ദാ 'ഭീകരി' വരുന്നു!!

അബ്ദുല്‍ നാസര്‍ മഅദനി മൂന്നു 'സ്വലാത്ത്' ചൊല്ലി എന്നാരെങ്കിലും പറയുന്നത് ഒരു മാതൃഭൂമി ലേഖകന്‍ കേട്ടാല്‍ പിറ്റേന്നത്തെ പത്രത്തിലെ പ്രധാന തലക്കെട്ട്‌ 'മദനി ത്വലാക്ക് ചൊല്ലി' എന്നാവും എന്ന് എന്‍റെ ഒരു സുഹൃത്ത് തമാശ പറഞ്ഞത് ഓര്‍ക്കുന്നു. ലേഖകന്മാരുടെ ചിന്തയെ മാതൃഭൂമിയുടെ നല്ലിടയന്മാര്‍ മെരുക്കിയെടുത്തത് അത്തരത്തിലായതിനാല്‍ മറ്റൊന്ന് പ്രതീക്ഷിക്കുക വയ്യ. സ്വലാത്ത് എന്ന വാക്ക് കക്ഷി ആദ്യം കേള്‍ക്കുകയാവും. കാര്യമൊക്കെ അന്വേഷിച്ചു വരുമ്പോഴേക്കും കോട്ടയം പത്രം എസ്കളൂസീവ് ബാനര്‍ വെച്ച് അച്ചു നിരത്തിയുമിരിക്കും. പിന്നെ വാഷ് ചെയ്തു പാകപ്പെടുത്തിയ 'മാതൃഭൂമി ബുദ്ധി' വെച്ച് ചിന്തിച്ചാല്‍; സംഗതി ചൊല്ലിയത് മഅദനിയാണ്, എണ്ണം മൂന്നാണ്. പിന്നെ ത്വലാക്കല്ലാതെ മറ്റൊന്നാവാന്‍ വഴിയില്ലല്ലോ!

ഇത്രയുമോര്ത്തതും പറഞ്ഞതും കേരളകൌമുദിക്കും ബാധകമാവുന്നത് കഴിഞ്ഞ ദിവസം ഈ രണ്ടു പത്രങ്ങളും പ്രസിദ്ധീകരിച്ച വാര്‍ത്തകളാണ്. 'മഅദനിക്കെതിരെ സാക്ഷി പറഞ്ഞവരെ ഭീഷണിപ്പെടുത്തി സ്വാധീനിക്കാന്‍ ശ്രമിച്ച അഞ്ചംഗസംഘത്തെ' കുറിച്ചുള്ള കര്‍ണാടക പോലീസിന്റെ പച്ചക്കള്ളം അപ്പടി വിഴുങ്ങി വായനക്കാര്‍ക്ക് ചര്‍ദ്ദിച്ചു കൊടുത്ത കന്നഡ പത്രങ്ങളെ കോപ്പിയടിക്കാന്‍ ഇവര്‍ കാണിച്ച തൊലിക്കട്ടി അപാരം തന്നെയാണ്. ഷാഹിന എന്ന കഥാനായിക തെഹല്‍ക്കയുടെ റിപ്പോര്‍ട്ടര്‍ ആവുന്നതിനു മുമ്പ് ഏഷ്യാനെറ്റില്‍ ജോലി ചെയ്തിരുന്നു. അഥവാ, ഈ പറഞ്ഞ മലയാള പത്ര പ്രവര്‍ത്തകരുടെ കൂടെ പത്രസമ്മേളനങ്ങളും യുവജനോത്സവങ്ങളും ബന്ദ് - ഹര്‍ത്താലുകളും റിപ്പോര്‍ട്ട് ചെയ്തും ബിസ്കറ്റും ചായയും കുടിച്ചും ഒപ്പമുണ്ടായിരുന്നു. വാര്‍ത്ത പ്രസിദ്ധീകരണത്തിനു മുമ്പ് നേരിട്ട് വിളിച്ചു കാര്യമന്വേഷിക്കാന്‍ ഷാഹിനയുടെ നമ്പര്‍ കിട്ടിയില്ലെന്ന് ബാംഗ്ലൂര്‍ ലേഖകന്‍ ബിജുരാജ് വിശദീകരിക്കുമ്പോള്‍ അത് അതുപോലെ വിശ്വസിക്കാന്‍ ഡസ്കിലുള്ളവര്‍ക്കേ സാധിക്കൂ. പോലീസ് ഭാഷ്യത്തില്‍ അല്പം പോലും സംശയം രേഖപ്പെടുത്താത്ത തരത്തില്‍ ന്യൂസ് പ്രസിദ്ധീകരിച്ചത്തിന്റെ പിറ്റേന്ന് തന്നെ ഇത് വ്യാജ കേസായിരുന്നുവന്നു കേരള പത്രപ്രവര്‍ത്തക യൂണിയന് ബോധ്യപ്പെട്ടെങ്കില്‍ ഈ രണ്ടു പത്രങ്ങളുടെയും താല്പര്യം എന്തായിരുന്നുവെന്ന് ഊഹിക്കാവുന്നതേ ഉള്ളൂ.

മാധ്യമഭീകരതയെ കുറിച്ച് മുമ്പ് കുറെ പറഞ്ഞതാണ്. ഷാഹിന സംഭവത്തോടെ അതിന്റെ മറ്റൊരു മുഖമാണ് അനാവൃതമായിരിക്കുന്നത്. പത്രവാര്‍ത്തയും മറ്റും അവിടിരിക്കട്ടെ. ഷാഹിന എന്ന പത്രപ്രവര്‍ത്തകക്കെതിരെ കര്‍ണാടക പോലീസ് എടുത്തത് വ്യാജ കേസാണ് എന്നത് ഒരു ദിവസം കൊണ്ട് ബോധ്യപ്പെട്ട 'കേരള പത്രപ്രവര്‍ത്തക യൂണിയനിലെ' എത്ര പേര്‍ക്ക്, ഇതേ പോലീസ് മഅദനിക്കെതിരെ കെട്ടിച്ചമച്ച പച്ചക്കള്ളങ്ങളെ കുറിച്ച് ബോധ്യമുണ്ട്? ഷാഹിനയെ ഭീകരയാക്കിയത് കര്‍ണാടക പോലീസ്, മഅദനിയെ ഭീകരനാക്കിയതും കര്‍ണാടക പോലീസ്. കൊടകും ഇഞ്ചികൃഷിയും ഗൂഡാലോചനയും ഒരു 'നുള്ള് ശാമ' കൂടി ചേര്‍ത്ത് വായനക്കാര്‍ക്ക് വിളമ്പിയതല്ലാതെ അതിന്റെ സത്യാവസ്ഥ ജനങ്ങളെ ബോധ്യപ്പെടുത്താന്‍ എത്ര പേര്‍ ശ്രമിച്ചിട്ടുണ്ട്? അതിനു വേണ്ടി ലേഖന പരമ്പര എഴുതിയ പത്രങ്ങളെ കൂടി ഭീകര ബന്ധം ആരോപിച്ച് മാറ്റി നിര്‍ത്താനുള്ള ശ്രമമല്ലേ ഇവിടെ നടന്നിട്ടുള്ളത്? പത്രപ്രവര്‍ത്തക യൂണിയന് ഇത്രവേഗം പൊള്ളിയത് ഭ്രാന്തു വന്നത് ആരാന്റമ്മക്കല്ലാത്തത് കൊണ്ട് മാത്രമാണ്.

മഅദനിയുടെ അറസ്റ്റിനു മുമ്പ് അദ്ദേഹത്തോട് അനുകമ്പ കാണിച്ച മാധ്യമങ്ങള്‍ കൂടി ഇപ്പോള്‍ അദ്ദേഹത്തിനെതിരെയുള്ള വാര്‍ത്തകളില്‍ മസാല ചേര്‍ക്കുന്നത് കാണുമ്പോള്‍ ദുഃഖം തോന്നാറുണ്ട്. ഇത് ഒരു പുനരാലോചനയുടെ സമയമാണ്. കര്‍ണാടക പോലീസിന്റെ തനിനിറം സ്വന്തം പത്രപ്രവര്‍ത്തകക്ക് പോലും അനുഭവമായിരിക്കുന്ന വേളയില്‍ ഒരു നിരപരാധി ജയിലില്‍ കിടന്നു നരകിക്കാന്‍ ഇടയായതിനു പിന്നിലെ കള്ളക്കളികളെ കുറിച്ച് സമൂഹത്തെ ബോധ്യപ്പെടുത്താന്‍ മാധ്യമങ്ങളെ ഉപദേശിക്കാന്‍ മാധ്യമ സംഘടനകള്‍ മുന്നോട്ടു വരണം. ജസ്റ്റിസ് മഅദനി ഫോറം പോലുള്ള സംരംഭങ്ങളുമായി സഹകരിച്ചു ഇരട്ടനീതിക്കെതിരെ ശബ്ദമുയത്താന്‍ കഴിയണം. ഇനിയൊരു മഅദനി ഉണ്ടാവാതിരിക്കാന്‍ മാധ്യമ ജാഗ്രത ഏറെ സഹായിക്കും.