന്‍റെ കമന്റ് കോളത്തില്‍ 'പകരം കമന്റുകള്‍' കുറയുന്നതില്‍ ഒട്ടും വേവലാതിയില്ല, ഫോളോവറുകളുടെ എണ്ണച്ചുരുക്കം എന്നെ അസ്വസ്ഥനാക്കുന്നുമില്ല. എന്‍റെ കഴിവിനൊത്ത അംഗീകാരം എനിക്ക് ബൂലോകം നല്‍കി വരുന്നുണ്ട്. അതില്‍ കൂടുതല്‍ ആഗ്രഹിക്കുമ്പോഴും അതിനുള്ള പോംവഴിയായി 'ബാര്‍ട്ടര്‍ സമ്പ്രദായം' തെരഞ്ഞെടുക്കാന്‍ ഞാന്‍ ഒരുക്കവുമല്ല.

ആദ്യം ബ്ലോഗറെന്ന നിലയില്‍ നാം നമ്മെ നിര്‍വചിക്കണം. എനിക്ക് എന്തൊക്കെ കഴിയും? ഏതൊക്കെ മേഖലകളില്‍ കഴിവുകളുണ്ട്? ഈയൊരു ആത്മവിചാരം ബ്ലോഗില്‍ നമ്മുടെ ഇടം നിര്‍ണയിക്കും. കവിയോ കഥാകാരനോ ഹാസ്യസാഹിത്യകാരനോ ആരാണ് നമുക്കുള്ളിലെന്നു വെളിച്ചപ്പെട്ടാല്‍ പിന്നെ അവരെ വളര്‍ത്താന്‍ ആത്മാര്‍ഥമായി ശ്രമിക്കണം. എണ്ണം തികയ്ക്കാന്‍ വേണ്ടി പോസ്റ്റിടരുത്. അനുകരണ സ്വഭാവം തീരെയരുത്. വായനാ സ്വഭാവം വളര്‍ത്തിയെടുക്കുകയും വേണം. ബ്ലോഗ്‌ പോസ്റ്റുകളില്‍ വായന ഒതുക്കപ്പെടരുത്. മികച്ച സാഹിത്യ സൃഷ്ടികള്‍ അഭിരുചിക്കനുസരിച്ച് തെരഞ്ഞെടുത്ത് വായിക്കണം. സ്വന്തത്തെ വികസിപ്പിക്കുന്നിടത്താണ് ബ്ലോഗരുടെ വിജയം. ശേഷിയില്ലാത്ത മേഖലകളില്‍ എടുത്തു ചാടരുത്. സ്ഥിരമായി കവിതയെഴുതുന്നയാള്‍ സമര്‍ത്ഥനായ ഫോട്ടോഗ്രാഫറുടെ ഫോട്ടോ കണ്ടിട്ട് ഫോട്ടോ ബ്ലോഗ്‌ തുടങ്ങിയാല്‍ അപഹാസ്യനാകുന്നത് അതുകൊണ്ടാണ്. തനിക്കു ചേരുന്ന, ഉള്‍ക്കാമ്പുള്ള രചനകള്‍ പ്രസിദ്ധീകരിച്ചാല്‍ വായനക്കാര്‍ നമ്മെ തേടിവരും എന്ന കാര്യത്തില്‍ ഒട്ടും സംശയം വേണ്ട. .

ഇനി, മറ്റൊരു കൂട്ടരെ പറ്റി പറയാതിരിക്കാനാവില്ല. അവര്‍ ബൂലോകത്തെ പുലികളും പുപ്പുലികലുമാണ്. അവരവരുടെ മേഖലകളില്‍ കഴിവ് തെളിയിച്ചവര്‍ തന്നെയാണ് അവര്‍. എന്നാലും അവര്‍ മറ്റൊരു ബ്ലോഗിലും അഭിപ്രായം പറയില്ല. വായിച്ചു എന്നടയാളപ്പെടുത്തുന്ന ഒരു സ്മൈലി പോലും ഇടാന്‍ സമയം കണ്ടെത്തില്ല. പുതിയ ബ്ലോഗര്മാരുടെ കമന്റു കോളത്തില്‍ തന്റെ പേര് വരുന്നത് കുറച്ചിലായി കാണുന്ന ബോറന്‍ ബുദ്ധിജീവികളാണവര്‍. താന്‍ സീനിയര്‍ ബ്ലോഗറായി / മികച്ച എഴുത്തുകാരനായി ആകാശത്തു നിന്നും പൊട്ടി വീണതാണെന്നുള്ള മിഥ്യാധാരണയാണവരെ നയിക്കുന്നത്. കവി ചുള്ളിക്കാട് പോലും പുതു കവികളുടെ ബ്ലോഗില്‍ കമന്റ് ഇടാന്‍ സമയം കണ്ടെത്തുമ്പോള്‍ ആഴ്ചയ്ക്ക് പതിനാലു കവിത / ലേഖനം / കഥ/ ... പോസ്റ്റുന്ന ഇക്കൂട്ടര്‍ പുതിയ തലമുറയിലെ കഴിവുള്ളവരെ പോലും കണ്ടെന്നു നടിക്കില്ല. അവര്‍ കമന്റുകളെ ഇഷ്ടപ്പെടാത്തവരാണെങ്കില്‍ കുഴപ്പമില്ലായിരുന്നു. അങ്ങിനെയെങ്കില്‍ സ്വന്തം കമന്റു കോളം താഴിട്ടു പൂട്ടണമായിരുന്നല്ലോ! ഈ ജാടയെ അംഗീകരിക്കാന്‍ കഴിയില്ല. നിങ്ങള്‍ പുലികള്‍ തന്നെയായിരിക്കും. നിങ്ങളുടെ സ്ഥാനം വകവെച്ചു തരാന്‍ ഞങ്ങളും തയ്യാറാണ്. ആദ്യം നിങ്ങള്‍ നിങ്ങളുടെ ഉത്തരവാദിത്തം നിര്‍വഹിക്കണം. വളരാന്‍ പാകത്തിലുള്ളവരെ കൈപിടിച്ചുയര്‍ത്താന്‍ സഹായിക്കണം.

കുറിപ്പ് ദീര്‍ഘിച്ചു പോയെങ്കില്‍ ക്ഷമിക്കുക. ബൂലോകത്ത് ഞാനും എന്‍റെ ബ്ലോഗുകളും മൂന്നാം വര്‍ഷത്തിലേക്ക് കടക്കുമ്പോള്‍ ചില കാര്യങ്ങള്‍ ബൂലോക സുഹൃത്തുക്കളുമായി പങ്കുവെക്കണമെന്ന് തോന്നി. ആരെയും വേദനിപ്പിക്കാനോ കുറ്റപ്പെടുത്തണോ അല്ല; നമുക്കിനിയും വളരാന്‍, വിജ്ഞാനമെന്ന കൊടുമുടിയുടെ ഏറ്റവും മുകളിലേക്ക് കുതിക്കാന്‍. ഇതുവരെ നിങ്ങള്‍ എനിക്ക് തന്ന സഹകരണം തുടര്‍ന്നും ഉണ്ടാവണമെന്ന് സ്നേഹത്തോടെ അപേക്ഷിക്കുന്നു.

ഒപ്പം, ഏവര്‍ക്കും ഹൃദയം നിറഞ്ഞ പുതുവര്‍ഷാശംസകളും നേരുന്നു.

പ്രാര്‍ഥനാപൂര്‍വ്വം,

ശ്രദ്ധേയന്‍

ഏലസ് മാഹാത്മ്യം

2010-12-02T08:56:00.018+03:00

കളരിത്തൊടി ഉസ്മാന്‍ എന്ന പിഎച്ച്ഡി മുസ്ല്യാരെ കുറിച്ച് ഞാനാദ്യം അറിയുന്നത് ഇക്കഴിഞ്ഞ വെക്കേഷനില്‍ കോഴിക്കോട് പോയപ്പോഴാണ്. ബസ്റ്റാന്റിലെ കിഴക്കേ വശത്ത് പതിനഞ്ചടി ഉയരത്തിലുള്ള ഫ്ലക്സ് ബോര്‍ഡിലെ 'അറബി മാന്ത്രികം' ഇന്ദുലേഖ ഹെവി ബോള്‍ഡില്‍ എന്നെ നോക്കി പല്ലിളിച്ചു. ടാക്സി ഡ്രൈവര്‍മാരിലൂടെയും മദ്രസാ അധ്യാപകരിലൂടെയും പെണ്ണുങ്ങളുടെ നാലുമണി സമ്മേളനങ്ങളിലൂടെയുമൊക്കെ പ്രചരിപ്പിച്ചിരുന്ന സിദ്ധ മാഹാത്മ്യങ്ങള്‍ ദൃശ്യ-ശ്രാവ്യ മാധ്യമങ്ങളുടെ അനന്ത സാധ്യതകളെ ഉപയോഗപ്പെടുത്തുന്ന ഇക്കാലത്ത് ഇതുപോലൊരു ഫ്ലക്സ് ബോര്‍ഡ് വലിയ വാര്‍ത്തയൊന്നുമല്ലെന്നറിയാം. എന്നിട്ടും ഞാന്‍ ഞെട്ടിയത് മുസ്ല്യാരുടെ മുന്നിലും പിന്നിലുമുള്ള ബിരുദങ്ങളില്‍ കണ്ണുടക്കിയത് കൊണ്ട് മാത്രമായിരുന്നു. വെബ്സൈറ്റ് പോലും സ്വന്തമായുള്ള ഹൈടെക് മുസ്ല്യാരെ ഒന്ന് നേരിട്ട് കാണണം എന്നാഗ്രഹിച്ചെങ്കിലും സമയമനുവദിച്ചില്ല.

വീട്ടില്‍ തിരിച്ചെത്തിയ ഉടനെ www.arabimanthrikam.com -ല്‍ കയറിക്കൂടി. വെബ്കോം നെറ്റ് സൊല്യുഷന്റെ ഡിസൈനേഴ്സിനെ സമ്മതിക്കാതെ വയ്യ. പാവങ്ങള്‍ ചിരിച്ചു ചിരിച്ചു ഒരു പരുവമായിക്കാണും! എന്റെ പൊട്ടിച്ചിരി കേട്ട് പെണ്ണുമ്പിള്ള അടുക്കളയില്‍ നിന്നും വിളിച്ചു ചോദിച്ചു, "ഞാനറിയാതെ നിങ്ങളിരുന്ന് കോമഡി കാണുകയാണല്ലേ..?". "വേഗം വാ, തകര്‍പ്പന്‍ കോമഡി കാണാം" വെബ്സൈറ്റ് ഓടിച്ചു നോക്കി ചിരിയൊതുക്കിയുള്ള അവളുടെ ചോദ്യം എന്നെ അത്ഭുതപ്പെടുത്തി. "ഇതെങ്ങാന്‍ സത്യമാണെങ്കിലോ... വെറുതെ കളിയാക്കിയിട്ടു വല്ലതും വരുത്തി വെക്കേണ്ട." 'എടീ.. നീയും..' എന്ന എന്റെ നിസ്സഹായ നോട്ടത്തെ അവഗണിച്ചു അവള്‍ അടുക്കളയിലേക്ക് നടന്നു.

ഇത്തരം കാര്യങ്ങളില്‍ വിശ്വാസമില്ലാത്ത അവളില്‍ പോലുമുള്ള 'ബിരിയാണി കൊടുക്കുന്നുണ്ടെങ്കിലോ' എന്ന ചിന്തയാണ് ഉസ്മാന്‍മാരുടെ ഊര്ജമെന്നു വ്യക്തം. അല്ലെങ്കില്‍ സകലമാന പ്രശ്നങ്ങളില്‍ നിന്നും മോചനം നല്‍കുന്ന ദിവ്യല്ഭുത എലസുകളുടെ അധിപന്‍ കളരിത്തൊടി അവര്‍കള്‍ തന്നെ പോലീസ് കേസിലും അതുവഴി ജയിലിലുമായിട്ടും ജാമ്യം നേടി പുറത്തിറങ്ങിയപാടെ ഇയാളെ തേടി, സമൂഹത്തില്‍ ഉന്നതിക്ക് വേണ്ടിയും ശത്രു ദോഷം പരിഹരിക്കാനും വീണ്ടും ആളുകള്‍ ചെല്ലുമായിരുന്നോ? സ്വന്തം ദോഷം മാറ്റിക്കിട്ടാന്‍ ഒരു 'ഹൈക്കല്ലുസ്സിഹാം' അരയില്‍ കെട്ടാന്‍ കക്ഷി മറന്നു പോയതാവും. അല്ലെങ്കില്‍ കേസുകെട്ടും ഗുലുമാലും സ്വന്തം തലയില്‍ വന്നു വീഴുമായിരുന്നോ? അന്ധവിശ്വാസത്തിന്റെ തിമിരം ബാധിച്ചവര്‍ക്ക് ഇതൊന്നും കാണാനാവില്ലല്ലോ! ഒരു നേരവും നിസ്കരിക്കാത്ത ഔലിയ ഉപ്പാപ്പയോടു കാരണം തിരക്കിയപ്പോള്‍ താന്‍ മക്കയിലെ ഹറം പള്ളിയില്‍ വെച്ച് നിസ്കരിച്ചു കൊണ്ടിരിക്കുന്നു എന്നായിരുന്നത്രേ മറുപടി. അത് പോലെ ഉസ്മാന് മുസ്ല്യാര്‍ക്കും വല്ല ന്യായവും കാണും . ഇതൊക്കെ പ്രചരിപ്പിക്കാന്‍ ഏജന്റുമാരായിട്ടു രണ്ട് റിട്ട. എസ്.പിമാരും ഏതാനും റിട്ട. അസിസ്റ്റന്റ് കമീഷണര്‍മാരും റിട്ട. ഡിവൈ.എസ്.പിമാരും ഒക്കെ ഉള്ളപ്പോള്‍ പേടിക്കാനെന്തിരിക്കുന്നു!

കോഴിക്കോട് മുക്കത്തെ ഔലിയയെ കുറിച്ച് ശിങ്കിടികള്‍ പ്രചരിപ്പിക്കുന്ന ഒരു കഥയുണ്ട്. പുള്ളിയെ അറസ്റ്റുചെയ്ത് പോലീസ് സ്റ്റേഷനിലെക്ക് പോകാനൊരുങ്ങിയ പോലീസ് വണ്ടി സ്റ്റാര്‍ട്ടായില്ലത്രേ! ഒടുവില്‍ പോലീസ് ഏമാന്മാര്‍ ഔലിയക്ക്‌ മുമ്പില്‍ സ്രാഷ്ടംഗം പറഞ്ഞ് തടിയൂരിയത്രേ! ഇക്കഥയൊക്കെ കേട്ട് ആശുപത്രിയെയും ഡോക്ടറെയും ഉപേക്ഷിച്ച് രോഗിയായ ഉമ്മയും എടുത്ത് മുക്കത്തേക്ക്‌ പാഞ്ഞ ഒരു കുടുംബമുണ്ട് എന്റെ തൊട്ടയല്‍പക്കത്ത്. ഔലിയയുടെ 'കറാമത്ത് വെള്ളം' മാത്രം കുടിച്ച് പരലോകം പ്രാപിക്കാനായിരുന്നു ആ പാവത്തിന്റെ വിധി. മുഖത്തുണ്ടായിരുന്ന വെളുത്ത പാടിന് ചികിത്സക്ക് പോയ പെണ്‍കുട്ടിക്കും കിട്ടിയത് ഇതേ വെള്ളം. അവളുടെ ഒരു ബന്ധുവിനെ ഈ അടുത്ത ദിവസം കണ്ടപ്പോള്‍ പറഞ്ഞു ഏതോ ഹോസ്പിറ്റലില്‍ നിന്നും പ്ലാസ്ടിക് സര്‍ജറിയിലൂടെ പാട് മാറ്റിയെടുത്തുവെന്ന്. മുക്കം ഔലിയക്ക് കൊടുത്ത നേര്ച്ച പണത്തിന്റെ പകുതിയേ ചിലവായുള്ളുവത്രേ!

ഞെട്ടിക്കുന്ന മറ്റൊരു സംഭവം എന്റെ തന്നെ നാട്ടില്‍ നടന്നിട്ട് മാസങ്ങള്‍ മാത്രം. വയനാട്ടിലെ ഔലിയയെ കാണാന്‍ പോയ പുരോഗമന വാദിയായ ഒരു അധ്യാപകന്റെ ഭാര്യയെ ഔലിയ ശാരീരികമായി 'ചികിത്സിച്ചു' കളഞ്ഞു. നാട്ടില്‍ തിരിച്ചെത്തി കാര്യം പറഞ്ഞപ്പോള്‍ ആളുകള്‍ സിദ്ധനെ കൈകാര്യം ചെയ്തു. 'പാവം' സിദ്ധന് എസ്പിമാരും ഡിവൈഎസ്പിമാരും കൂട്ടില്ലാതതിനാല്‍ കിട്ടിയത് കൊണ്ട് സായൂജ്യമടയേണ്ടി വന്നു. അയാളിപ്പോള്‍ ഭാരതിയാര്‍ സര്‍വകലാശാല തേടി നടക്കുകയാവും. കൗണ്‍സലിങ്ങിലോ മറ്റോ ഒരു പിഎച്ച്ഡി കിട്ടിയാല്‍ ആളുകള്‍ രക്ഷപ്പെടില്ലെങ്കിലും സ്വയം രക്ഷപ്പെടാമല്ലോ. ഇടയ്ക്ക് പോലീസ് കേസ് വന്നാലും കാസര്‍കോട് ഫോര്‍ട്ട്‌ റോഡില്‍ മുപ്പത് ലക്ഷം രൂപയുടെ ഫ്ലാറ്റും ആഡംബര കാറുകളും സമ്പാദിക്കാമല്ലോ.

ഇതൊക്കെ കണ്ടും കേട്ടും 'സ്വാന്തനം' ഓഫീസിന്റെ മുമ്പിലും പുറകിലും സമുദായ നേതാക്കന്മാര്‍ കോഴിക്കോടന്‍ ബിരിയാണി തിന്നാന്‍ ഒത്തുകൂടുന്നുണ്ടല്ലോ ദിവസവും. പരസ്പരം ഒറ്റപ്പെടുത്താനും കുറ്റപ്പെടുത്താനും ചേരുന്ന യോഗങ്ങള്‍ക്ക് പകരം ഒരു ദിവസത്തെ അജണ്ട കളരിത്തൊടിമാരുടെ മര്മ്മത്തിടിയായി നിശ്ചയിച്ചു ഒരു വട്ടമെങ്കിലും വട്ടമേശയ്ക്ക് ചുറ്റുമിരിക്കാന്‍ സമുദായ നേതൃത്വം ഐക്യപ്പെട്ടാല്‍ 'ഹൈക്കല്ലുസ്സിഹാം' ഇല്ലാതെ തന്നെ അന്ധവിശ്വാസ നിര്‍മാര്‍ജനം എന്ന കാര്യസാധ്യം നേടിയെടുക്കാന്‍ കഴിയും. അല്ലായെങ്കില്‍, മക്കത്തെക്കാള്‍ മഹത്തരമായി മുക്കത്തെ കാണുന്നവരും 'സാന്ത്വന'ത്തില്‍ സ്വര്‍ഗം ദര്ശിക്കുന്നവരും ഇനിയും കൂടിവരികയെ ഉള്ളൂ.