ഓജോ വിപ്ലവം വിജയിക്കട്ടെ

വിപ്ലവമെന്നാല്‍ മാറ്റമാണ്. കണ്ണില്‍ കണ്ടതെല്ലാം 'വിപ്ലവിപ്പിച്ചു' കളയാനുള്ള വാശിയിലാണ് അധ്വാനിക്കുന്നവരുടെ സ്വന്തം ചാനല്‍. നാട്ടില്‍ കുഴിച്ചു മൂടാനുള്ളതിനെ കുഴിച്ചു മൂടുക; മൂടപ്പെട്ടതിനെ കിളച്ചെടുക്കുക. മമ്മൂക്കയും ബ്രിട്ടാസും വിപ്ലവത്തിന്റെ പുതുവഴികള്‍ തേടുമ്പോള്‍ പാവം സഖാക്കള്‍ വാപൊളിച്ചിരിക്കുകയാണ്. വൈജ്ഞാനിക വിപ്ലവത്തിനിടയില്‍ വലിച്ചെറിയപ്പെട്ട 'വാസ്തു' പൊടി തട്ടിയെടുത്ത് പ്രേക്ഷകര്‍ക്ക് വിളമ്പിക്കൊടുത്ത ചാനലിനോട് സഹതപിച്ചിരിക്കെ ആണ് 'ഓജോ ബോര്‍ഡിന്‍റെ' പ്രചാരക ശിരോമണി പത്മനാഭന്‍ ഡോക്ടരുമായുള്ള അഭിമുഖം കാണുന്നത്. ചോദ്യങ്ങളില്‍ എപ്പോഴെങ്കിലും, 'നമ്മള്‍ തമ്മില്‍' പരിപാടിയില്‍ ശ്രീ കണ്ഠ൯ നായര്‍ ചോദിച്ച രീതിയിലുള്ള ഒരു ചോദ്യമെങ്കിലും പ്രതീക്ഷിച്ചവര്‍ക്ക് തെറ്റി. ജി മാധവന്‍ നായരെ ഇന്റര്‍വ്യു ചെയ്യുന്നതു പോലുള്ള ചോദ്യങ്ങള്‍ കേട്ട പാവം പ്രേക്ഷകരില്‍ നല്ലൊരു വിഭാഗം തെറ്റിദ്ധരിച്ചു പോയിട്ടുണ്ടാവും, ഇതും ശാസ്ത്രമാണെന്ന്!

ആത്മാക്കളെ (പ്രേതങ്ങള്‍ എന്ന് വിളിക്കുന്നത് പപ്പന്‍ ഡോക്ടര്‍ക്ക് ഇഷ്ടമല്ലത്രെ!) വിളിച്ചു വരുത്തി ഭാവിയും ഭൂതവും പ്രവചിക്കാമെന്നു കണ്ടു പിടിച്ചത് അമേരിക്കക്കാരാണത്രെ! പപ്പന്‍ ഡോക്റ്ററുടെ ഗുരു ഏതോ മരിച്ചു പോയ ആളുടെ ആത്മാവും. ആ ആത്മാവുമായി നിരന്തരം ബന്ധപ്പെടാറുണ്ടെന്നും മറ്റുമുള്ള ഇയാളുടെ 'ബഡായി' യാതൊരു ഉളുപ്പുമില്ലാതെ ലോകത്തോട്‌ വിളിച്ചു പറയാന്‍ സമയമനുവദിച്ചത് എന്തിനു വേണ്ടി ആയിരുന്നു എന്ന് ബന്ധപ്പെട്ടവര്‍ വ്യക്തമാക്കിയാല്‍ നന്ന്. ഇത് സത്യമാണെങ്കില്‍ അത് ഡമോണ്‍സ്ട്രെഷന്‍ ആയല്ല, ലൈവ് ആയിട്ടായിരുന്നു പ്രേക്ഷര്‍ക്ക് കാണിച്ചു കൊടുക്കേണ്ടിയിരുന്നത്. അതിനു വേണ്ട സാഹചര്യങ്ങള്‍ ഒരുക്കാന്‍ അത്ര വലിയ ബുദ്ധിമുട്ടാണ് എന്ന് വിശ്വസിക്കുക പ്രയാസം തന്നെ ആണ്. കാരണം, വിലപ്പെട്ട അര മണിക്കൂര്‍ സമയമാണ് ഈ പരിപാടിക്ക് വേണ്ടി കൈരളി നീക്കി വെച്ചത്. ആ സമയത്ത് ഇത്തരം സാമൂഹ്യ വിപത്തുകളെ തുറന്നു കാട്ടുകയായിരുന്നു ചെയ്തിരുന്നതെങ്കില്‍ അത് വിപ്ലവമായി മനസ്സിലാക്കാമായിരുന്നു.

എന്തിനായിരുന്നു കൈരളി ഇയാളെ ഇങ്ങനെ പ്രമോട്ട് ചെയ്തത്? 'ഓജോ' പഠിപ്പിച്ചു കൊടുക്കാന്‍ ഇയാള്‍ വാങ്ങിക്കുന്ന ആയിരത്തി അഞ്ഞൂറ് രൂപയില്‍ പാര്‍ട്ടിക്കോ ചാനലിനോ വിഹിതമുണ്ടാവും എന്ന് ആരെങ്കിലും ആരോപണം ഉന്നയിച്ചാല്‍ അവരെ എങ്ങിനെ കുറ്റപ്പെടുത്തും. പത്മനാഭന്‍ തന്നെ പറഞ്ഞത് ഇത്തരം പരിപാടികള്‍, കൂടുതല്‍ വിദ്യാര്‍ഥികള്‍ തന്‍റെ അടുത്ത് 'കോഴ്സ്' ചെയ്യാന്‍ എത്താന്‍ സഹായിക്കും എന്നാണ്. പെണ്‍കുട്ടികളാണ് മാനസികമായി പെട്ടെന്ന് പ്രലോഭിതരാവാന്‍ സാധ്യത എന്ന് തുറന്നു പറഞ്ഞ ഡോക്ടറുടെ മുമ്പില്‍ പുഞ്ചിരി ഉതിര്‍ത്ത ചോദ്യകര്‍ത്താവിനെ സമ്മതിക്കണം. ഓജോ ബോര്‍ഡിന്‍റെ മാഹാത്മ്യം ഇന്റര്‍വ്യൂവിലൂടെ ബോധ്യപ്പെടാത്തവരെ കീഴടക്കാനും ചാനല്‍ വഴി കണ്ടെത്തി. ആത്മാവിന്‍റെ അസര്‍പ്പക കഥകള്‍ പറഞ്ഞു കേട്ട നാല് വിദ്യാര്‍ഥികളെ നേരിട്ട് ഹാജരാക്കി കളഞ്ഞു വിപ്ലവ ചാനല്‍. അവരാവട്ടെ ആരും ഇതുവരെ ഓജോ ചെയ്തിട്ടില്ല. അമ്മയും അമ്മൂമ്മയും പറഞ്ഞു കൊടുത്ത കുറെ കെട്ടുകഥകള്‍ അവസാന പത്തു മിനുട്ടില്‍ കെട്ടഴിച്ചപ്പോള്‍ ചാനല്‍ പ്രവര്‍ത്തകര്‍ക്ക് സായൂജ്യമായിക്കാണും. ഒരു വിദ്യാര്‍ഥിയോട് 'താങ്കള്‍ ഓജോ ചെയ്താല്‍ ആദ്യം വിളിക്കുക ഏത് ആത്മാവിനെ ആയിരിക്കും' എന്ന ഭക്തിപുരസ്സരമുള്ള ചോദ്യത്തിന് 'ഗാന്ധിജി' എന്ന മറുപടി കേട്ടപ്പോള്‍ അല്‍പ്പം ആശ്വാസമായി. കക്ഷി ഏതായാലും സഖാവ് അല്ലല്ലോ; പാവം ഗാന്ധിയനല്ലേ!

യുവതലമുറയിലെ ചാഞ്ചല്യങ്ങളെ തിരുത്തേണ്ട ഒരു മാധ്യമം ഇത്തരം പരിപാടികളുമായി ഇറങ്ങിത്തിരിക്കുമ്പോള്‍ പ്രതികരിക്കാതെ അടങ്ങിയിരിക്കുന്ന വിദ്യാര്‍ഥി സഖാക്കള്‍ ഇനിയെങ്കിലും ഉണരണം. ചുരുങ്ങിയത്, പ്രോഗ്രാമിന്റെ ദാരിദ്ര്യം കൊണ്ടാണ് ഇങ്ങനെ ഉള്ള പരിപാടികള്‍ അവതരിപ്പിക്കുന്നതെങ്കില്‍ പഴയ ലാത്തിചാര്‍ജ്ജുകളുടെ സിഡികള്‍ സ്റ്റുഡിയോയില്‍ എത്തിച്ചു കൊടുക്കുകയെങ്കിലും വേണം.

ഫ്രീകിക്ക്: പരിപാടി കണ്ട എന്‍റെ സഹമുറിയന്‍ തീര്‍ത്തു പറഞ്ഞു : 'ഓജോ സത്യമാവാനേ വഴിയുള്ളൂ. അല്ലെങ്കില്‍ കൈരളി ഈ പരിപാടി കാണിക്കില്ലായിരുന്നു.' - ഇത്തരം എത്ര പാവങ്ങള്‍ ഇപ്പോള്‍ പത്മനാഭന്‍റെ ഫോണ്‍ നമ്പര്‍ തെരയുന്നുണ്ടാവും!